Yashyizweho kuri30 December, 2016 | 16:55

Mme Ingabire yasobanuye impamvu itera umuturage kwakwa no gutanga ruswa

Umuryango ushinzwe kurwanya ruswa nk’akarengane, Transparency Internation Rwanda ufatanyije na Police y’ u Rwanda batangije ubukangurambaga bwiswe “Service Charter” buzaba bugamije gukangurira abantu kumenya uburenganzira bwabo mu nzego z’Ubugenzacyaha.

Ingabire Marie Immculee uyobora uyu muryango urwanya ruswa avuga ko iyo umuturage adahawe serivisi vuba bishobora kumutera umutima wo gutanga ruswa.

Transparency International Rwanda isaba Abaturage guharanira uburenganzira bwabo mu mitangire ya za Serivisi, ikavuga ko iyo umuntu amenye ibyo inzego za Leta zimugomba atajya yijandika mu bikorwa byo gutanga ruswa.

Ingabire Marie Immculee uyobora uyu muryango avuga ko muri iyi gahunda, ku biro byose bya police hazashyirwa inyandiko igaragaza ibyo abaturage bagomba gukorerwa nta mananiza n’ibyo na bo bagomba kubahiriza.

Ati “ Umuturage iyo ataboneye Servisi vuba aho agomba kuyibonera, usanga ari ho hava urwikekwe, ni naho umuntu ashobora gushora Polisi muri Ruswa.”

Marie Immaculee yakomeje avuga ko ‘Servisi Charter’ ngo izanye igisubizo cy’ibyari byarananiranye.

Avuga ko bamwe mu baturage bakoraga amakosa cyangwa bakayakorerwa kubera kutamenya imbaraga baba bafite imbere y’inzego baba barishyiriyeho.

ACP Celestin Twahirwa ushinzwe ibikorwa bihuriweho na police n’abaturage (Commuty Policing) avuga ko ‘Service Charter’ izafasha police y’u Rwanda kumenyesha inshingano n’ububasha by’ubugenzacyaha.

Ati “ Service Charter yaje kugira ngo Abagenzacyaha bakore akazi kabo neza, batange service neza , ikagera ku bantu bose bayikeneye, kuko iyo ni inshingano kandi ikomeye bagomba gukora kugira ngo igere ku bantu bose bayishaka.”

ACP Celestin Twahirwa avuga ko Abagenzacyaha basabwa kubahiriza neza icyo bashinzwe , ndetse bakanerekwa ingaruka zo kutubahiriza inshingano zabo.

Polisi ivuga ko ku mwaka bashyikiriza Ubushinjacyaha dosiye zirenga ibihumbi 20 z’abakekwaho ibyaha. Avuga ko hari n’abandi baha inama mu gukumira ibyaha bitari batarabishyira mu bikorwa

Polisi ivuga ko nta mwaka ushira hatagaragaye abapolisi bafatirwa muri cyaha cyo kwakira ruswa. Ubu bukangurambaga buzamara ukwezi.
Mme Ingabire Marie Immacule n’Umuyobozi wa Polisi y’u Rwanda IGP Gasana Emmanuel

Yanditswe na Ubwanditsi/MUHABURA.rw


Tanga igitecyerezo

Amazina
Ubutumwa

1 Comment

Edison - 3 months ago

Very nice post. I just stumbled upon your blog and wanted to say that I’ve really enjoyed browsing your blog posts.
After all I will be subscribing to your feed and I hope
you write again very soon!

my page - info polisi

Izindi nkuru