Yashyizweho kuri13 May, 2019 | 11:22

Umushoferi agomba kujya abanza gusobanurira abagenzi atwaye nimero y’ikinyabiziga barimo

Umunyamabanga wa Leta muri misiteri y’ibikorwa remezo ushinzwe gutwara abantu n’ibintu,Uwihanganye Jean De Dieux yavuze ko abashoferi bagomba kwitwararika igikorwa cyo kubwira abagenzi batwaye mu modoka babasobanurira ibyo bemerewe n’ibyo batemerewe gukora mu rugendo mu rwego rwo kwirinda impanuka zikunze kubaho mu mihanda.

Yabivuze kuri uyu wa Mbere taliki 13 Gicurasi 2019 mu bikorwa byo gutangiza ubu bukanguramba ku mutekano wo mu muhanda bwahawe izana rya ’Gerayo Amahoro’ bukazamara ibyumweru 52.Ibi bikorwa biri kubera muri gare zose hirya no hino mu gihugu aho ku rwego rw’igihugu byabereye muri gare ya Nyabugogo.

Uwihanganye yavuze ko igikorwa gitangijwe kidakwiye kuba umuhango ahubwo kigomba kuab umwanya wo kwiyemeza gukoresha umuhanda mu buryo bwiza.

Ati"Iki gikorwa twajemo cyo gutangiza ubu bukangurambaga ntibibe umuhango gusa ahubwo bibe umwanya wa buri wese ukoresha umuhanda wo kwiyemeza gukoresha umuhanda neza, kwirinda impanuka no guharanira kugerayo amahoro".

Yibukije abashoferi ko bagomba kujya babanza bakabwira abagenzi nimero iranga ikinyabiziga barimo ndetse no kubibutsa ibyo bemerewe n’ibyo batemerewe.

Ati" Mbere y’uko imodoka ihaguruka, Umushoferi agomba kubanza kubwira abagenzi nimero y’ikinyabiziga (pulaki) cyangwa y’imodoka atwaye, akababwira ibyo bemerewe n’ibyo babujijwe.Abagenzi nabo bagomba gutanga Amakuru ku cyatuma batagerayo amahoro".

Ngo ubu bukangurambaga bwateguwe na Polisi y’u Rwanda ishami rikorera mu muhanda,mu rwego rwo gukumira impanuka zikunze kubera mu muhanda.

Umuyobozi Mukuru wa Polisi wungirije ushinzwe abakozi n’imiyoborere DIGP/AP Juvenal Marizamunda, avuga ko ari ubukangurambaga buzamara igihe cy’ibyumweru 52 bugamije gusobanurira abantu batandukanye uburyo bwiza bwo gukoresha umuhanda.

Ati"Ubu bukangurambaga bw’umutekano wo mu muhanda bugamije ko buri mugenzi agera aho ajya amahoro.Turamara ibyumweru 52 twigisha ibyiciro bitandukanye uburyo bwiza bwo gukoresha umuhanda, dukumire impanuka ziberamo".

Magingo aya, 80% by’impanuka zo mu muhanda, zituruka ku myitwarire mibi y’abashoferi nko kugendera ku muvuduko ukabije, gutwara basinze, uburangare, kwica nkana amategeko y’ umuhanda n’ibindi.
Umuyobozi Mukuru wa Polisi wungirije ushinzwe abakozi n’imiyoborere DIGP Marizamunda Uwihanganye avuga ko buri mushoferi agambo kugira umuco wo kubanza guha abagenzi inama z’imyitwarire mu rugendo
Yanditswe na Habarurema Djamali


Tanga igitecyerezo

Amazina
Ubutumwa

Izindi nkuru