Yashyizweho kuri23 May, 2019 | 09:35

Ihumana ry’umwuka duhumeka ku mwanya wa 4 mu byica abantu benshi ku isi - Dr. Vincent Biruta

Minisitiri w’ibidukikije Dr. Vincent Biruta yatangaje ko ihumana ry’umwuka duhumeka riri ku mwanya wa 4 mu byica abantu benshi ku isi. Ibi yabitangarije I Kigali mu kiganiro iyi Minisiteri k’ubufatanye na REMA byagiranye n’abanyamakuru mu rwego rwo gutegura umunsi mpuzamahanga w’ibidukikije uteganyijwe mu cyumweru cya mbere cy’ukwezi kwa kanama.

Uyu munsi mpuzamahanga w’ibidukikije uteganyijwe kuzaba taliki ya 05 kamena 2019 uzabanzirizwa n’icyumweru cy’ibikorwa bitandukanye bigamije gukangurira abantu kubungabunga ibidukikije.

Ibyo bikorwa birimo amarushanwa atandukanye mu bigo bitandukanye by’ubushakashatsi n’ikoranabuhanga, siporo rusange aho abantu bagenda n’amaguru mu rwego rwo gukangurira abantu ko bimwe mu byanduza ikirere cyacu birimo ibinyabiziga dukoresha , gutanga amashanyarazi akomoka ku mirasire y’izuba no gukangurira abantu kurushaho kwitabira uburyo bw’imitekere idahumanya ikirere hagabanywa umubare w’abacana inkwi.

Minisitiri Biruta akomeza agaragaza uburemere bw’ingaruka ziterwa no guhumeka umwuka wahumanijwe n’ikirere aho abantu miliyoni 6.5 buri mwaka bicwa no guhumeka umwuka wahumanijwe n’ikirere.

Ati: “ Ihumana ry’umwuka duhumeka riri ku mwanya wa 4 mu byica abantu benshi ku isi aho abagera kuri miliyoni 6.5 ku isi yose bapfa buri mwaka bazira guhumeka uhumanye.”

Biruta akomeza avuga ko ikibabaje ari uko 91% by’abahumeka umwuka wanduye ku isi bari mu bihugu bikiri mu nzira y’iterambere.

Min. Biruta asoza agaruka ku ngamba zafashwe mu rwego rwo kugabanya umubare w’abazira guhumeka umwuka wanduye zirimo: Kongera uburyo bw’isuzuma ku ma madoka, kugabanya imodoka mu mihanda hashyirwa imbaraga mu kongera imodoka nini zitwara abantu benshi, kugabanya umubare w’abakoresha inkwi n’amakara bagakangurirwa gukoresha gaz na rondereza no gukomeza gahunda yo guca burundu amasashe.

Uyu munsi mpuzamahanga w’ibidukikije uzaba wizihizwa mu Rwanda ku nshuro ya 9 watangiye kwizihizwa mu rwego rw’isi mu 1972 ,uyu mwaka ukazizihirizwa mu Bushinwa aho insanganyamatsiko y’uyu mwaka igaruka ku ihumana ry’ikirere.

Yanditswe na Nsengiyumva Jean Damascene


Tanga igitecyerezo

Amazina
Ubutumwa

Izindi nkuru