Yashyizweho kuri5 August, 2017 | 04:03

Perezida Paul Kagame yatorewe kuyobora u Rwanda

Umukandida wa FPR Inkotanyi Perezida Paul Kagame yatorewe kuyobora u Rwanda muri manda y’imyaka irindwi iri imbere , yashimiye buri wese wamufashije muri uru rugendo ahereye ku muryango we n’abandi bateguye ibikorwa byo kwiyamamaza.
Yatangiye agira ati:

“Ndagira ngo mpere ku bo turi kumwe hano, bafashije ku buryo bw’umwihariko mu gikorwa cyo kwamamaza no mu gikorwa cy’amatora yarangiye ibisigaye bikaba ari ukubara amajwi ubwo nabyo bikaba biri hafi kurangira.

Ibyo bamaze kutugezaho ni uko FPR Inkotanyi yatsinze amatora ubwo rero ndashimira cyane abayobozi, abayoboke, intore z’umuryango FPR Inkotanyi mwese ndabashimiye cyane.

Intsinzi ni iyanyu, ni amateka asanzwe ya FPR Inkotanyi ihangana n’ibibazo yahanganye n’ibibazo byinshi ariko tukaba dukomeza gutera imbere tukaba tugejeje aha tuhigejeje ndetse tuhagejeje n’igihugu cyose dufatanyije.

Nashimiye abayobozi, nashimiye, abayoboke namwe mwese FPR inkotanyi aba kabiri nkurikijeho ni abandi banyarwanda bose nabo twafatanyije. Ari imitwe ya politiki yindi umunani, izwi twavuze, twamamaje hamwe, ndabashimiye cyane ndetse nshimiye n’abandi bagiye muri iki gikorwa cy’aya matora amapariti abiri n’abayoboke bayo nabo ndabashimiye ko bagerageje.

Ntabwo nakwibagirwa gushimira umuryango wanjye nabo ni Inkotanyi. Abana b’inkotanyi nabo abari arizo, ndakurikizaho gushimira hari abantu bari hano batari bake baduherekeje aho twagiye hose ndetse nta nubwo basize imiryango yabo inyuma nabo bazanye n’imiryango yabo aho tugiye hose buri karere nabo babaga bahari, ndabashimiye cyane.

Muri bo hari abikorera ku giti cyabo, ndagira ngo nshimire abo bikorera batanze umusanzu munini watumye amatora ashoboka, akagenda neza, ntabwo twigeze tubura amikoro kubera bo kubera n’abanyamuryango bandi mwese, abanyamuryango ba FPR Inkotanyi muri hano.

Ndagira ngo na none nshimire cyane, hari abana, hari abasore n’inkumi bateguye ibikorwa byose kuva aho byatangiriye kugeza n’uyu munsi. Urebye uko ibintu byari biteguye, kuva bigitangira kugeza n’ubu, ahantu twahuriraga n’abantu benshi, ibihumbi byinshi, amagana ariko ugasanga byateguwe neza; ababyeyi barafashwa, abana barafashwa, abakuru n’abandi ibintu byose biri ku murongo, uwarwaye agahabwa umuti, ufite inyota agahabwa amazi mbese mu buryo bw’imitegurire ntacyo umuntu yabanenga, mwarakoze cyane.

Abo ni abahungu n’abakobwa b’imyaka 18,20, 25, 30 abo nibo bakoze ibi byose mureba, ndabashimira n’abari babayoboye.

Ntabwo nakwibagirwa gushimira abahanzi, abaririmbyi, batubaye hafi igihe cyose ahari imbeho bakatumara imbeho, ahari hashyushye bakahashyusha kurusha.

Hari ndetse n’abanyamakuru baba abo mu gihugu, abo hanze, baba abo bose bakora imirimo itandukanye, abafotora, abakoresha imbuga nkoranyambaga ndetse ibyabaga byose muri iki gikorwa cy’amatora nta hantu bitabaga bigera ku isi muri uwo mwanya bibereyeho.

Ahasigaye rero ngira ngo amateka atugejeje hano nayo murayazi. Urareba imyaka irindwi ishize igikorwa nk’iki nacyo cyarabaye kigenda neza ubu ndetse cyabaye neza kurushaho ariko ntabwo icyo gihe byari byateguwe ko ibintu bizakomeza nkuko byagenze ubu.

Hagati aho, abanyarwanda bose benshi, duhereye ku masinyatire miliyoni enye zirenga, ukagera kuri referendumu bikagera no kuri FPR ubwayo aho byose byaganishaga kandi byemezaga gusaba ko nkomeza njyewe kubabera umuyobozi.

Nabwiye abantu ubushize ko iyo bitaza kuba, njye nta kibazo nari mfite cyo gukomeza uko byateguwe bikagenda uko ariko kose mubishaka bikajya no ku bandi banyarwanda dushobora kujya inyuma bakatubera abayobozi.

