Yashyizweho kuri12 March, 2019 | 21:27

Kenyatta ibyo kuba umuhuza w’u Rwanda na Uganda ntibiri kuri gahunda-Nduhungirehe

Umunyamabanga wa Leta muri Minisiteri y’Ububanyi n’amahanga Ushinzwe Umuryango wa Afurika y’Iburasirazuba, Nduhungirehe Olivier, yavuze ko mu ruzinduko Perezida Uhuru Kenyatta yagiriye mu Rwanda, yamenyeshejwe uko ikibazo hagati y’u Rwanda na Uganda gihagaze, ariko atagiye kuba umuhuza.

Kuri uyu wa Mbere nibwo Perezida Kenyatta yagiranye ikiganiro na Perezida Kagame ndetse ageza ijambo ku bayobozi bari mu mwiherero mu Kigo cy’imyitozo cya Gisirikare cya Gabiro. Yahitiye i Kampala aganira na Perezida Yoweri Museveni ku biro bye i Entebbe.

Ni ingendo yakoze mu gihe umubano w’ibihugu byombi utifashe neza, aho u Rwanda rushinja Uganda gushyigikira abagamije kuruhungabanyiriza umutekano no guhohotera abanyarwanda, bagatabwa muri yombi ku mpamvu zitumvikana bagakorerwa iyicarubozo.

Mu kiganiro n’abanyamakuru kuri uyu wa Kabiri, Nduhungirehe yavuze ko Perezida Kenyatta yahuye na Kagame ngo baganire ku kongera umubano no guteza imbere imbere ubucuruzi, “kuko Kenya dukorana mu bucuruzi, aho u Rwanda ruyikenera mu gutumiza ibicuruzwa mu mahanga,” banaganira ku bibazo biri mu karere.

Yakomeje ati “Rwari uruzinduko rw’akazi n’icyo kibazo cya Uganda n’u Rwanda gihari, birumvikana ko Perezida wa Kenya afite inyungu mu kumva uko ibintu bihagaze ariko ibyo kuba umuhuza ntibiri kuri gahunda ubu. Yarakomeje ajya muri Uganda kumva uko ibi bintu bihagaze mu karere ariko ibyo kuba umuhuza ntabwo byari kuri gahunda.”

Nduhungirehe yagarutse ku kibazo kiri hagati y’u Rwanda na Uganda, avuga ko aho bigeze atari intambara y’amagambo ahubwo u Rwanda rwakomeje kugaragaza ibintu bitatu birubangamiye bikorwa na Uganda.

Ati “Hari abanyarwanda bafatwa bagakorerwa iyicarubozo imiryango na ambasade batazi aho bari, ntibagire icyo bashinjwa abandi bakajugunywa ku mipaka. Ni ikibazo kibangamiye uburenganzira bwa muntu n’amasezerano ya EAC y’urujya n’uruza.”

“Abagize Inzego z’umutekano za Uganda bafasha abanyarwanda bifuza guhungabanya umutekano mu Rwanda, ikindi kibazo ni ikijyanye n’ubucuruzi. Twagiye tubangamirwa rimwe na rimwe ibicuruzwa byacu bihafatirwa.”

Yavuze ko ibyo ari ibibazo biriho atari intambara y’amagambo, kuko ngo iyo iba intambara y’amagambo byari kuba ari amahire.

Chief Editor/MUHABURA.RW


Tanga igitecyerezo

Amazina
Ubutumwa

Izindi nkuru