Yashyizweho kuri27 November, 2017 | 09:55

Nta gihugu Abanyarwanda bari bafite mbere ya 1994- Gen. Kabarebe

Minisitiri w’Ingabo Gen. James Kabarebe yabwiye urubyiruko ko mbere y’umwaka wa 1994, Abanyarwanda nta gihugu bari bafite ko ahubwo bakwiye kwishimira ko kuri ubu bagifite.

Yavuze ko impamvu Umuryango RPF Inkotanyi wafashe icyemezo cyo gutangiza urugamba rwo kubohora igihugu ari ukubera ibibazo by’ingutu Abanyarwanda babaga mu gihugu ndetse no hanze yabyo bari bafite.

Ibyo bibazo byari bishingiye ku irondakoko, irondakarere ari na byo byatumye Abatutsi bameneshwa bakajya kubi impunzi hanze y’igihugu cyabo. Ibi kandi byatumye habaho Jenoside yakorewe Abatutsi muri 1994, aho abasaga Miliyoni bishwe.

Yasabye urubyiruko ko rugomba kubakira mu byagezweho kugira ngo u Rwanda rutazigera rusubira inyuma na gato.

General Kabarebe yabibwiye urubyiruko rugize Umuryango wa RPF Inkontanyi mu nama yarwo nkuru irimo yabereye ku cyicaro gikuru cy’Umuryango i Rusororo mu Karere ka Gasabo.

Minisitiri w’Ingabo James Kabarebe, umwe mu barwanye urugamba rwo kubohora u Rwanda, avuga ko igihe urugamba rwatangiraga yari umwana uri kubyiruka ariko ngo ntibyamubujije kuba umusirikare mu gihe cy’imyaka 5 muri icyo gihe.

Yagize ati “ 99% by’abarwanye urugamba rwo kwibohora bari urubyiruko, harimo n’abasirikare bakuru bari batuyoboye. Nubwo twari urubyiruko ariko twatekerezaga mu rwego ruhanitse ariyo mpamvu twageze aho turi ubu uyu munsi.

Yavuze ko n’ubwo hari ibikwiye gukorwa hari imbogamizi z’ingutu urubyiruko rugomba guhura na zo, ndetse ngo zidakwiye kurutera ubwoba, ahubwo bagaharanisha kuzishakira ibisubizo birambye.

Muri zo hari imbugamizi yo kurinda ibyagezweho, hirindwa ko bishobora kuzasubira inyuma, na cyane ko abagize uruhare mu kongera guha u Rwanda isura bari kujya mu zabukuru.

Yagize ati “Umurage wa Nyakubahwa Perezida wa Repubulika muzawukomeza? Cyangwa mu gihe azaba ashaje muzatuma yicuza kongera kuba umusore, kongera kuba urubyiruko?

Minisitiri w’Ingabo avuga ko kurinda ibyagezweho ari ikntu gikomeye urubyiruko rugomba kuzirikana, aho bitaba bikwiye ko mu gihe kizaza byazasubira inyuma.

Yagize ati “Indi mbogamizi ibariho cyane ni ukurinda ibyagezweho, u Rwanda isi yose ibona nk’igihugu kiri mu iterambere riri mu nzira nziza, gukomeza uwo murongo bizitirirwa igihe kimwe ngo habayeho u Rwanda rwari rushatse kugira gutya ariko nyuma birananira rumera nk’ibindi bihugu? Ni nde uzabirinda? Ni twebwe nka ba SG, nka ba Muzehe Tito turimo gucyura igihe? Ni ba Gasamagera? Nta bwo byashoboka.”

Yavuze ko indi mbogamizi ari iyo kurwanya ingengabitekerezo ya Jenoside itakiri mu Rwanda ahubwo yageze no hanze yarwo bitewe n’uko abayiteguye bari mu mahanga bakiyibiba aho bajya hose.

Ati “Hari izindi mbogamizi zihoraho zitazigera zihinduka mugomba gukoreramo. Hari ingengabitekerezo ya Jenoside, yeteye Jenoside, kuba yarabaye mu Rwanda, hakaba ingengabitekerezo ikaba yarakoreshejwe nk’intwaro mu gusenya igihugu kikongera kikubakwa ntabwo twapfa kuvuga ngo turayisenyera izagende kubera ko kwica u Rwanda cyangwa kurusenya ikibishobora ni ugamo abantu ibice ni yo nzira yonyine yasenya u Rwanda, ese ingengabitekerezo yasizwe na jenoside mwiteguye gute guhangana na yo?”

Yakomeje avuga ko abacuze umugambi wa Jenoside kugeza na n’ubu imyumvire yabo itarahinduka, aho u Rwanda rudahwema guhangana na bo aho bari ku isi hose, asaba urubyiruko kwitegura guhangana na bo kugira ngo igihugu kitazongera gucikamo ibice.

Kabarebe yashimangiye ko mu byasenya u Rwanda ari igihe Abanyarwanda baba baciwemo ibice, mu gihe bitabaye ngo bazakomeza kunga ubumwe.

Aho u Rwanda ruherereye nk’igihugu ngo ni indi mbogamizi ikomeye aho bigoranye kugera ku nyanja, ndetse bikaba bisaba ko umubano n’ibihugu birukikije uba ntamakemwa.

Yagize ati “Turi igihugu gito kidakora ku nyanja kizengurutswe n’ibindi bihugu, ni ukuvuga ngo kugira ngo tugere ku byambu tugomba guca mu bihugu by’inshuti, tugomba kubana na byo neza. Tugomba kuba neza na Tanzaniya, tugomba kubana neza n’ibihugu byose duturanye byatugeza ku mazi y’inyanja y’u Buhinde mu buryo bworoshye. Ni ukuvuga ko aho dutuye hagati na ho ni imbogamizi kandi tugomba kubana na yo kandi ntihagarike umuvuduko w’iterambere ryacu.”

Avuga ko icya mbere kugira ngo izo mbogamizi umuntu ahangane na zo ari ukugira imyumvire myiza, mu gihe cyose RPF yabayeho nta gihe itagize imbogamizi, ariko ikavomamo imbaraga zo gutuma ihangana n’ibibazo.

Kabarebe yagize ati “Nta munsi n’umwe guhera urugamba rwo kubohora igihugu rutangira nta munsi n’umwe RPF itagize imbogamizi. Ni ukuvuga ko imbogamizi ari zo mbaraga zacu. Ntabwo tubona imbogamizi nk’inzitizi ahubwo duhangana na zo zikaduha imbaraga.”

Minisitiri w’urubyiruko, Rosemary Mbabazi na we yasabye urubyiruko rukwiye kubakira ko umusingi wubatswe ahasigaye rukagateza imbere Igihugu.

Kongere y’Urubyiruko ruhuriye muri RPF Inkotanyi yari yatumiwemo n’abahagarariye indi mitwe ya politiki ikorera mu Rwanda, aho na bo hari ubutumwa butandukanye batanze. Hanatumiwe kandi n’urundi rubyiruko rwo mu mitwe ya politiki iri ku butegetsi mu bihugu bitandukanye harimo Tanzaniya, Ethiopiya, Congo Brazaville ndetse na Angola.

Yanditswe Na Chief editor


Tanga igitecyerezo

Amazina
Ubutumwa

Izindi nkuru