Yashyizweho kuri29 September, 2019 | 13:57

Gicumbi:Ba rwiyemezamirimo bari kubaka ibigega by’amazi bari kubisondeka nyuma bigasandara hadakeye kabiri

Abari kubakirwa ibibigega by’amazi mu mirenge ya Shangasha,Cyumba na Mukarange mu karere ka Gicumbi , barasaba ubuyobozi gukurikiranira hafi imyubakire yabyo ,kuko ngo birigusondekwa bigatuma nibyuzuye bidatanga amazi bakeneye .

Abagaragaza impungenge mu myubakire y’ibigega birimo gukwirakwizwa hirya no hino mu mirenge ya Gicumbi ,ni abo mu mirenge ya Cyumba, Shangasha na Mukarange.

Ni abaturage ubusanzwe batuye ahakunze kumvikana cy’amazi meza ndetse n’ibigo by’amashuri biri muri utwo duce.

Uwineza Onesphore, umuyobozi wungirije ushinzwe amasomo mu rwunge rw’amashuri rwa Cyumba, avuga ko ibigega bitanu bujurijwe ari iby’ikitiriro gusa kuko ngo 3 muri byo bidakora.

Ati"Byari byiza kubiduha icyo ni kimwe ariko kuba bidakora ni icya kabiri. Barabiduhaye ariko nti bikora hakora bibiri bitatu ntabwo bikora".

Bamwe mu batuye muri iyi mirenge bo bavuga ko mu gihe hari ibigega bimaze imyaka ibiri byubatswe, ngo aho byuzurie bahawe amazi rimwe gusa, ariko na bwo ari uko bari barimo kubisuzuma gusa.

Aha ni ho Ananias Zirimwabagabo, utuye mu murenge wa Shangasha, ahera asaba ko amakosa yakozwe mu kubaka ibyo bigega yakosorwa na bo bagahabwa amazi meza.

Ati "Bakwize ku mavomo bateguye bahe abaturage amazi.Nkubu hari aho byamaze no guturika hari aho bayafunguye bayatanga bagira ngo barebe ukabona hamwe harasandaye,byaba byarapfuye ubwo rwiyemezamirimo akabisubiramo".

Umuyobozi w’akarere ka Gicumbi, Felix Ndayambaje, ahamya ko koko amakosa nk’ayo akorwa na barwiyemezamirimo baba bahawe amasoko, bayabona.Gusa, Ndayambaje yizeza abo baturage ko akarere katazakira mu buryo bwa burundu ibyo bigega mu gihe ba rwiyemezamirimo badakosoye amakosa yagaragara mu myubakire yabyo.

Ati"Iyo utagize amaso areba no gukurikirana nk’uko tubisabwa, hari igihe habaho icyo ngicyo.Hari icyo dukora rero turagenda tukareba ibidakwiye akabikora nk’abagize iryo tsinda uko turi batatu".

Akomeza saba abaturage ndetse n’abayobozi mu nzego z’ibanze aho babonye ikibazo bakwiye kubivuga kuko ibyo biba bikorwa n’ibyabo.

Ati"Ariko nanone tugasaba abaturage aho abonye ikibazo bakivuge hakiri kare.N’abayobozi b’inzego z’ibanze guhera mu isibo kuko ibikorwa by’amajyambere bihaza ntabwo ari iby’umuntu runaka ni ibyabo.Abayedi bahakora n’abafundi igihe bari kubaka ibyo bigega ni bo.Niba kapita avuze ngo nibavange ingorofani 20 mu mufuka umwe,bagahita bavuga ngo ibyo bintu ntabwo byujuje ubuziranenge aho kugirango tubibone byakozwe turi gusenyesha wa muntu.Kuko ntabandi azana ni babaturage kandi bakaba aribo bazaba abagenerwabikorwa".

Biteganyijwe mu ngengo y’imari y’Akarere ka Gicumbi y’uyu mwaka, hazubakwa imiyoboro y’amazi 14, yose hamwe ikazuzura itwaye miliyari 5FRW.

Imiyoboro 5 muri iyo, Akarere ka Gicumbi kakaba kazayubaka ku nkunga y’Umuryango ukora ibijyanye n’isuku n’isukura, Water for People, mu gihe indi izubakwa ku bufatanye n’abandi batanyabikorwa barimo na world vision.

JPEG - 75.4 kb
Uwineza Onesphore, umuyobozi wungirije ushinzwe amasomo muri G.S Cyumba yerekana ibigega ba rwiyemezamirimo basondetse
JPEG - 93 kb
Umuyobozi w’akarere ka Gicumbi Felix Ndayambaje yizeza abaturage ko ibigega bizajya bibanza bigasuzumwa mbere y’uko bitangira gukoreshwa

Ishimwe Honore /MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru