Yashyizweho kuri29 May, 2019 | 13:27

Musanze :Abahoze muri FDLR basubiye mu miryango yabo harimo abazahita bakurikiranwa ku byaha bya Jenoside

Komisiyo y’igihugu ishinzwe gusubiza mu buzima busanzwe abahoze mu ngabo ivuga ko bamwe mu bari mu nyeshyamba z’umutwe wa FDLR bacyekwaho ibya bya Jenoside yakorewe Abatutsi,ngo nubwo basubijwe mu miryango yabo bazakurikiranwa kuri ibyo byaha abandi bagatabwa muri yombi kuko icyaha cya Jenoside kidasaza.

Ni ibyatangajwe ni iyi komisiyo kuri uyu wa Kabiri tariki 28 Gicurasi 2019 mu muhango wo gusubiza mu miryango yabo mu ngabo za FDLR bamaze iminsi mu mahugurwa mu kigo cya Mutobo mu karere ka Musanze.

Bamwe mu bahuguwe barishimira ko bagiye gusubizwa mu miryango yabo bakavuga ko ikintu cya mbere bazitaho ari ukubana neza nabo bazasangayo.

Ati"Ikintu cya mbere nishyizemo ni ukugenda nkabanira neza abo nsanze nkanashakisha uko nisunga bagenzi banjye bantanze kugerayo bambwire inzira banyuzemo cyane cyane yo kubungabunga umutekano".

Bakabaramba Alivera umunyamabanga wa leta muri minisiteri y’ubutegetsi bw’igihugu ushinzwe imibereho myiza y’abaturage yasabye aba bagiye gubira mu miryango yabo kugira uruhare mu kubungabunga umuteka bafatanya n’abo basanze.

Ati "Abantu bari abasirikare tekinike z’umutekano muba muzizi,imbaraga muba muzifite kandi n’ubwo haba hari ikintu kiri guhungabanya umutekano muba mukizi.None rero mufite ibintu byose byo kugira ngo mushyire umutekano ku murongo abo musanze nabo babifashishe namwe mubafashe".

Umuyobozi wa komisiyo y’igihugu ishinzwe gusubiza mu buzima busanzwe abari abasirikare, Seraphine Mukantabana,yahumurije abadafite icyo bikeka avuga ko icyaha ari gatozi ndetse ko hari abagomba guhita batabwa muri yombi.

Ati"Niba hagaragayemo dosiye zijyanye n’uko bijanditse muri jenoside yakorewe abatutsi bazabibazwa kuko ni icyaha kidasaza.Ni icyaha utavuga ngo kubera ko yatinze buriya cyaribagiranye".

Muakantabana yavuze ko urwego rw’ubugenzacyaha rumaze iminsi rukora iperereza kandi ko hari bamwe bakekwaho kuba barakoze ibyaha bya jenoside mbere yo kujya muri Congo.

Ati"Hano harimo ababa barakatiwe n’inkiko gacaca bafite amadosiye agaragara abo bazahamagarwa babibazwe aho baba bari hose kuko hari n’abatangiye guhamagarwa bari hano mu kigo bakabamenyesha ko izo dosiye zihari".

Leta isaba aba bari abarwanyi ba FDLR bagiye gusubizwa mu buzima busanzwe gukomeza gushishikariza bagenzi babo bakiri mu mashyamba ya congo gutahuka mu rwababyaye.

Abagiye gusubira mu buzima busanzwe nyuma yo kwitandukanya n’umutwe wa FDLR ku bushake bagera kuri 569 bagenewe impamba ingana n’ibihumbi 60 izabafasha mu gutangira ubuzima bushya bageze mu miryango yabo.

Iki cyiciro cya 65 cyarimo majoro Bernard Ntuyahaga wakatiwe n’inkiko z’Ububiligi gufungwa imyaka 20. Ashinjwa impfu z’abasilikare 10 b’ababiligi bari mu ngabo z’umuryango w’abibumbye zari mu butumwa bwo kubungabunga amahoro mu Rwanda mu gihe cya jenoside.

Niyomugabo Albert/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru