Yashyizweho kuri2 April, 2017 | 18:41

Umuntu Ufite ingengabitekerezo ya jenoside aba yarapfuye ahagaze- Gen Mubaraka Muganga

Umuyobozi w’Ingabo mu Mujyi wa Kigali no mu Ntara y’Uburasirazuba, arasaba abagifite ingengabitekerezo ya jenoside guca ukubiri na yo kuko nta keza kayo.

Gen Mubaraka Muganga agereranya abagifite ingengabitekerezo ya jenoside
“n’ururondwe rwumiye ku ruhu inka yaramaze kuribwa.”

Ibi yabitangarije mu karere ka Nyagatare mu Murenge wa Karangazi ubwo hasozwaga ibikorwa bimara igihe cy’ukwezi bya AERG na GAERG bizwi nka AERG & GAERG week byasorejwe mu rwuri rwabo.

Yasabye ubyiruko ko abazajya babona bene abo bantu bagifite ingengabitekerezo ya jenoside ntawe badakwiye kubataho igihe kuko nta mwanya bafite mu muryango nyarwanda.

Ati “Abo bantu bandi bagitekereza nabi, abagaragaraho ingengabitekerezo ya Jenoside bananiwe kuvamo, njye bariya sinjya mbatindaho. Ubonye umuntu afite ingengabitekerezo icyo wakora gusa ni ukumusengera kuko aba yarapfuye ahagaze, asigaje umunwa gusa wo kuvuga nk’ibyo nta kindi yakora. Anagutunze urutoki twe twashomereye tuba tubonye ibiraka. Abivuze ubyumva tera urutambwe ujya imbere umwihorere. Uretse kwimanika agapfa cyangwa agaceceka, abivuze ubyumva jya ucira wigendere kuko ni nko gushaka ngo akugweho gusa.”

Minisitiri Uwacu Julienne w’Umuco na Siporo, yasabye aba bagize AERG na GAERG gukaza ingufu mu guhangana n’abagifite ingengabitekerezo ya Jenoside.

Yavuze ko mu gihe cyo kwibuka abafite ingengabitekerezo ya Jenoside ari bwo bayikwirakwiza, uru rubyiruko rukaba rukwiye gufasha mu guhangana na bo bacyifuza kuroga abantu ndetse bakanabwira Isi n’amahanga amateka y’u Rwanda kandi bagashimangira ko ibibi byabaye bitazongera kubaho ukundi.

Prof Dusingizemungu Jean Pierre, Umuyobozi wa Ibuka, yahamagariye aba barokotse Jenoside kwiga bashyizeho umwete kandi bashakisha ibisubiza ibibazo igihugu gifite, ndetse anifuza ko abarimu bigisha amateka mu mashuri cyane avuga kuri Jenoside yakorewe abatutsi bajya bayigisha aho kohereza abana kubaza ababyeyi babo kuko byagaragaye ko hakiri ababyeyi baroga abana.

Yongeyeho ko aba barimu bajya bunganirwa n’abandi baturage bazi amateka babayemo ndetse no mu mashuri aya masomo agaherekezwa no gusura inzibutso.

Yemeza ko abarokotse Jenoside babonye urupfu kuko bakorewe jenoside, bityo bakaba ari nabo bazi agaciro k’ubumwe n’ubwiyunge kuko bazi ingaruka z’amacakubiri.

Ibikorwa bya AERG na GAERG byakozwe muri uyu mwaka harimo n’ibikenerwa byose mu ngendo bakora byatwaye amafaranga y’u Rwanda angana na miliyoni128.

Ibikorwa bikorerwa mu rwuri rungana na hegitari 130 bahawe na Perezida wa Repubulika ari byo ubworozi bw’inka n’ihene ndetse n’ubuhinzi bw’urutoki n’ibigori bibinjiriza angana na miliyoni 120 ku mwaka.


Umuyobozi w’Ingabo mu Mujyi wa Kigali no mu Ntara y’Uburasirazuba Gen Mubaraka Muganga

MUHABURA.RW


Tanga igitecyerezo

Amazina
Ubutumwa

Izindi nkuru