Yashyizweho kuri4 January, 2017 | 23:25

Musanze: Guverineri Musabyimana yasabye urubyiruko rw’Idini ya Isilamu kugira uruhare mu gukumira ibyaha

Umuyobozi w’Intara y’Amajyaruguru, Musabyimana Jean Claude yasabye urubyiruko rw’Idini ya Isilamu kwirinda ingengabitekerezo y’ubutagondwa n’ubuhezanguni, ndetse n’ibindi byaha muri rusange; kandi bakagira uruhare mu kubikumira; batanga amakuru atuma biburizwamo no gufata ababikoze.

Ubu butumwa yabutanze ku itariki 3 Mutarama uyu mwaka mu muhango wo gusoza amahugurwa y’icyumweru y’urubyiruko rw’iri Dini rwo mu karere ka Musanze yatangiye ku wa 28 Ukuboza umwaka ushize; akaba yarabereye mu kagari ka Mpenge, mu murenge wa Muhoza.

Uwo muhango wo gusoza ayo mahugurwa witabiriwe na Superintendent of Police (SP) Faustin Kalimba; akaba akora mu Ishami rya Polisi y’u Rwanda rishinzwe kurwanya no gukumira ibikorwa by’iterabwoba, na Mufti w’u Rwanda, Sheikh Salim Hitimana.

Mu butumwa yagejeje kuri urwo rubyiruko rwageraga kuri 300 , Guverineri Musabyimana yagize ati,"Muri amaboko y’igihugu. Imbaraga zanyu mukwiye kuzikoresha mu bibateza imbere, ibiteza imbere imiryango yanyu ndetse n’igihugu muri rusange. Murasabwa kwirinda ibyaha by’uburyo bwose, kandi mukagira uruhare mu kubirwanya mutungira agatoki inzego zibishinzwe abo mubikekaho."

Umuyobozi w’iyi Ntara yongeyeho ati," Umutekano ni inkingi ya mwamba y’iterambere rirambye. Buri wese afite inshingano zo kubungabunga no gusigasira ibyo igihugu kimaze kugeraho agira uruhare mu gukumira no kurwanya icyo ari cyo cyose cyawuhungabanya."

SP Kalimba yabwiye urwo rubyiruko ati, "Uko isi irushaho gutera imbere, ni ko ibyaha birushaho kwiyongera; kandi ababikora bifashisha ikoranabuhanga mu kubitegura ndetse no kubikora. Bimwe mu bikorwa harimo gucengeza mu bantu; cyane cyane mu bayoboke b’Idini ya Isilamu ingengabitekerezo y’ubutagondwa n’ubuhezanguni no kubashishikariza kubyishoramo babakangurira gukora ibikorwa by’iterabwoba binyuranye bihitana abatari bake mu bihugu bitandukanye ku isi. Murasabwa kubigendera kure, kandi mugire uruhare mu kubikumira mu gihugu cyacu, mutanga amakuru yerekeye abo mubikekaho."

Yasabye kandi urwo rubyiruko kutishora mu biyobyabwenge birimo urumogi n’inzoga zo mu masashe nka Blue Sky, Kitoko na Chief Waragi, ndetse n’iz’insukano nka Kanyanga; kandi bakagira uruhare mu guca itundwa n’ikoreshwa ryabyo babwira inzego zibishinzwe ababyishoramo.

Mu ijambo rye, Sheikh Hitimana yasabye urwo rubyiruko kurangwa n’umuco wo gukunda igihugu, kwimakaza amahoro, kwitabira ibikorwa by’iterambere no kurwanya icyahungabanya umutekano cyose.

Mufti w’u Rwanda yabasabye gukurikiza inama bagiriwe zijyanye no kwirinda ndetse no kugira uruhare mu gukumira ingengabitekerezo y’ubutagondwa n’ubuhezanguni, ndetse n’ibindi byaha muri rusange.via:RNP

Yanditswe na Niyomugabo/MUHABURA.RW


Tanga igitecyerezo

Amazina
Ubutumwa

Izindi nkuru