Yashyizweho kuri4 January, 2017 | 23:49

Karongi:Hemejwe ubufatanye bw’inzego mu gukumira no kurwanya ibyaha

Mu nama y’umutekano yaguye y’akarere ka Karongi yateranye kuwa kabiri taliki ya 3 Mutarama 2017, umuyobozi w’akarere ka Karongi, Francois Ndayisaba yasabye abayitabiriye gushyira hamwe imbaraga mu gukumira no kurwanya ibyaha bigaragara mu karere ka Karongi.

Iyi nama yabereye mu kagari ka Gacaca, umurenge wa Rubengera, yari yitabiriwe n’abayobozi mu karere, barimo abakuriye imirimo itandukanye mu karere, abanyamabanga nshingwabikorwa b’imirenge n’abandi bose bagera kuri 60, abayobozi b’inzego zishinzwe umutekano muri Karongi barimo Chief Superintendent of Police(CSP) Tom Murangira, uyobora Polisi muri aka karere.

Aba bayobozi babwiwe ko muri rusange ibyaha bigenda bigabanuka ariko basabwa gukangurira abaturage bayobora gukaza amarondo kandi bakayakurikirana ngo hirindwe ubujura, banemeranywa ko bose hamwe bagiye gushyira hamwe imbaraga bagafunga ibirombe by’amabuye y’agaciro bitemewe aho biri hose kuko byangiza ibidukikije.

Mu bindi, Meya Ndayisaba yasabye abari bitabiriye inama ko bagomba gufatanya bakarwanya abacuruza n’abanywa ibiyobyabwenge byiganjemo urumogi na Kanyanga, kuko ari byo biri ku isonga mu byaha biboneka mu karere kandi ari byo nkomoko y’ibindi byaha biboneka mu karere.

Aha Ndayisaba yagize ati:”Umutekano niwo shingiro ry’iterambere, niyo mpamvu nsaba ko ubufatanye hagati y’inzego z’umutekano , abayobozi n’abaturage bwakwiyongera, bagasenyera umugozi umwe mu kuwubungabunga .”

Ndayisaba yakomeje avuga ko kubera ukuntu inzego z’umutekano kugeza ubu zikora akazi kinyamwuga, abaturage bose bagomba kuzigirira icyizere, bagafatanya nazo cyane cyane bazigezaho amakuru hakiri kare hagamijwe gukumira ibyaha.

Umuyobozi wa Polisi mu Karere ka Karongi CSP Murangira , mu ijambo rye, yavuze ko umutekano uri mu nshingano za buri Munyarwanda kandi ntawe ukwiye kurebera umuturanyi we ari mu bikorwa biwuhungabanya.

Yagize ati:"Ubufatanye n’inzego z’umutekano ni ngombwa kugira ngo hakumirwe icyo ari cyo cyose cyahungabanya ituze rya rubanda. U Rwanda ruri mu bihugu ku isi aho umuntu agenda yizeye umutekano; tugomba rero kudasubira inyuma ahubwo dufatanye muri uwo murongo."

CSP Murangira yibukije aba bayobozi ko amategeko ahana buri wese uteje umutekano muke, aha akaba yasabye abayobozi n’abaturage muri rusange kugira umuco wo gusangira amakuru ku banyabyaha n’ibikorwa byabo kandi abasaba kudahishira icyahungabanya umutekano aho yagize ati:” Iyo uhishiriye ushaka guhungabanya umutekano, nawe ubu ubaye umufatanyacyaha, hari icyo amategeko akubaza.”

Mu bindi byavuzwe ku rwego rw’umutekano, harimo kureba ko ibyambu bitandukanye biri muri Karongi bikoreshwa neza, kwibutsa abayobozi b’imirenge n’utugari kurara aho bakorera ngo bakurikirane ibikorwa by’amarondo n’ibindi.., gukumira ubujura bwa za Sacco zikomeje kwibwa n’abazikoramo kandi bakaburirwa irengero, kwihutisha gahunda zizamura imibereho y’abaturage nk’ubwisungane mu kwivuza n’ibindi,...via:RNP

Yanditswe na Niyomugabo Rorbart/Muhabura.rw


Tanga igitecyerezo

Amazina
Ubutumwa

1 Comment

Niyitegeka Eliezer - 2 months ago

Dufatanyije Twese Tugomba Kugera Kubyotwifuza Byose. Nshimira Abayobozi Bacu Inama Batugira Bakomereze Aho!!

Izindi nkuru