Yashyizweho kuri5 February, 2019 | 18:34

Polisi Mpuzamahanga nayo yatangiye guhigisha uruhindu abahungabanya umutekano w’u Rwanda ngo batabwe muri yombi

Umuyobozi Mukuru wa Polisi y’u Rwanda, IGP Dan Munyuza, yatangaje ko u Rwanda ruri gukorana bya hafi na Polisi Mpuzamahanga (Interpol) kugira ngo hatabwe muri yombi abakekwaho kuba inyuma yo guhungabanya no gushaka guhungabanya umutekano w’u Rwanda.

Ibi ni abyatangajwe mu kiganiro IGP Munyuza yagiranye n’abanyamakuru kuri uyu wa Kabiri tariki ya 5 Gashyantare nyuma yo gufungura ku mugaragaro inama nyafurika ya Interpol, aho yemeje ko impapuro zatanzwe ariko yirinda gutangaza amazina kuko hari abagikorwaho iperereza.

IGP Munyuza yavuze ko izo mpapuro zamaze gushyikirizwa Interpol kugira ngo ifashe u Rwanda mu kubashakisha.

Yagzie ati “Ku bijyanye n’abantu bashyiriweho impapuro bashaka guhungabanya umutekano w’igihugu cyacu ni ukuri, hari abo Interpol yamaze gushyira ku rutonde ngo nibagaragara bafatwe.”

Yakomeje agira ati“Hari abandi dukomeje gusaba Interpol ngo bafatwe bakoze ibyaha hano, bahungabanyije umutekano w’igihugu cyacu bagira uruhare mu rupfu rw’abaturage bacu b’inzirakarengane, ni ngombwa ngo bafatwe bisobanure kuri ibyo byaha.”

Gusa nubwo IGP Munyuza atatangaje amazina y’abashakishwa cyangwa umubare w’impapuro zatanzwe, yavuze ko harimo abakekwaho uruhare mu guhangabanya umutekano mu turere tumwe na tumwe tw’igihugu.

Ati “Nk’abantu bagiye bavugwa mu bikorwa bihungabanya umutekano wacu bamwe usanga banafatanyije cyangwa banavugira iyo mitwe. Mwagiye mubyumva hambere abahungabanyaga umutekano mu gihugu cyacu mu turere duhana imbibi n’ibindi bihugu muzi. Umunsi bafashwe bagashyikirizwa inkiko twese tuzabimenya.”

Abo yashatse kuvuga nubwo atahishuye neza ariko abagiye bahungabanya umutekano mu gihugu harimo Sankara wigeze kwigamba ibitero byagabwe i Nyabimata umwaka ushize.Ubwo rero ntawashidikanya ko Sankara nawe arimo mu bashakishwa na Polisi mpuzamahanga ngo nawe atabwe muri yombi.

Sankara ni umuvugizi w’inyeshyamba ziyise FLN ukorana n’ishyaka MRCD ryiganjemo abiyomoye kuri FDLR.

Uwo mutwe ni nawo wigambye ibitero byagabwe mu turere dukikije ishyamba rya Nyungwe mu Ntara y’Amajyepfo umwaka ushize.

Naho Kayumba Nyamwasa wigeze gukatirwa n’urukiko rwa Gisirikare imyaka 24 mu mwaka wa 2011 adahari nyuma yo guhamwa n’ibyaha birimo gushinga umutwe w’iterabwoba no guhungabanya umutekano w’igihugu,nawe ntakabuza ari mu bari guhigishwa uruhindu.

Nyuma y’aho nanone yongeye gushyirirwaho izindi mpapuro zimuta muri yombi kubera uruhare akekwaho mu guhungabanya umutekano w’u Rwanda no kuyobora ibitero bya grenade zahitanye abaturage mu Mujyi wa Kigali mu mwaka wa 2013.

Ni mugihe kandi hari Raporo y’impuguke za Loni iheruka gusohoka mu mpera z’umwaka ushize mu kwezi k’Ukuboza , ivuga ko mu misozi ya Bijombo muri Kivu y’Amajyepfo hari umutwe w’inyeshyamba zigamije guhungabanya umutekano w’u Rwanda uyobowe na Kayumba Nyamwasa.

Umunyamabanga mukuru wa polisi mpuzamahanga Jürgen Stock na IGP Dan Munyuza mu kiganiro n’itangazamakuru

SOMA INKURU BIFITANYE ISANO:http://muhabura.rw/amakuru/politiki/Cyera-kabaye-Sankara-na-Rusesabagina-nabo-bashyiriweho-impapuro-zo-kubata-muri-yombi

Yanditswe na Habarurema Djamali


Tanga igitecyerezo

Amazina
Ubutumwa

Izindi nkuru