Yashyizweho kuri13 September, 2019 | 13:43

Rusizi :Abarimu babiri bo mu kigo cy’amashuri abanza barwaniye imbere y’abanyeshuri bigisha

Tariki 11 Nzeri 2019,abarimu babiri b’abagore bigisha mu kigo cy’amashuri abanza cya Rugabano giherereye mu murenge wa Nkanka mu karere ka Rusizi, barwaniye imbere y’abanyeshuri bigisha kandi bashinzwe guha uburezi n’uburere buhamye bwuje ikinyabufura.

Abarwanye ni Clementine na Justine aho bivugwa indwano yaturutse ku bwumvikane bucye buri muri iki kigo aho hari amatsinda abiri y’abarimu bamwe bari ku ruhande rw’umuyobozi w’ikigo n’urundi rwigumuye ku muyobozi w’ikigo.

Ibi byabaye intandaro y’ubwumvikane bucye bw’abo barimu maze barwanira imbere y’abana bashinzwe gutoza umuco ndetse n’imyitwarire myiza ivanze n’ikinyabufura.

Umwe mu barimu wari aho ibyo byabereye yabwiye Muhabura.rw ko yagiye kubona abona barafatanye.

Ati:"Nabonye basumirana bararwana kugeza ubwo duhuruye turabakiza ariko mu by’ukuri ntibadutangarije icyo bapfa."

Yakomeje avuga ko iyo ari imyitwarire idakwiriye abarezi ndetse ko iyo atari indangagaciro igaragaza umurezi agomba kwitwararika no kuba bandebereho mu buryo bugaragara.

Ku murongo wa Terefoni igendanwa,umuyobozi w’Akarere ka Rusizi,Kayumba Ephrem yahamije iby’aya makuru avuga ko akimara kubyumva yohereje ubuyobozi bw’umurenge n’inzego zishinzwe umutekano.

Yagize ati:Icyo kibazo twarakimenye ariko nta byinshi nakivugaho kuko twatumye uhuyobozi bw’umurenge n’izindi nzego kandi twahawe raporo ko cyakemutse neza."

Mu bahuruye harimo ubuyobozi bw’umurenge wa Nkanka burimo uwushinzwe aburezi n’umunyamabanga nshingwa bikorwa w’umurenge, Antoinette ndetse n’inzego zishinzwe umutekano Polisi na DASSO.

Nyuma y’uko ubuyobozi bw’umurenge busesenguye iki kibazo, bwasanze intandaro ari amacakubiri yatewe nuko icyo kigo cyacitsemo ibice bibiri bityo bituma ubwumvikane buba buke bigera aho abo barimu barwanira imbere y’abanyeshuri.

Umunyamabanga nshingwabikorwa w’umurenge wari waje gukemura icyo kibazo, yatunze agatoki ubuyobozi bw’ikigo kuba inyuma y’aya makimbirane ndetse no kurebera bikagera aho abarimu barwana.

Umuyobozi w’umurenge ati:"Birababaje kumva ikibazo kigera kuri uru rwego kandi ubuyobozi bw’ikigo buhari ndetse bubirebera maze bukemera ko ikigo gicikamo ibice bibiri."

Hafashwe ingamba zikomeye aho bategetse umuyobozi w’ikigo ndetse nabo barimu barwaniye mu kigo kwandika amabaruwa yemera icyaha kandi anasaba imbabazi ku makosa bakoze.

Ikindi basabye abarimu bose kugandukira ubuyobozi bw’ikigo,gusangirira hamwe ifunguro rya saa sita ndetse no gukorera ikiruhuko hamwe baganira bityo bakirinda ikibatandukanya.

Denis Fabrice Nsengumuremyi/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru