Yashyizweho kuri7 February, 2019 | 10:12

Uganda yirukanye shishi itabona abandi banyarwanda ku butaka bwayo

Uganda yasubije iwabo shishi itabona abagore batandatu b’Abanyarwanda n’abana babo babiri ndetse n’umugabo umwe bari bamaze iminsi iri hagati y’umwe n’itandatu bafungiwe ku mupaka wa Cyanika mu Karere ka Kisoro.

Aba banyarwanda birukanwe ku butaka bwa Uganda kuwa Gatatu tariki ya 6 Gashyantare 2019. Muri aba harimo uwitwa Namahoro Assuma w’imyaka 37 ukomoka mu Karere ka Musanze.

Uyu mugore yari amaze imyaka 22 atuye mu Karere ka Masaka aho yashakiye, akaba yarafunzwe umunsi umwe. Yahise yoherezwa mu Rwanda nyuma yo gufungurwa nk’uko Virunga Post ducyesha iyi nkuru ibitangaza.

Undi ni Muhirwa Jean Paul w’imyaka 33 wo mu Karere ka Burera. Asanzwe akora ubucuruzi bwambukiranya umupaka wa Gisoro, yavuze ko yarafunzwe iminsi itandatu.

Muhirwa yagize ati ‘’Njye maze iminsi itandatu mfungiwe kuri polisi ya Kisolo, muri icyo gihe nari mbayeho nabi, bambwira ko Abanyarwanda turi abagome, bambwira ko benda kunjyana mu bucamanza. Nakomeje kugerageza gutakamba ngo bambabarire bagera ubwo bambwira ko ngomba kujyana n’abandi banyarwanda bari kugarurwa hano mu gihugu.’’

Muhirwa Jean Paul w’imyaka 33 wo mu Karere ka Burera yavuze ko aho bari bafungiwe bababwiraga ko abanyarwanda ari abagome

Naho uwitwa Nyiramahirwe Anonciyata avuga ko yafashwe na Polisi ya Uganda nyuma yo kuhinjira mu buryo bwemewe n’amategeko ariko ngo yaje gutungurwa no kugera ahitwa Nyakabande muri Uganda babona abapolisi bahagaritse bus barimo yerekeza i Kampala babakuramo niko kubajyana kubafunga.

Yagize ati ‘’Nari nakatishije itike ngomba kugera i Kampala, tugeze mu nzira rwagati baba batugaruye shishitabona bahita badufunga, urumva kuba umuntu yiteguye urugendo akaruvutswa, ukongeraho no gufungwa, ukicishwa inzara, ugatukwa, yewe banatwaka ruswa kugira ngo bakurekure, urumva ni akarengane dukeneye ko bikemuka’’.

Yongeyeho ati ‘’Aba bantu nta n’impuhwe bafite, kubona badatinya no gufunga abagore bafite abana b’impinja bakamara umunsi urenze umwe batagaburiwe, urumva ni ikibazo gikomeye".

Nyiramahirwa avuga kandi ko yafunzwe ubwo yashakaga gusura musaza we utuye mu Karere ka Kyankwanzi muri Uganda.

Yankurije Florentine w’imyaka 33 ukomoka mu Karere ka Gakenke. Asanzwe atuye ahitwa Bunyoro aho yashakiye. Yafunganwe n’umwana we, Jackson Kabalisa w’imyaka itanu ubwo yari aje gusura umuryango we.

Abandi ni Tuyisenge Beatrice ukomoka i Rubavu wafunganwe n’umwana we w’umwaka umwe witwa, Isaac Irampumuriza.Aba banyarwanda barekuwe na polisi basubizwa mu gihugu cyabo kuko ngo bari abere.

Aba baje nyuma y’uko Uganda yirukanye ku butaka bwayo, Umunyarwandakazi Annie Tabura Bilenge imushinja kuba intasi y’u Rwanda mu gihe cy’imyaka isaga itandatu.

Polisi ya Uganda ntiyigeze igira urwego na rumwe ibashyikiriza ku ruhande rw’u Rwanda nk’uko biba biteganyijwe mu mibanire y’ibihugu. Abo banyarwanda ubwabo bahisemo kugana urwego rw’abinjira n’abasohoka kugira ngo buzuze amakuru agaragaza ko bagarutse mu Rwanda.
Aha bari bageze mu Rwanda bavuga ko birukanwe mu gihugu cya Uganda
Yanditswe na Habarurema Djamali


Tanga igitecyerezo

Amazina
Ubutumwa

Izindi nkuru