Yashyizweho kuri10 January, 2018 | 09:42

U Rwanda na Uganda barigira hamwe ubufatanye bukwiye kuranga abasirikare

Abantu 24 barimo abasirikare, abapolisi n’abasivili bo mu Rwanda na Uganda bateraniye i Musanze mu Kigo cy’u Rwanda cy’amahoro(Rwanda Peace Academy) aho bari guhugurwa ku mikoranire ikwiye kuranga igisirikare n’abasivili hagamijwe kugarura ituze ahari intambara.

Ayo mahugurwa yatangiye kuri uyu wa Kabiri tariki ya 09 Mutarama 2018 bikaba biteganyijwe ko azasozwa nyuma y’iminsi 10.

Abari guhugurwa ku rwego rw’abasirikare n’abapolisi ni aba ofisiye bato n’abakuru, bose bakaba bahuriye ku kuba biteguye kuzoherezwa n’ibihugu byabo mu butumwa bwo kubungabunga amahoro hirya no hino ku Isi.

Col Jill Rutaremara, umuyobozi w’Ikigo cy’igihugu cy’Amahoro, atangiza ku mugaragaro aya mahugurwa yasobanuye ko ibikorwa byo kubungabunga no kugarura amahoro kugira ngo bigere ku ntego bisaba ko imikoranire hagati y’igisirikare, igipolisi ndetse n’abasivili iba iri nta makemwa.

Akaba asobanura ko ari yo mpamvu ziriya nzego zose ziri guhugurirwa hamwe, ati “mu by’ukuri ahantu habaye imvururu akenshi usanga igisirikare ari cyo kiza mbere cyikagarura ituze ariko ituze naryo rituzuye.”

Yakomeje agira ati “kugira ngo haze amahoro bigabanye abantu gupfa, bikenera ko inzego nyinshi cyane zibigiramo uruhare; abasirikare, abapolisi n’inzego za gisivili yaba ari iza Leta iri muri icyo gihugu, yaba ari iz’imuryango utegamiye kuri Leta, yaba ari imiryango nka Loni.”

Col Rutaremara avuga kandi ko guhugurira hamwe inzego z’umutekano n’abasivili bigamije gufasha abaturage by’umwihariko abo mu bihugu birimo ubutumwa bwo kugarura amahoro kubwibonamo bityo nabwo bukagera ku ntego, ati “birazwi neza ko kugira ngo igisirikare gikore kigere ku bintu byinshi bisaba kuba gishyigikiwe, cyemerwa n’abasivili kandi bakibonamo, rero aya mahugurwa agamije gufasha abaturage kwibona mu butumwa bwo kugarura amahoro.”

Amasomo ku mikoranire ikwiye kuranga igisirikare n’abasivili hagamijwe kugarura ituze ahari intambara ari gutangwa n’Ikigo cy’Igihugu cy’Amahoro, yatewe inkunga na Leta y’u Bwongereza ibinyujije mu itsinda ry’impuguke zayo zikorera mu Kigo gitera inkunga ibikorwa byo kubungabunga amahoro muri Afurika (BPST-Africa).

David Higgins, Umujyanama mu bijyanye no kugarura ituze muri BPST-EA akaba ari nawe ukuriye itangwa ry’ayo mahugurwa, yabwiye itangazamakuru ko impamvu u Bwongerereza bufatikanya n’u Rwanda kwigisha amahoro ari uko bwiyemeje gufasha Afurika y’Iburasirazuba kubaka amahoro arambye by’umwihariko igisirikare gishyira imbere gukora kinyamwuga.

Higgins agaruka ku masomo azahabwa abo basirikare, abapolisi ndetse n’abasivili asobanura ko bazasobanurirwa byimbitse ibijyanye no kubanza kumva igitera amakimbirane mbere y’uko bagira umwanzuro bafata aho baba boherejwe mu butumwa bw’amahoro.

Uyu mugabo akomeza avuga ko guhugura abasirikare, abapolisi n’abasivili mu kunoza imikoranire mu butumwa bw’amahoro bizagirira akamaro Afurika mu gihe kiri imbere; ibintu ahuza no kuba bizashimangira ukwishyira hamwe kw’ibihugu.

Ku ruhande rw’abari gukurikirana amahugurwa ku mikoranire ikwiye kuranga igisirikare n’abasivili hagamijwe kugarura ituze ahari intambara, bahuriza ku kuvuga ko bayitezeho kuzabafasha kunoza ubutumwa bw’amahoro bazoherezwamo n’ibihugu byabo.

Maj Mercy Mahe Ruhinda, umugore wo mu gisirikare cya Uganda (UPDF), agira ati “ni ingenzi kuba tugiye kwigira hamwe imibanire ikwiye kuranga abasivili n’abasirikare mu butumwa bw’amahoro, ni ingenzi kuri njye kuko ndahamya ko bizamfasha kubahiriza neza akazi kanjye nindamuka noherejwe mu butumwa bw’amahoro mu mahanga.”

CIP Antoine Gasasira wo mu gipolis cy’u Rwanda akaba yarigeze kujya mu butumwa bw’amahoro, ahereye ku byo yabonye mu ishyirwa mu bikorwa ry’ubwo butumwa ahamya ko guhugurira hamwe abasirikare, abapoli n’abasivili bizafasha guhashya ibibazo birimo ihohoterwa rikorerwa abagore n’abana mu butumwa bw’amahoro nta muntu uhutajweS.

Amahugurwa ku mikoranire ikwiye kuranga igisirikare n’abasivili hagamijwe kugarura ituze ahari intambara ku ikubitiro yahawe u Rwanda na Uganda ariko biteganyijwe ko azanahabwa ibihugu 11 bihuriye ku mutwe w’Ingabo za Afurika y’Iburasirazuba zihora ziteguye gutabara aho rukomeye(EASF), bikaba biteganyijwe ko hazagenda hahugurwa ibihugu bibiri kugeza ibyo bihugu birangiye.

Muhabura.rw


Tanga igitecyerezo

Amazina
Ubutumwa

Izindi nkuru