Yashyizweho kuri27 September, 2019 | 15:46

Abadepite batoye itegeko rikuraho amategeko asaga 100 yashyizweho mu gihe cy’abakoroni

Inteko Ishinga Amategeko y’u Rwanda yatoye itegeko rikuraho amategeko arenga 1000 atakijyanye n’igihe, yashyizweho mbere y’itariki u Rwanda rwaboneyeho ubwigenge.

Itegeko ritowe nyuma y’amezi atatu uwo mushinga uganirwaho mu Nteko.Ayo mategeko yashyizweho ubwo u Rwanda rwakoronizwaga n’u Budage kuva mu 1900 kugeza mu 1916 n’igihe rwakoronizwaga n’u Bubiligi kuva mu 1916 kugeza mu 1962).

Ubwo Komisiyo ya Politiki mu Nteko Ishinga Amategeko y’u Rwanda yasesenguraga umushinga w’iryo tegeko muri Kamena uyu mwaka, Umunyamabanga wa Leta muri Minisiteri y’Ubutabera ushinzwe Itegeko Nshinga n’andi mategeko, Uwizeyimana Evode, yavuze ko ari ikimwaro kuba u Rwanda rwari rukigendera ku mategeko yashyizweho ku nyungu z’Abakoloni.

Ati “Nta tegeko na rimwe ritubuza kuyakuramo, ariya mategeko nta shema adutera ku buryo twayarekeramo. Nta kibazo na kimwe tubona twagira tuyakuyemo.”

Mu mategeko yakuwemo harimo iryabuzaga abacuruza ibinyobwa bisindisha kubitangira ubuntu cyangwa ku bikopa ryashyizweho mu 1930, iryavugaga ko abamisiyoneri b’abagatulika, umuryango cyangwa ikigo cy’Ababiligi gishaka gukora ibikorwa bifitiye rubanda inyungu bihabwa ubutaka bw’ubuntu ryashyizweho mu 1942.

Iryo tegeko ryasobanuraga ko igihe bashaka gushyira igikorwa nk’icyo bahabwa ubutaka bungana na Hegitari 10 mu bice by’imijyi na hegitari 200 mu bice by’icyaro.

Minisitiri w’Ubutabera akaba n’Intumwa nkuru ya Leta y’u Rwanda, Johnston Busingye, yabwiye New Times ko iyo ari intambwe u Rwanda rugezeho yo kuba rwagendera ku mategeko rwishyiriyeho.

Ati “Amategeko y’abakoloni bayashyizeho ngo akurikizwe mu bice bari bakoronije ntabwo ari ay’ibihugu bari bakoronije. Bayazaniye ibihugu bakoronije kugira ngo abafashe gushyira mu bikorwa serivisi zabo. Aho tugeze ubu bivuze ko tugomba kugendera ku mategeko twishyiriyeho.”

Bibaye Nyuma y’Umushinga wo kuyakuraho wemejwe n’Inama y’Abaminisitiri yo ku wa 03 Mata 2019 yayobowe na Perezida wa Repubulika y’u Rwanda Paul Kagame.

MUHABURA.RW


Tanga igitecyerezo

Ibitekerezo


Tanga igitekerezo


1 Comment

Uwamahoro jacky - 3 weeks ago

Byari bikwiriye mwatekereje neza

Izindi nkuru