Yashyizweho kuri8 August, 2019 | 13:39

Perezida Kagame nawe yavuze ku irindimuka ry’ururimi rw’ikinyarwanda muri iyi minsi

Perezida wa Repubulika Paul Kagame yavuze ko hari bamwe bahinduye imivugire y’ururimi rw’ikinyarwanda, bagira zimwe inyuguti birengagiza kuvuga bigatuma uko ijambo ryakavuzwe bihinduka ukundi.

Ibi umukuru w’igihugu yagarutseho kuri uyu wa Kane tariki 8 Kanama 2019 ubwo yasozaga ku mugaragaro icyiciro cya 12 cy’itorero indangamirwa ryabereye i Gabiro mu kigo cya Gisiriakre giherereye mu karere ka Gatsibo.

Perezida Kagame yahwituye urubyiruko kimwe n’abandi bose bakoresha Ikinyarwanda nabi kuko mu gihe badahindutse kizahinduka urundi rurimi

Ati “Kenshi nkunze kubivuga, njya numva Ikinyarwanda tuvuga twese, nitutareba neza tuzagihindura kibe urundi rurimi rutari Ikinyarwanda.

Akomeza agira ati "Yampaye iki mwabihinduye ngo ni uguhereza.Uguhereza ni ibyo mu kiriziya.Ariko guha, yampaye mwabihunduye yampereje".

Yavuze ko bamwe batakivuga neza ururimi rw’ikinyarwanda uko bikwiye aho usanga banga kuvuga ijambo uko riri ahubwo bagakuramo zimwe mu nyuguti zirigize bakarivuga ukundi.

Urugero yatanze ni ihinduka ry’igihekane ’nt’ aho cyahinduwe ’n’ ndetse n’igihekane ’shy’ cyahindutse ’sh’

Ku gihekane nt yagize ati "Ntabwo ari umunu ahubwo ni umuntu".

Naho ku gihekane shy yagize ati"Hakaba gushya,ntabwo ari ugusha.Ikintu gishya ntabwo ari ikintu gisha".

Akomeza agira ati"Bavuga gushya,ntibavuga gusha.Igihekane ’shy’ na ’sh’ biratandukanye".

Perezida Kagame yavuze ko gusigasira umwimerere w’ururimi ari inshingano ya bose anabasaba gukosora ururimi rukavugwa uko bikwiye.

Ati "Mujye mwumva ko ari inshingano zanyu kubikosora"

Yasabye abashinzwe umuco gufata iya mbere bagasigasira ururimi rw’ikinyarwanda birinda ko gikomeza gukoreshwa nabi mu buryo busa n’ubugezweho.

Ati “Ndabirekera abantu b’itorero n’abandi bashinzwe umuco, urabyumva no ku maradiyo. Ikibi cyabyo ni uko babihinduye ikintu gihanze. Ni ibigezweho, ni imvugo y’abahanzi, ibyo nimubishaka mujye mubikorera aho bikwiye ariko tuvuge ikinyarwanda.”

Iri torero ryatangiye ku wa 24 Kamena mu kigo cy’imyitozo ya gisirikare cya Gabiro mu Karere ka Gatsibo, ryitabirwa n’urubyiruko rw’abanyarwanda baba mu mahanga ndetse n’ababa imbere mu gihugu biganjemo abanyeshuri babaye indashyikirwa.

Abitabiriye ni abanyarwanda bafite imyaka iri hagati ya 18 na 35 kandi bafite ubuzima buzira umuze.

Chief Editor/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru