Yashyizweho kuri19 March, 2017 | 15:02

Dr Frank Habineza yemejwe bidasubirwaho nk’umukandida uzahatana mu matora ya Perezida

Inteko Rusange y’Ishyaka riharanira Demokarasi n’ibidukikije mu Rwanda (The Democratic Green Party of Rwanda), kuri iki Cyumweru tariki 19 Werurwe 2017, yemeje umuyobozi mukuru waryo Dr Frank Habineza nk’umukandida uzarihagararira mu matora ya Perezida wa Repubulika azaba muri Kanama 2017, kandi iri shyaka ryizera kuba ryatsinda Perezida Kagame rikayobora igihugu. Dr Frank Habineza yavuze ko naba Perezida azafasha igihugu kubona ibiryo bihagije

Nyuma yo kwemezwa na Biro Politike y’ishyaka mu kwezi k’Ukuboza 2016, Dr Frank Habineza yemejwe bidasubirwaho n’Inteko Rusange yabaye kuri iki Cyumweru tariki 19 Werurwe 2017, akaba agomba kugeza ibisabwa muri Komisiyo y’amatora, bityo akaba umwe mu bazahatana na Perezida Kagame wamaze kwemezwa na FPR Inkotanyi ko ari we mukandida uzabahagararira.

Mu nama ya Biro Politiki y’Ishyaka yabaye mu kwezi k’Ukuboza, Dr Frank Habineza yavuze ko naramuka atorewe kuba Perezida w’u Rwanda agasimbura Perezida Paul Kagame, yiyemeje kuzahangana n’ibibazo birimo ubukene, inzara n’ibindi biterwa n’ihindagurika ry’ibihe. Ibi ninabyo yasibiyemo amaze kwemezwa n’Inteko Rusange, aho yavuze ko azaharanira ko u Rwanda rugira ibiryo bihagije.

Kuwa Gatatu tariki 13 Gicurasi 2015 ubwo hari impaka ku bijyanye n’Ivugurura ry’Itegeko Nshinga, Dr Frank Habineza yavuze ko niba Abanyarwanda bavuga ko nta wundi uhari wasimbura Perezida Kagame, we yumva atari byo ndetse ko we n’ishyaka rye biteguye kuba bayobora igihugu, kandi ko umwaka wa 2017 nugera ibi bazabyerekana.

Ishyaka rya Dr Frank Habineza, niryo shyaka rukumbi mu yemerewe gukorera mu Rwanda, ryarwanyije ko Perezida Kagame yakongera kwiyamamaza. Kubasha gutsinda amatora, byaba ari akazi katoroshye kuri iri shyaka, naryo ubwaryo ryivugiye ko ibyo Perezida Kagame yakoreye abaturage ari byiza ariko rikaba ryarumvaga hakwiye kujyaho undi Kagame agasimburwa.

Yanditswe na Chief Editor/MUHABURA.rw


Tanga igitecyerezo

Amazina
Ubutumwa

Izindi nkuru