Yashyizweho kuri18 October, 2019 | 08:39

Mu byo musabwa ni ugukorera igihugu cyacu, nk’abayobozi mubonye amahirwe- Perezida Kagame

Perezida Paul Kagame yabwiye Abasenateri, Abayobozi b’Urwego rw’Igihugu rw’Imiyoborere, RGB, ndetse n’Umuyobozi w’Umutwe w’Ingabo zirwanira mu kirere barahiye ko ubuyobozi butanga ububasha, bakaba basabwa kubukoresha neza, kuko ngo ari bwo inshingano barahiriye bazazisoza neza.

Ibyo Perezida Kagame yabivugiye mu Nteko Ishinga Amategeko mu gikorwa cyo kwakira indahiro z’Abasenateri bagera kuri 20 baje mu mutwe wa Sena muri manda ya gatatu.

Uretse abo basenateri, harahiye n’Umuyobozi Mukuru w’Urwego rw’Igihugu rw’Imiyoborere Dr. Uster Kayitesi na Dr. Nibishaka Emmanuel umwungirije hamwe na Maj. Gen. Emmanuel Bayingana washinzwe kuyobora umutwe w’Ingabo zirwanira mu kirere.

Mu butumwa bw’Umukuru w’Igihugu yashimye akazi keza kakozwe na Sena icyuye igihe, yibutsa ababasimbuye ko ari byo bagiye gukomeza kubakiraho kuko ari bwo u Rwanda ruzatera indi ntambwe.

Ati: “Mu byo musabwa ni ugukorera igihugu cyacu, nk’abayobozi mubonye amahirwe n’ishema, ubuyobozi butanga ububasha kandi murasabwa gukoresha neza ububasha muhawe, kuko ari bwo muzasoza neza inshingano zanyu.

Ababatoye hari ibyo bashingiyeho birimo ubunararibonye n’ubumenyi mufite hamwe n’ubunyangamugayo, ubushobozi bwihariye mufite, byose mubikoreshe maze mwegere abaturage mumenye uko babayeho kugira ngo imibereho myiza yabo irusheho kuba myiza.”

Ku ngingo y’umutekano n’imiyoborere, Perezida Kagame yavuze ko ibyo abantu bakora byose ariho bishingiye. Ati: “Umutekano rero, inshingano y’umutekano ni iya buri wese, twese, abarahiye. Abari hano, abanyarwanda rero hari byinshi babatezeho kandi muharanire gukoresha neza amahirwe mubonye ushobora kuyabona ukayakoresha nabi”.

Nyuma yo kurahira habayeho amatora y’abagize Biro Nyobozi ya Sena, maze Iyamuremye Augustin atorerwa kuyobora umutwe wa Sena n’amajwi 25 atsinze Senateri Kalimba Zephrin, mu gihe ku mwanya wa Visi Perezida ushinzwe imari n’abakozi hatowe Dr. Mukabaramba Alvera, n’amajwi 22. Ku mwanya wa Visi Perezida wa Sena ushinzwe ibijyanye n’amategeko no kugenzura ibikorwa bya Guverinoma, hatowe Nyirasafari Esperance.

Chief editor MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru