Yashyizweho kuri28 January, 2019 | 20:06

Ubuhamya buteye agahinda bw’Abanyarwanda babiri bashimutiwe muri Uganda bagakorerwa ibya mfura mbi

Polisi ya Uganda yashyikirijwe iy’u Rwanda Abanyarwanda babiri barimo Kayihura w’imyaka 53 y’amavuko,wari ubayeho mu buzima bwo kubona ibimutunga akoze akazi k’ubuhinzi ndetse no kwikorera imitwaro ariko nyuma yaje gutungurwa igihe yatabwaga muri yombi muri Uganda ashinjwa kutagira ibyangombwa.

Kayuhura ufite abana icyenda n’umugore, atuye mu mudugudu wa Gahunga akagari ka Gafumba,umurenge wa Rugarama ho mu karere ka Burera intara y’Amajyaruguru y’u Rwanda,avuga ko yari asanzwe ajya muri Uganda buri gitondo agendeye ku ndangamuntu y’u Rwanda agakora akazi ke nimugoraba agataha ariko ku wa 15 Mutarama 2018 atungurwa no gutabwa muri yombi bamubwira ko nta byangombwa afite.

Ati “Icyo gihe nari narayeyo, ngiye kumva numva mu gitondo abapolisi barakomanze ngo nimbyuke tugende nta byangombwa mfite.

Bahise banjyana kuri Sitasiyo ya Polisi y’ahitwa Nyarusizi mu Karere ka Kisoro, aho maramo iminsi ibiri nta kurya hanyuma bantwara ku rukiko ku munsi wa gatatu nko mu masaa kumi n’imwe z’umugoroba.”

Kayuhura akomeza avuga ko ubwo yageraga ku rukiko,yatunguwe no kuhasanga abandi Banyarwanda benshi bagera kuri 50 aho bose ngo babakatiraga igifungo cy’umwaka n’amezi 6.Gusa ngo uwumvaga adashaka gufungwa agatanga ihazabu ya miliyoni n’igice y’amashilingi ya Uganda (UGSH 1,500,000), ahwanye n’ibihumbi 366 by’amafaranga y’u Rwanda.

Yagize ati“Njyewe kimwe na bamwe muri bagenzi banjye kubera ko ntayo twari dufite twaragiye turafungwa tumarayo umwaka.”

Uyu mugabo yamaze muri gereza amezi 12 aho kuba 18, kuko yafunguwe kuri uyu wa Gatandatu tariki 26 Mutarama 2019.

Avuga ko usibye kwicishwa inzara bahabwa akawunga kaboze,yakorewe ihohoterwa ryo gukoreshwa imirimo y’uburetwa irimo kwikorera amabuye n’ibiti birengeje ubushobozi bwe ubwo babaga babatwaye mu masoko y’ubwubatsi y’inzego z’umutekano za Uganda.

Ati“No muri gereza batwicishaga inzara, bagira ngo baduhaye ibiryo bakaduha akawunga kaboze karimo ibisimba.”

Mu mivugire ye,Kayuhura bigaragara ko asa n’unaniwe, avuga ko ubwo bakoreshwaga iyo mirimo y’ubucakara yarabananiraga bakabahata ibibando.

Ati “Dore ubu sinshobora kuzamura akaboko, ndetse no kuryama bisaba ko banterura amaguru banyuriza ku buriri.”

Uyu mugabo asaba Leta y’u Rwanda gukora ubuvugizi kugira ngo Abanyarwanda bajya muri Uganda bareke guhohoterwa mu gihe abaturage ba Uganda baza mu Rwanda nta kibazo bahura nacyo.

Yagize “Nk’uko Abanya uganda baza mu Rwanda bagendera ku karangamuntu ntihagire ubakoraho, Leta y’u Rwanda yari ikwiye kutuvuganira umuturage wambutse afite indangamuntu ntagahohoterwe muri Uganda.

