Yashyizweho kuri20 February, 2018 | 12:05

Karongi : Impunzi zo mu nkambi ya Kiziba zafashe umwanzuro wo gusubira iwabo [Reba amafoto]

Impunzi z’abanye Congo zicumbikiwe mu nkambi ya Kiziba ihereye mu karere ka Karongi ho mu Ntara y’Uburengerazuba zivuga ko inzara muri iyi nkambi imeze nabi ari nayo mpamvu zamaze gufata umwanzuro ntakuka wo gusubira iwabo cyangwa abazishinzwe bakazimurira mu kindi gihugu.

Ibi bibaye nyuma y’ibiganiro byahuje abayobozi b’akarere ka Karongi, abashinzwe umutekano muri aka karere ndetse na bamwe mu bagize komite nyobozi y’iyi nkambi ya Kiziba, byanzuwe ko izi mpunzi ku munsi w’ejo mu gitondo zirabyuka zerekeza kuri HCR ari nayo zita umubyeyi wazo.

Muri ibi biganiro byabereye mu muhezo ukomeye cyane ngo ubuyobozi bw’akarere ka Karongi bwagerageje gusaba abahagarariye impunzi gutegereza umwanzuro uzatangwa na Leta y’u Rwanda ihagarariwe muri iki gikorwa na Minisiteri ifite Ibiza n’Impunzi mu nshingano, ariko abahagarariye impunzi bavuze ko nta kibazo bafitanye na Leta y’u Rwanda ahubwo ikibazo bafite ari inzara kandi bazayikizwa n’umubyeyi wabo (HCR)

Umwe mu bari muri iyi nkambi ya Kiziba yabwiye Muhabura.rw ko bishimiye kuba bagiye gutaha iwabo cyangwa bakoherezwa mu kindi gihugu aho bazaba baruhutse inzara yari igiye kubicira muri iyi nkambi

Ikibazo cy’izi mpunzi zivuga ko zigiye kwicwa n’inzara kimaze iminsi cyarakuruye impaka ndende aho byavugwaga ko izi mpunzi umwe yabaga yandikiwe amafaranga amutunga angana na 7500Frw, akaza kumanurwa akagera kuri 6700Frw kuri ubu akaba yari ageze kuri 5700Frw, ibintu bavuga ko ari uguhonyora uburenganzira bwabo no gushaka kubicisha inzara.

Ubuyobozi bw’izo mpunzi bukaba buherutse kugeza kuri leta y’u Rwanda na HCR urwandiko, ruvuga ko bafite ikibazo cy’ibiribwa byagabanutse .

Imibare ya Minisiteri ifite impunzi mu nshingano MIDMAR ivuga ko inkambi ya Kiziba muri 2014 yari ifite impunzi 16. 679 barimo abagabo 7,786 n’abagore 9,193.

JPEG - 317.7 kb
Uko impunzi mu nkambi ya kiziba Zitwaye mu myiteguro yo gusubira iwabo

JPEG - 251.4 kb
Uko impunzi mu nkambi ya kiziba Zitwaye mu myiteguro yo gusubira iwabo

JPEG - 139.6 kb
Uko impunzi mu nkambi ya kiziba Zitwaye mu myiteguro yo gusubira iwabo

Yanditswe na Chief editor


Tanga igitecyerezo

Amazina
Ubutumwa

1 Comment

Merbbe kayirebwa leonille - 2 months ago

From Congo to Rwanda now livi In United States
It’s so hard to understand but God knows everything than everyone you know I know it’s very hard but God stay with them I miss my City kiziba camp ark remember ko byose Imana irahari 😭😭😭🙏

Izindi nkuru