Yashyizweho kuri26 February, 2020 | 08:35

Minisitiri Shyaka yihanangirije abayobozi n’abaturage bigira indakoreka

Minisitiri w’ubutegetsi bw’Igihugu Prof. Shyaka Aanastase yifatanyije abaturage bo mu Murenge wa Rukomo mu Karere ka Gicumbi, abasaba kugabanya gukunda imanza, guharika no gukubita abagore.

Iyi nteko y’abaturage yitabiriwe n’ababarirwa mu magana yateraniye mu kagari ka Cyeya yitabiriwe kandi n’abaturage bo mu tugari twa Gisiza, Kinyami, Cyuru, na Mabare.

Muri iyi nteko y’abaturage yibanze cyane ku kumva no gukemura ibibazo by’abaturage, hagaragaye umurongo munini w’abaturage bafite ibibazo bitandukanye.

Nyuma yo kumva no gufatanya n’inteko mu gukemura ibibazo by’abaturage, Minisitiri Shyaka Anastase yavuze ko ibibazo byinshi bihari ahanini bishingiye ku makimbirane mu miryango, gukunda imanza n’abantu bigira indakoreka.

Abashishikariza kwirinda amakimbirane mu miryango, n’ibiyatera birimo ibiyobyabwenge, guharika n’ibindi.

Yagize ati “Mu rwego rw’ubuyobozi ntabwo turibwemere ko aya makimbirane ndetse no gukubita abo mwashakanye bikomeza, ikintu cyo guharika no kwihanira mugishyire ku ruhande. Kirazira muri uru Rwanda rw’uyu munsi guhanisha umugore inkoni.”

Minisitiri Shyaka kandi yihanangirije abayobozi n’abaturage bigira indakoreka bakarenga ku mategeko nkana kugera n’aho bigarurira n’imitungo ya Leta.

Ati “Ibyo ntabwo bishonboka mu Rwanda twifuza, abo ba kaganga turaza kuzana imbaraga z’amategeko n’izindi zose zishoboka. Turasaba Akarere kugaruza imitungo ya Leta yigaruriwe n’aba bantu ibya leta bisubizwe leta, iby’abigira ba kaganga byararangiye mu gihugu cyacu.”

Yongeraho ati “Turashaka ko abaturage bubahiriza amategeko, tukubaha ubuyobozi bwose, tukihesha agaciro, tugaharanira kugira igihugu cyiza, kandi tugakomeza kwimakaza isuku n’umutekano.”

Minisitiri Shyaka kandi yasabye abaturage kwirinda umuco wo kuburana urwa ndanze kuko guhora mu manza bibadindiza mu iterambere kuko bituma batabona umwanya wo gukorera ingo zabo ngo biteze imbere.

Abaturage bamuhigiye gukemura ibi bibazo bikidindiza iterambere ryabo bitarenze amezi atanu; Hanyuma nawe abasezeranya kubakorera ubuvugizi ku kibazo cy’amazi n’amashanyarazi.

Chief editor \Muhabura.rw


Tanga igitecyerezo

Ibitekerezo


Tanga igitekerezo


1 Comment

MANIRAGUHA Ladislas - 1 month ago

Nibyo rwose, abayobozi ntibabereyeho kutugezaho gahunda za Leta gusa ahubwo harimo no kutugira inama mu mibereho yacu ya buri munsi ariko nabo birinda kuyoborera munyungu zabo bwite kuko hari aho usanga umuyobozi yarigwijeho ibya rubanda, bityo akaba agomba kubyamburwa bigasubizwa bene byo mu rwego rwo kurwanya IHEZANDONKE.

Izindi nkuru