Yashyizweho kuri26 July, 2019 | 21:51

Arabie Saoudite:Abava muri RDC bahagaritswe kujya gukora umutambagiro mutagatifu i Maka

Arabie Saoudite yatangaje ko yabaye ihagaritse ibyo gutanga viza ku baturage ba Repubulika Iharanira Demokarasi ya Congo bashaka gukora ingendo nyobokamana muri icyo gihugu.

Itangazo Guverinoma ya Arabie Saoudite yatanze ibicishije muri Minisiteri y’Ububanyi n’amahanga yavuze ko gutanga Viza kuba-nyekongo babihagaritse kubera kubungabunga umutekano w’abantu basura icyo gihugu.

Itangazo rigira riti “Gutanga viza ku bantu baturutse muri Repubulika Iharanira Demokarasi ya Congo byahagaritswe mu kwita ku mibereho myiza y’abakora ingendo nyobokamana.”

Uyu mwanzuro wafashwe nyuma y’uko Umuryango mpuzamahanga wita ku buzima (OMS) utangarije ko icyorezo cya Ebola kimaze iminsi muri Congo gihangayikishije isi.

Umuyobozi w’abayisilamu muri Congo, Djuma Twaha yatangarije BBC ko hari abantu 410 bagombaga kugirira urugendo rutagatifu mu mujyi wa Mecque mu kwezi gutaha.

OMS iherutse gutangaza ko icyorezo cya Ebola muri Congo gihangayikishije ariko ibuza ibihugu kudashyiraho amabwiriza akumira urujya n’uruza rw’abantu cyangwa ibicuruzwa.

Abantu basaga 1700 nibo bamaze guhitanwa na Ebola kuva icyo cyorezo cyakwaduka muri Congo muri Kanama 2018.

Niyomugabo Albert/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe