Yashyizweho kuri26 April, 2017 | 13:00

Ibiribwa PAM yari ishyiriye Abarundi byanzwe bigarurwa mu Rwanda

Amakamyo ya Porogaramu ya Loni ishinzwe ibiribwa (PAM: Programme Alimentaire Mondiale) yari apakiye imfashanyo ishyiriwe impunzi i Burundi, yasubijwe inyuma agaruka mu Rwanda nyuma yaho Leta y’u Burundi iyangiye. Aya makamyo yari amaze iminsi aparitse ku mupaka Gasenyi-Nemba mu ntara ya Kirundi, ku mupaka w’u Rwanda n’u Burundo.

Aya makamyo yari apakiye ibiribwa PAM yaguze mu Rwanda ikaba yari ibishyiriye impunzi z’Abanyekongo ziri mu Burundi hamwe n’Abarundi bahuye n’inzara muri iyi minsi u Burundi bwari mu bibazo by’umutekano.

PAM yatangaje ko izo kamyo zari zipakiye toni zigera kuri 500 z’imyaka yaguzwe mu Rwanda, kandi ko iyi itari inshuro ya mbere iguze ibiribwa mu gihugu cyo mu karere ikabigemura mu kindi.

Umuvugizi wa polisi y’u Burundi, OP1 Pierre Nkurikiye, aganira na BBC /Swahili, yatangaje ko ari ku mpamvu z’umutekano izi kamyo zasubijwe inyuma, yongeraho ko bizwi ko abatera u Burundi baturuka mu Rwanda, atanga urugero ku bitero byagabwe mu ntara ya Kayanza bigahitana benshi.
Ibi kandi bibaye mu gihe n’ubundi umubano w’u Rwanda n’u Burundi utari wifashe neza ndetse n’ubuhahirane bukaba bwarahagaze.

Yanditswe na Chief Editor/MUHABURA.rw


Tanga igitecyerezo

Amazina
Ubutumwa

Izindi nkuru