Kuri we ngo byabaye akamenyero gufata Abanyarwanda bambuka bajya muri Uganda aho bafatwa abadafite amafaranga bagafungwa.

Ati“Ufite amafaranga baramurekura akagenda utayafite agafungwa.”

Akomeza agira ati “Bitwaza ibyangombwa ariko n’ufite agapapuro baha uwinjiye by’igihe gito [akajeto] akereka umupolisi akakamucira mu maso.

Kayihura yashyikirijwe u Rwanda ari kumwe na Emmanuel Tuyiringire w’imyaka 25, wari umaze ibyumweru bitatu afungiye muri Gereza ya Kisoro.

Uyu Tuyiringire avuga ko bafatwa bari abantu 16 barimo Abanyarwanda 12 n’abanye Congo Kinshasa 4.

Uyu mugabo yamaze muri iyi Gereza ya Kisoro icyumweru n’igice arekurwa na we kuwa Gatandatu tariki ya 26 Mutarama 2019, nyuma yo gukatirwa igifungo cy’umwaka cyangwa agatanga ihazabu y’ibihumbi 600 by’amashilingi ya Uganda ahwanye n’ibihumbi 150 by’amafaranga y’u Rwanda aho gufungwa.

Ibi baye nyuma y’ibyumweru bibiri gusa, undi Munyarwanda witwa Moses Ishimwe Rutare, w’imyaka 33, ashimutiwe ahitwa Bugolobi muri Kampala n’urwego rw’ubutasi rwa gisirikare rwa Uganda (CMI).

Si ubwa mbere Uganda ivugwaho guhohotera Abanyarwanda bajyayo kuko mu myaka ibiri ishize humvikanye abandi benshi bagiye bakorerwa iyicarubozo ku buryo bataha bagendera mu tugare tw’abamugaye.

Aba baje nyuma y’uko muri 2017,Polisi ya Uganda yashyikirije iy’u Rwanda umucuruzi witwa Patrick Niyigena w’imyaka 38, wari washimutiwe muri icyo gihugu akarekurwa nyuma y’icyumweru agendera mu kagare k’abamugaye kubera iyicarubozo yavugaga ko yakorewe n’inzego z’umutekano za Uganda.

Nabwo muri Mutarama 2018, undi mucuruzi witwa Emmanuel Rwemayire, na we yashyikirijwe Polisi y’u Rwanda nyuma y’ibyumweru bitatu ngo yari amaze akorerwa iyicarubozo n’inzego z’umutekano za Uganda. Rwemayire, na we yatashye agendera mu kagare k’abamugaye.

Nanone mu Kuboza 2017, Polisi ya Uganda yari yashyikirije iy’u Rwanda abandi Banyarwanda batanu barimo; Jesicca Muhongerwa, Vanessa Agasaro, Fred Turatsinze, Dianah Kamikazi na Hurbert Munyangaju harimo abakoraga mu nzu zitunganya imisatsi n’abahinzi borozi.

Aba bose uko ari batanu icyo gihe batashye bavuga ko barekuwe nyuma yo gufungirwa ahantu hatandukanye bakorerwa iyicarubozo, ndetse bakanirukanwa amaramasa kandi bari bafite imitungo muri icyo guhugu.

Ntibyagarukiye aho n’ubundi mu Kuboza 2017,Umunyarwanda Fidele Gatsinzi wari wagiye muri Uganda yitwaye mu modoka ye yagarutse mu kagare k’abamugaye Polisi ya Uganda imushyikiriza iy’u Rwanda.

Uyu yagarutse avugishwa aho yavugaga ko yari amaze amezi abiri azengurutswa mu bigo bitandukanye bya gisirikare akorerwa iyicarubozo riteye ubwoba ryamuviriyemo kumugara bene ako kageni.

Yanditswe na Habarurema Djamali


Tanga igitecyerezo

Amazina
Ubutumwa

Izindi nkuru

Inkuru zikunzwe