Yashyizweho kuri8 March, 2018 | 13:26

Insengero zikomeye nazo zagezweho n’inkubiri yo gufunga insegero zitujuje ibisabwa

Urusengero ruri mu zikomeye ruri muzabanje kubakwa rwa ADEPR Nyarugenge ruherereye mu Mujyi wa Kigali rwagati ahazwi nko mu Gakinjiro rwagezweho n’inkubiri yo gufunga insengero zitujuje ibisabwa.Ibi byabaye yuma yo gusanga rutujuje ibisabwa birwemerera gukorerwamo amateraniro.

Itangazo ryashyizweho umukono n’ubuyobozi bw’Umurenge wa Nyarugenge rimenyesha ko uru rusengero “rwafunzwe kuko aho rukorera hatujuje ibisabwa”Rikaba riri ku mpande zose z’urusengero ngo hatagira uwifasha ko ataribonye ngo yinjiremo ahasengere kandi bibujijwe.

Iri niryo tangazo rihamanitse ribuza kwinjiramo gukoreramo amateraniro

Uru rusengero ruri mu za mbere zubatswe mu Mujyi wa Kigali aho Itorero rya ADEPR ryashinze imizi ahagana mu 1978 ritangiriye i Gasave, Paruwase yaguye imiryango ikabyara iya Nyarugenge. Kuri uyu mudugudu niho habarizwa Korali Hoziana ifite amateka ahambaye muri ADEPR kuko yabonye izuba mu 1978 ndetse habarizwa n’abandi bakomeye bazwi muri ADEPR mu nzego zitandukanye.

Iki gikorwa cyo gufunga insengero zitujuje ibicyenewe cyahereye mu Mujyi wa Kigali mu mpera za Gashyantare aho izigera kuri 714 zafunzwe kandi cyakurikiranye n’itabwa muri yombi ry’abapasiteri bashatse kwivanga muri iyi gahunda y’ubu bugenzuzi abo ni Apôtre Rwandamura Charles wo mu itorero rya UCC, Revela Pasiteri Nyamurangwa Fred, Bishop Rugagi Innocent ,Pasiteri Kalisa Shyaka Emmanuel, Revela Ntambara Emmanuel, ndetse na Pasiteri Dura James.

Iri genzura ryakomereje no mu bindi bice by’igihugu aho mu turere dutandukanye hari izagiye zifungwa nko muri Rwamagana,Nyamasheke n’ahandi.

Yanditswe na Habarurema Djamali


Tanga igitecyerezo

Amazina
Ubutumwa

Izindi nkuru