Yashyizweho kuri15 May, 2017 | 18:45

Gen Kabarebe yavuze ko hakenewe igisubizo gihamye cy’ibibazo by’umutekano muke, muri Afurika

Kuva kuri uyu wa Mbere tariki ya 15 Gicurasi 2017, mu Ishuri rikuru ry’Igisirikare cy’u Rwanda(RDF CSC) riri mu Karere ka Musanze, hari kubera ibiganiro ngarukamwaka byiga ku bibazo bibangamiye umutekano wa Afurika muri iki gihe.

Ni ibiganiro bitegurwa buri mwaka na RDF CSC; bihuza abasirikare bakuru bo mu bihugu bitandukanye bya Afurika biga muri iryo shuri, impuguke mu by’umutekano na politiki mpuzamahanga n’abashakashatsi ku bintu bitandukanye ahanini bifite aho bihurira n’umutekano.

Kuri iyi nshuro biriya biganiro biri gukurikirwa n’abasirikare bakuru 47 harimo babiri babiri bo muri Ethiopia, Kenya, Malawi, Sudani y’Epfo, Tanzania, Uganda na Zambia n’umwe wo muri Ghana, Nigeria na Senegal. Abo basirikare bafite kuva ku ipeti rya Majoro kugera ku rya Koloneli.

Maj. Gen Jean Bosco Kazura, umuyobozi w’Ishuri rikuru ry’Igisirikare cy’u Rwanda, asobanura ko biriya biganiro biri mu mirongo migari ngenderwaho y’iryo shuri yatanzwe na Perezida Paul Kagame, Umukuru w’Igihugu akaba n’Umugaba mukuru w’Ikirenga w’Ingabo z’u Rwanda, ubwo yaritangizaga ku wa 12 Nyakanga 2012.
Insanganyamatsiko iri kuganirwaho igira iti “Imbogamizi z’umutekano muri iki gihe; harebewe kuri Afurika.”

Agaruka kuri iyo nsanganyamatsiko, Maj. Gen Kazura yabwiye itangazamakuru ko yateguwe hagamijwe kwibutsa Abanyafurika n’inzego z’umutekano zo kuri uwo mugabane ko ari bo ubwabo bakwiye kwishakamo ibisubizo by’ibibazo bitandukanye bibibasira birinda gutegereza ibisubizo ku banyamahanga.

Agira ati “Impamvu twibanze muri Afurika ni uko Abanyafurika tugomba kwitekerezaho nkatwe ubwacu; tukamenya ngo umutekano wacu uratureba nubwo n’abafatanyabikorwa bacu nabo ubareba kandi dukwiye kujya hamwe twese ngo tubone ibisubizo, ariko twebwe nk’Abanyafurika tuba dukwiye gutekereza duti ‘se ni iki kidutera ibibazo? Dukwiye kubona uko twakemura ibibazo byacu gute?’; ni nk’ibyo tuvuga mu Kinyarwanda ngo ‘Ak’i Muhana kaza kaza imvura ihise’, tukabanza tukirwaho tukamenya ngo ibibazo dufite tugomba no kubishakira ibisubizo mbere y’uko hari abandi bava ahandi kuza kudufasha.”

Maj. Gen Kazura avuga ko ibiganiro biri kuba ku bibazo bibangamiye umutekano wa Afurika muri iki gihe, bifitiye akamaro abasirikare bari kubikurikirana n’Ishuri rikuru ry’Igisirikare cy’u Rwanda muri rusange.

Agira ati “Twizeye ko ibi biganiro bizafasha bikanongerera abasirikare bacu bari gukurikirana amasomo mu gutekereza uko ibibazo bikemurwa mu buryo bwagutse mu by’umutekano kandi twizeye ko bazakuramo amasomo azabafasha mu bushakashatsi bwabo butandukanye, bikazafasha n’iri shuri mu masomo tuzatanga mu gihe kiri imbere.”

Minisitiri w’Ingabo, Gen James Kabare, afungura ku mugaragaro biriya biganiro yavuze ko umutekano w’igihugu ari inkingi n’umusingi w’iterambere kandi ko igisobanuro nyacyo cy’ubuyobozi n’ingabo z’igihugu ari “Amahoro n’umutekano” muri icyo gihugu.

Gen Kabarebe yavuze ko hakenewe igisubizo gihamye cy’ibibazo by’umutekano muke birimo imitwe yitwaje intwaro n’iterabwoba byabaye akarande mu bihugu byinshi bya Afurika, akaba avuga ko icyo gisubizo kigomba gutangwa n’Abanyafurika ubwabo kugira ngo babashe kugera ku iterambere bashaka.

Yagize ati “Ibihugu byinshi bya Afurika bikomeje kuba mu bibazo by’umutekano birimo imitwe yitwara gisirikare, iterabwoba, imiyoborere mibi, ibyaha bishya bigenda bivuka birimo ikoreshwa ry’ibiyobyabwenge n’icuruzwa ry’abantu. Ibi ni ibibazo bibangamiye umutekano w’abantu mu Karere kacu no mu bindi bice bya Afurika, bikeneye igisubizo gihamye giturutse muri Afurika ubwayo.”

Minisitiri w’Ingabo z’u Rwanda asanga nyuma y’ibiganiro ku bibazo bibangamiye umutekano wa Afurika, abasirikare bakuru bari kubikurikirana bazaba bazi neza kandi biteguye guhangana n’ibibazo by’umutekano muke bahangana by’umwihariko n’ibibazo biri kugenda bivuka muri ikigihe; aha akaba ari ho ahera asaba bariya basirikare kuzakoresha ubumenyi bakura mu Ishuri rikuru ryIgisirikare cy’u Rwanda bazana impinduka nziza muri Afurika ari nako bahashya ibibazo by’umutekano mucye biyugarije.

Lt Col Like Like wo muri Zambia, akaba umwe mu basirikare bari gukurikirana ibiganiro ku bibazo bibangamiye umutekano wa Afurika, avuga ko bizamufasha nk’umwe mu bashinzwe kubungabunga ubuzima bwa buri munsi bw’abaturage.
Ati “Ibi biganiro ni ingirakamaro kubera ko ninsubira iwacu nzabasha kumva buri kibazo ngendeye ku kuba ukeneye umutekano kugira ngo ubashe kugira icyo ukora aho utuye, kandi ibyo twiga hano ni ukwikura mu bibazo biri imbere yacu; kubera ko nk’abasirikare tugomba gutanga ubuyobozi aho bukenewe, tugomba gutanga icyerekezo gikenewe, tugomba kumenya ko abaturage bacu batekanye (…) tugendeye kuri ubwo bumenyi turi gukura hano tuzabasha kumenya uko turinda abaturage bacu.”

Mu biganiro bigomba gutangwa harimo ikivuga ku buryo bwo kurwanya iterabwoba, imihindagurikire y’ikirere n’uburyo ikora ku mutekano n’iterambere rya Afurika, uburyo hatsinsurwa imitwe yitwara gisirikare mu karere k’Ibiyaga Bigari, umutekano mu by’ikoranabuhanga, ubusesenguzi ku butumwa bw’amahoro bw’Umuryango w’Abibumbye(UN) n’ibindi.

Abasirikare bakuru biga muri RDF CSC hamwe na bamwe mu bari kubaha ibiganiro ku bibazo bibangamiye umutekano wa Afurika muri iki gihe

Muhabura.rw


Tanga igitecyerezo

Amazina
Ubutumwa

1 Comment

hategekimana olivier - 2 months ago

palice oye oye nikomereze aho

Izindi nkuru