Yashyizweho kuri17 June, 2017 | 14:09

Imihigo FPR Inkotanyi yahigiye Abanyarwanda mu myaka irindwi

Muri Kongere ya FPR Inkotanyi yabaye kuri uyu wa 17 Kamena 2017, hamuritswe ibyo uyu muryango uzitaho mu myaka irindwi iri imbere bishimangira imibereho y’abanyarwanda mu nzego zitandukanye.

Prof Shyaka Anastase uyobora Urwego rw’Igihugu rw’Imiyoborere niwe wamuritse ibyo u Rwanda byagezeho, anavuga by’umwihariko ibyo FPR Inkotanyi iteganya mu gihe kiri imbere.

Shyaka yavuze ko mu 2010, Umuryango FPR Inkotanyi n’abanyarwanda bahisemo neza bagatorera Perezida Kagame kuyobora u Rwanda none ubu ‘amahoro arahinda mu Rwanda’ ndetse n’iterambere ‘riraza rigera ku munyarwanda wese’.

Shyaka yavuze ko mu myaka irindwi, FPR Inkotanyi yifuza ko mu myaka irindwi amafaranga umunyarwanda yinjiza yazaba yarikubye inshuro ebyiri, bikazagerwaho binyuze muri gahunda ya Made in Rwanda, ibyoherezwa mu mahanga bikazaba byarikubye.

Yavuze ko muri iki gihe ibyoherezwayo bingana na 25% ariko mu myaka itanu umuhigo ari uko bizaba bigeze ku kigero cya 75%. Mu gihe Ingengo y’Imari ya 2017/18 ingana na miliyari 2,094.9 z’amafaranga y’u Rwanda, aho muri yo 66% bingana na miliyari 1,375.4 zizaturuka imbere mu gihugu, yasobanuye ko yikubye kabiri ugereranyije n’uko yanganaga mu myaka irindwi ishize.

Mu yindi migabo n’imigabo FPR Inkotanyi iteganya kwibandaho mu myaka irindwi iri imbere, harimo by’umwihariko ibijyanye n’imibereho ya mwarimu ndetse n’abaganga aho Shyaka yikije akavuga ko aba bombi bakwiriye imibereho inoze ku buryo bazajya batanga serivisi abanyarwanda bakanyurwa.

Shyaka yavuze ko u Rwanda rugeze mu bihugu bitanu muri Afurika bifite ubutabera bukora neza ndetse mu myaka iri imbere buzakomeza kugera kuri byose.

Ati “u Rwanda ni igihugu cyahize ibindi ku isi gushyira mu bikorwa amavugurura agamijwe kurwanya ruswa. Mu myaka nka 15 twari ibihugu nk’ibindi.”

Muri iyi kongere, Shyaka yeretse abayitabiriye amafoto agaragaza imidugudu iri kubakwa mu bice bitandukanye by’u Rwanda aho yatanze urugero ku Mudugudu wa Rweru mu Karere ka Bugesera, akavuga ko ari icyaro cy’u Rwanda kandi ikwiye kuba hose mu gihugu.

Yakomeje avuga ko mu myaka irindwi, hahizwe ‘kuzamura umunyarwanda kugira ngo azabe afite ubushobozi, afite akazi, afite ubumenyi, ari mu muryango utekanye’.

Yongeraho ati “ Tuzubaka umunyarwanda mushya aho umutima we uzaba utembamo urukundo.”

Yanditswe na Chief Editor/MUHABURA.rw


Tanga igitecyerezo

Amazina
Ubutumwa

Izindi nkuru