Ni ukuvuga ngo njye ndi hano kubera ko nubahirije ibyo nasabwe namwe ndetse uyu munsi mukaba bigaragara ko mwabyemeje. Byari nko kuvuga ngo nubw ndetse icyo nabonye njye turi mu gihe cyo kwiyamamaza ’ibyabaye mu matora, bisa n’aho icyo gikorwa cyo kugira ngo nkomeze mbabere umuyobozi cyavuzwe ho byinshi cyane cyane n’abo hanze ubwo banengaga icyo abanyarwanda bahisemo gukora. Muri ibi bikorwa tugenda tuvamo, bisa n’aho abanyarwanda babyerekanye ko byari byo bitari ibintu byo kunyura iruhande gusa.

Akazi ubu kagiye gutangira na none nkuko twari dusanzwe tugakora, ubu ni imyaka irindwi yo gukomeza kwita ku bibazo dufite nk’u Rwanda, byugarije abanyarwanda ndetse birimo gukomeza k’umunyarwanda, aba umunyarwanda, ko tudaharanira kuba ikindi kintu kitari umunyarwanda ahubwo dushaka kuba umunyarwanda muzima wigeza kuri byinshi uko tubyifuza,

Bantu mwese muri hano njye numva igikorwa nk’iki kiba kiremereye tujye tugitwara nk’ikiremereye cyane cyane ko demokarasi yacu n’ubumwe gukomeza kubitsindagira ni ikintu ubwacyo kiremereye, tujye tubifata nk’ikintu dutekereza buri munsi kandi dukora tuganishaho buri munsi.
Ndagira ngo nsoze mbashimira”

Komisiyo y’Igihugu y’Amatora yagaragaje ko Umukandida w’Umuryango wa FPR Inkotanyi Paul Kagame ari we ukomeje kuza ku isonga mu majwi y’agateganyo kuri 40%. y’amajwi imaze kwakira kugeza ubu

Mu gihe igikorwa cyo gutangaza amajwi kigikomeza, Paul Kagame mu turere hafi ya twose yaje hejuru ya 98%.

Nkuko bigaragara muri rusange, Umukandida Mpayimana Philippe akomeje kuza imbere ya Frank Habineza ku ku majwi y’uturere amaze gutangazwa.

Mu majwi y’agateganyo kuri 40% mu Karere ka Kicukiro, Paul Kagame yatowe na 48489 =97.6%, Habineza atorwa na 403 (0.81%) naho Mpayimana Philippe atorwa na 478 (0.96%).

Mu Karere ka Kirehe, Paul Kagame yatowe n’abaturage 22956 =99.22%, Frank Habineza 17 =0.07% naho Mpayimana atorwa na 133 =0.57%.

Perezida Kagame yiyamamazaga ku mwanya w’Umukuru w’Igihugu ari kumwe n’abandi bakandida babiri aribo: Frank Habineza uyobora Ishyaka rya Green Party na Mpayimana Philippe wari umukandida wigenga.

Akarere ka Ngoma

Paul Kagame: 106674 = 98.77%
Frank Habineza: 102 = 0.09%
Phillipe Mpayimana: 1109 = 1.03%

Akarere ka Musanze

Paul Kagame: 16350 =98.84%
Frank Habineza: 35 =0.21%
Phillipe Mpayimana: 133 =0.8%

Akarere ka Burera

Paul Kagame: 219822 =98.75%
FrankHabineza: 606 =0.27%
PhillipeMpayimana: 1622 =0.73%

Ukurikije ubwitabire bw’abantu bitabiraga ibikorwa byo kwiyamamaza, Kagame Paul niwe wari ushyigikiwe n’Abanyarwanda ibihumbi n’ ibihumbi ku buryo byagaragariraga buri wese ko ari we uzegukana itsinzi mu matora y’Umukuru w’igihugu.

Akarere ka Bugesera

Paul Kagame: 49394 =99.02%
Frank Habineza: 99 =0.2%
PhillipeMpayimana: 287 =0.56%

Akarere Nyarugenge

Paul Kagame: 17119 =99.63%
Frank Habineza: 5 =0.03%
Phillipe Mpayimana: 9 =0.05%

Akarere ka Kicukiro

Paul Kagame: 48489 =97.6%
Frank Habineza: 403 =0.81%
PhillipeMpayimana: 478 =0.96%

Perezida Kagame wari washoje manda ya kabiri yemererwaga n’Itegeko Nshinga, yaje gusabwa n’Abanyarwanda barenga miliyoni 4 kuzongera kwiyamamaza aho babigaragarije mu gikorwa cy’itorwa rya referendumu cyabaye mu mpera z’umwaka ushize.

Yanditswe na Chief editor/Muhabura.rw


Tanga igitecyerezo

Amazina
Ubutumwa

Izindi nkuru