Yashyizweho kuri13 April, 2020 | 21:25

COVID-19 Kigali : Abantu 42 bakize Coronavirus bamaze gusezererwa

Abantu cumi na barindwi ( 17) bari barwaye Coronavirus basezerewe mu bitaro mu gihe umubare w’abanduye mu Rwanda wageze ku 127 nyuma y’uko Umuntu umwe asanganywe ubwandu mu bipimo 901 byafashwe mu masaha 24 ashize.

Kuva umurwayi wa mbere w’icyorezo cya COVID-19 abonetse mu Rwanda ku wa 14 Werurwe 2020, hamaze gutahurwa abantu 127 bayirwaye, muri bo abantu 42 barasezerewe nyuma yo gusuzumwa bagasangwa nta bwandu bafite mu maraso yabo, mu gihe nta n’umwe uritaba Imana.

Itangazo rya Minisiteri y’Ubuzima ryo kuri uyu wa mbere rivuga ko mu ’bamaze gusezererwa harimo cumi na barindwi ( 17) bakize mu masaha 24 ashize.’

Rikomeza rigaragaza ko umurwayi wa bonetse kuri uyu wa 13 Mata 2020, ari "Umuntu uherutse gukorera ingendo mu mahanga ’’

Minisante ivuga ko “Akaba yarahise ashyirwa mu kato kandi hakomeje gushakishwa abantu bose bahuye nawe kugira ngo basuzumwe ndetse bitabweho n’inzego z’ubuzima. Umuntu wese uhisha cyangwa wanga gutanga amakuru arebana n’abahuye n’umurwayi wa Coronavirus cyangwa agahisha ibimenyetso byabo, aba ashyize ubuzima bwa benshi mu kaga kandi abihanirwa n’amategeko.”

Abarwayi bose bavurirwa ahantu habugenewe kandi barimo koroherwa, ndetse abenshi ubu nta bimenyetso bya Coronavirus bagaragaza, kandi nta n’umwe urembye.

Denis Fabrice Nsengumuremyi/ MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru