Yashyizweho kuri6 January, 2020 | 11:23

2019-2020 :Agahinda ku barwanya ubutegetsi bw’u Rwanda !

Kera abantu bumvaga vision 2020 bakumva ari kera, abandi bakumva ko isi izaba yarahindutse, cyangwa hakagira abumva ko hari byinshi bazaba barahindutseho mu buzima. Abarwanya ubutegetsi bw’u Rwanda ubabajije uko bagiye kwinjira muri 2020 bameze ntibabura icyo bakubwira, kuko bafite byinshi.

Abarwanya ubutegetsi bw’u Rwanda ,uyu mwaka wa 2019 mo hagati bari baraciye ibintu basakuza bafite umugambi ngo wo guhirika leta y’u Rwanda, za FLN zimeze nabi, Sankara yirirwa yigamba ko yateye u Rwanda, kandi ko bazaruvamo aruko bageze Kigali bagakuraho Perezida Kagame, RNC nayo iri gushyira abana mu gisirikare byacitse mbese ngo bazaturuka Congo baza gufasha FLN igihe izaba igeze kure yigarurira ibice by’u Rwanda.

Icyo gihe Congo yari yarabaye nk’uruganda rucura inyeshyamba zirwanya u Rwanda, kuko na FDLR yari yaramaze kwiyunga n’abambari ba Kayumba ngo banoze umugambi wo gukuraho Perezida Kagame. Umugambi waranogejwe, abambari benshi barahaguruka barahagarara, kugeza naho umusaza Twagiramungu yiyongoza ngo ikizaba cyose ku ngabo zabo ziri Congo bazimanukira baze guhangana.

Ibintu byari bigeze kure kuko Kayumba yari amaze kumvikana na Uganda ubufatanye bwa gisirikare ndetse no kuba inzira bazanyuramo batera u Rwanda, kuko Museveni yababwiraga ko azi neza system y’u Rwanda ndetse akamenya na perezida Kagame neza. Ubwo imyiteguro yararimbanyije biracika za Congo Kayumba na bagenzi be bubaka inyeshyamba karahava.

Uko 2019 yagiye igana ku mpera, isosi ya Kayumba yagiye igwamo inshishi, kuko umugambi we wabaye nka ya nkoni y’umwana ishira dondidondi. Bijya gushyuha habanje gufatwa Vuvuzela Sankara Callixte wirwaga ashyushya imitwe abantu ngo bafashe uburengerazuba bw’u Rwanda n’amajyepfo, ubwo imigambi y’abapawa itangira kugenda ikonja nk’isosi y’intama.

JPEG - 119.1 kb
Kayumba yari amaze kumvikana na Uganda ubufatanye bwa gisirikare

Bidatinze Congo yaje kubona umuyobozi mushya Félix Antoine Tshisekedi Tshilombo, waje atumva neza iby’imitwe yigaruriye igice cya Congo, igahungabanya umutekano. Tshisekedi amaze kujyaho yahise ashyiraho umugambi wo kurandura imitwe yitwaje intwaro ikorera muri Congo, aba ahereye kuri FDLR, FLN, RUD Urunana, CNRD, MRCD, n’izindi nyinshi zose zarashwe urufaya n’ingabo za FARDC, ubwo urugendo rw’aba pawa ikiraro kiba kiracitse, bamwe bagwamo, abandi basigara hakurya abandi bataha mu Rwanda.

JPEG - 32.4 kb
Igihugu cy’uburundi cyatanze byose kugirango umutegetsi bw’u Rwanda butembagazwe

Tugiye kwinjira 2020 Abarwanya ubutegetsi bw’u Rwanda ,bararuciye bararumize, kuko barasenyutse, nako barashwanyaguritse. RNC ya Kayumba yarasenyutse, ubu bakaba bari kumuhiga ngo aryozwe ibyo yabashoyemo. Uretse abaguye za Congo, nka ba Mudacumura, ubu abandi nka ba Bazeyi, Mudasiru, na bagenzi be nka ba Sankara bari mu Rwanda bakurikiranwe n’ubutabera, mugihe abambari babo ibihumbi batahutse bakaba bari kugororwa mu Rwanda ngo basubizwe mu miryango yabo. Ndahamya ko umwaka wa 2019 utazibagirana mu mitwe y’aba pawa, bagiye kwinjira 2020 nta cyizere cy’ubuzima bw’ejo hazaza gihari.

Inama nagira Abarwanya ubutegetsi bw’u Rwanda rero ni ugukura isomo mu byababayeho 2019, bakazasoza 2020 baratahutse mu Rwanda, bakava mu mashyamba bakaza gufatanya n’abanyarwanda kubaka igihugu. Nibaze bajye muri gahunda za Girinka, VUP, Connect Rwanda (bazahabwa Smartphones), n’izindi gahunda zigamije iterambere ry’abaturage. Bave ibuzimu bajye ibumuntu.

Perezida wa Repubulika Paul Kagame yijeje abanyarwanda ko ikibazo cy’abatifuriza ineza u Rwanda bakanaruhungabanya kizarangirana n’uyu mwaka wa 2020.

Ibi Umukuru w’igihugu yabitangarije mu birori by’umunsi mukuru w’ubunani bw’uyu mwaka wa 2020.

Ni ibirori byabaye mu ijoro rya nyuma ry’umwaka wa 2019 rishyira ubunani bw’umwaka mushya wa 2020.

Mu ijambo rye, Umukuru w’igihugu yakomoje ku cyerekezo 2020, ashimangira ko umwaka wa 2019 ushyize akadomo kuri icyo cyerekezo ushimangiye ko u Rwanda ari igihugu cy’umugisha.

Perezida Kagame yanakomoje ku batifuriza ineza u Rwanda, agaragaza ko umwaka wa 2019 nabo bawubonyemo ibibakwiye kuko bakomeje kuvunira ibiti mu matwi.

Yagaragaje ko muri uyu mwaka mushya wa 2020 u Rwanda rwiteguye guharanira amahoro n’amajyambere y’abana barwo ku kiguzi icyo ari cyo cyose, aboneraho no kongera kwifuriza abanyarwana umwaka mushya muhire.

Salongo Richard Muhabura.rw


Tanga igitecyerezo

Ibitekerezo


Tanga igitekerezo


Izindi nkuru