Yashyizweho kuri7 May, 2019 | 19:25

Perezida Kagame yagaragaje icyatumye igihugu kigera ku iterambere gifite magingo aya

Perezida Paul Kagame yavuze ko gukora cyane kw’abanyarwanda ari kimwe mu byatumye bongera gusana igihugu,ndetse kandi banabigeraho bafatanyije n’abandi ngo babashe kurenga ibihe bitoroshye igihugu cyaciyemo.

Ibi umukuru w’igihugu yabigarutseho kuri uyu wa Kabiri tariki 7 Gicurasi 2019 mu kiganiro yagiranye n’itsinda yakiriye ry’abagize Umuryango w’abayobozi bakiri bato, Young Presidents’ Organization, baturutse muri Australia.

Young Presidents’ Organization,ni umuryango mpuzamahanga ugizwe n’abayobozi b’ibigo bitandukanye bagera ku 27 000 baturuka mu bihugu 130 ku isi.

Muri iki kiganiro Perezida Kagame yababwiye ko kugira ngo u Rwanda rwongere kwiyubaka nyuma ya Jenoside yakorewe Abatutsi mu 1994, byasabye Abanyarwanda gukora cyane, bakongera gusana igihugu cyari cyarangiritse.

Ati “Kugera aha byasabye abanyarwanda gukora cyane,bafata utuntu duto bakatwegeranya ariko byanasabye no gufatanya n’abantu bakoranye n’u Rwanda. Ni uko igihugu cyabashije gukomeza kubaho ndetse kikagera ku iterambere dufite uyu munsi.

Perezida Kagame yavuze ko muri uru rugendo, u Rwanda rukomeza kugenda rwiga amasomo kandi ko rutari rwonyine mu bibazo ruhura nabyo.

Yakomeje ati “Ibyo bitanga amasomo ko gukorera hamwe ari ibintu byangombwa kandi ubufatanye ari ingenzi.

Naho ku miyoborere, Perezida Kagame yavuze ko aho ari byatewe n’Abanyarwanda.

Ati“Ndi hano kubera abanyarwanda kandi mfatanya nabo mu kubaka.Iyo hari icyo uri kubaka wishimira iterambere n’urambe bwacyo.”

Yakomeje avuga ko imiyoborere myiza ikwiye kuba itagira uwo iheza, kandi nta kintu na kimwe abaturage bakwiye gufata nk’igihora gutyo. Yashimangiye ko batanakwiye gucika intege, ko n’iyo hari ibigoranye haba hari uburyo bwo kubirenga.

Yanditswe na Habarurema Djamali


Tanga igitecyerezo

Ibitekerezo


Tanga igitekerezo


Izindi nkuru