Yashyizweho kuri27 October, 2015 | 20:34

Umufasha wa Perezida Jeannette Kagame arashimira Abanyarwanda

Madamu Jeannette Kagame yagaragarije abagiraneza ko Abanyarwanda bamye bafite umuco wo kugira ubuntu ari byo bituma imiryango y’abagiraneza ikorana neza n’u Rwanda.

Ibi ni bimwe mu byo yavugiye mu nama y’iminsi yaberaga i Kigali yahuzaga abagiraneza (Philanthropists) bafasha Afurika, yitezweho kuvamo ubufasha butandukanye kuri Leta y’u Rwanda. Madamu Jeannette Kagame washinze umuryango Imbuto Foundation yatanze ingero z’uko u Rwanda rwateye intambwe mu gihe gito nyuma ya Jenoside yakorewe Abatutsi n’uko byashobotse ngo Abanyarwanda batere imbere. Yagaragaje kandi uburyo Afurika ubwayo ibamo abagiraneza, ati “Kuri twe tubyita ‘Ubuntu’ bisobanuye kugaragaza ubushobozi bw’umuntu mu kwemera ubwa mugenzi we, mu kwita no kwita ku bandi, mu buryo bwo guhana agaciro.”

“Mu Rwanda ubuntu buri mu muco wacu kuko no mu bakurambere bacu byari bimenyerewe ko Abanyarwanda babaga batunze bagabiraga inka abaturanyi badatunze kugira ngo na bo bahere ko borora ngo bihaze. Tubyita ‘kuremera’.” Yakomeje agira ati “uyu munsi gahunda za leta z’iterambere ry’ubukungu nka ‘Girinka’ zatumye abantu miliyoni imwe bava mu bukene mu gihe cy’imyaka itanu gusa.”

Madamu Kagame yasobanuye ko umuco y’ubuntu ari wo watumye ashinga umuryango Imbuto Foundation mu 2001 ubwo watangiye witwa PACFA, ufite intego zo kurinda no kwita ku miryango hirindwa virusi itera SIDA. Yagize ati “Twatangiye ibikorwa by’ubugiraneza twibanda ku kurwanya icyorezo cya SIDA, dufasha mu kubaka ubuzima bw’abagore cyane cyane barimo abandujwe ku ngufu mu gihe cya Jenoside yakorewe Abatutsi.” Yasoje asaba ko habaho ubufatanye burushijeho hagati ya za guverinoma za Afurika n’ibigo, imiryango ndetse n’abantu ku giti cyabo kugira ngo hakurweho ibibazo bikunze kugaragara mu bikorwa by’ubugiraneza.

Umuyobozi w’ihuriro ry’abagiraneza ku Isi (Global Philanthropy Forum), Jane Wales avuga ko ubugiraneza budasaba kuba umuntu afite amafaranga menshi, ahubwo bisaba kuba ubukora afite ubumuntu ndetse n’imitekerereze iteye imbere. Yagize ati “Amafaranga yonyine ntahagije kugira ngo ukore ugirire neza abagukeneye. Ariko ko amafaranga ni ingenzi kugira ngo ugirire abandi ineza kandi ubugiraneza buba bugamije gushaka ibisubizo ku bibazo runaka.” Jane avuga ko muri iyi minsi ibiri asanga ibyaganiriweho byaratanze umusaruro cyane kuko yabonye koko ko Afurika yo ishoboye kugira ngo izigobotore ibibazo irimo.

Abasaga 150 baturutse mu miryango y’abagiraneza bari bateraniye muri iyi nama barimo abafasha abanyeshuri bo muri Afurika kwiga mu bihugu by’u Burayi na Amerika n’ahandi bakaba bari mu ihuriro bise African Philanthropists.
Bamwe muri aba bagiraneza ahanini baba ari abikorera bafite ubukungu buhambaye muri Afurika no hanze yayo.

Yanditswe na Ubwanditsi/Muhabura.rw


Tanga igitecyerezo

Amazina
Ubutumwa

Izindi nkuru