Yashyizweho kuri30 March, 2017 | 19:45

Amatora 2017: Nta bakandida ba kwiye kwiyamamaza igihe kitaragera

Perezida wa Komisiyo y’igihugu y’amatora (NEC), Prof Kalisa Mbanda yatangaje ko mu gihe u Rwanda rwegereje igihe cy’amatora ya Perezida wa Repubulika umuntu wese adakwiriye kwamamaza uko yishakiye uwo yumva ashyigikiye mu guhatana kw’abakandida kandi igihe kitaragera.

Yabitangaje tariki ya 30 Werurwe 2017 ubwo yagezaga ku Ihuriro ry’igihugu nyunguranabitekerezo ry’imitwe ya politiki (NFPO), bimwe mu bikubiye mu mushinga w’amabwiriza agenga itora rya Perezida wa Repubulika mu 2017.

Prof. Mbanda yavuze ko kugeza ubu imyiteguro y’amatora imeze neza, ariko ko hari abakandida bamwe na bamwe baba baratangiye kugenda mu mashuri amwe n’amwe basinyisha ababashyigikira kandi igihe kitaragera, bityo impapuro zabo baba barakoresheje ni imfabusa.

Yibukije ko ibikorwa byo kwamamaza mu nama kugeza ubu bitaratangira, biteganyijwe guhera tariki ya 12 kugeza 23 Kamena 2017. Bityo ngo abantu bakwiye kumenya ko bikorwa n’umukandida ubwe kandi kugeza ubu nta bakandida baramenyekana.

Ati “Kwamamaza burya bikorwa n’umuntu ku giti cye cyangwa bigakorwa n’abantu yashyizweho ku giti cye kandi bazwi ko bamukorera.”

Yasobanuye ko impamvu bibujijwe ku muntu wese ari uko igihe umuntu afite uwo yiyumvamo, biterwa n’uko amakosa ashobora gukorwamo n’ibindi ari we ubwe wabiryozwa.

Ati “Ni ukugira ngo umuntu yikorere uburemere bw’ikosa ashobora gukora. Niba ugize ikintu kibi abe ari wowe ukiryozwa byoye kujya kuryozwa abandi. Kandi niba umukandida yaramwitumiye na we ibyo agiye agakora, akavuga nawe baba babifatanyije bishobora kumugarukaho.”

Umunyamabanga Nshingwabikorwa w’Ihuriro ry’imitwe ya Politiki (NFPO) Munyaneza Charles, yibukije ko no ku baziyamamaza igihe cyo gutangira kwakira amabaruwa y’abakandida ku mwanya wa Perezida kitaragera, ari uguhera tariki ya 12 kugeza 23 Kamena, 2017.

Ati “Mbere yaho ntabwo twiteze kubona umuntu wajya hirya no hino avuga ko ari umukandida ku mwanya wa Perezida asaba ko bamusinyira.”

Perezida wa Komisiyo y’igihugu y’amatora (NEC), Prof Kalisa Mbanda

Kugeza ubu umubare w’abemerewe kuzatora mu matora ya Perezida wa Repubulika mu 2017 wiyongereyeho abangana na miliyoni 1,7 b’urubyiruko, umubare w’abazatora ukaba umaze kugera kuri miliyoni 6,8; mu gihe mu 2010 abari bemerewe gutora bari miliyoni 5,7.

Undi mwihariko w’amatora y’uyu mwaka ni uko ikoranabuhanga rizakoreshwa mu kwiyamamaza mu buryo bw’imbuga nkoranyambaga.

Yanditswe na Ubwanditsi/Muhabura.rw


Tanga igitecyerezo

Amazina
Ubutumwa

Izindi nkuru