Yashyizweho kuri14 December, 2018 | 22:40

Perezida Kagame yagize icyo avuga ku gatotsi kuvugwa mu mubano w’u Rwanda na Afurika y’epfo ndetse n’ikinyamakuru yitiriwe

Perezida Paul Kagame yatangaje ko hari urujijo mu bijyanye n’umubano w’u Rwanda na Afurika y’Epfo nyuma y’ibiherutse gutangazwa ko abayobozi b’u Rwanda bubahutse bagenzi babo ba Afurika y’Epfo bakabatuka.

Umukuru w’Igihugu yagarutse ku mubano w’u Rwanda na Afurika y’Epfo mu kiganiro n’abanyamakuru cyakurikiye Inama y’Igihugu y’Umushyikirano yasojwe kuri uyu wa Gatanu, tariki ya 14 Ugushyingo 2018 muri Kigali Convention Centre.

Perezida Kagame yabajijwe ku bijyanye n’umubano w’u Rwanda na Afurika y’Epfo by’umwihariko ku makuru amaze iminsi ku mbuga nkoranyambanga ko abayobozi b’u Rwanda batutse ab’Afurika y’Epfo.

Minisitiri w’Ububanyi n’Amahanga wa Afurika y’Epfo, Lindiwe Sisulu, aherutse gutangaza ko yagiranye ibiganiro na Kayumba Nyamwasa, amusaba ibitekerezo ku mugambi w’icyo gihugu wo kuganira n’u Rwanda, hagamijwe kuzahura umubano hagati y’ibihugu byombi.

Perezida Kagame yahereye kuri iki avuga ko hari urujijo ku mpamvu ibintu byose bijya mu itangazamakuru mbere y’uko bigera ku mpande bireba.

Ati “Biteye urujijo. Numvise ko hari ibyavuzwe na Minisitiri w’Ububanyi n’Amahanga wa Afurika y’Epfo mu kiganiro n’abanyamakuru […] aho yavuze ko yahuye cyangwa yatumiye abantu ariko ko yahuye n’abantu bo muri RNC bamwe baba muri Afurika y’Epfo, kandi icyo ni ikibazo twaganiriyeho igihe kirekire na Guverinoma ya Afurika y’Epfo.”

Perezida Kagame yavuze ko amaze kubibona gutyo, yabajije abayobozi bamwe ku ruhande rw’u Rwanda icyo baba batekereza cyaba ari imvano yabyo cyangwa se niba hari ibiganiro bifitanye isano n’iyo ngingo byigeze bibaho.

Umukuru w’Igihugu yavuze ko hari abantu bumva ko niba hari ibirebana n’u Rwanda badashobora gukorana na Guverinoma yo iba irebwa n’ikibazo runaka ahubwo bagahitamo itsinda runaka ry’abantu.

Perezida Kagame yakomeje avuga ko umurongo w’u Rwanda wakomeje gushingira ku kuvuga ngo ‘reka tube turetse turebe ibi aho bigana niba bitari buzambye umubano wari uhari.’

Yakomeje avuga ko nyuma y’ikibazo kijyanye n’ibyatangajwe na Minisitiri w’Ububanyi n’Amahanga wa Afurika y’Epfo, kuri twitter hadutse ibindi biganiro bivuga ko Umunyamabanga wa Leta muri Minisiteri y’Ububanyi n’Amahanga, Olivier Nduhungirehe, yaba yaratutse Minisitiri Lindiwe Sisulu ku kuba yaragiranye ibyo biganiro n’abo muri RNC.

Ati “Ubwo ibyo byajyaga hanze, nashakaga kumenya uko byaba byaragenze ku buryo bigeza aho abantu batukana. Ni ukubera iki Umunyamabanga wa Leta muri Minisiteri y’Ububanyi n’Amahanga yatuka Minisitiri w’Ububanyi n’Amahanga wa Afurika y’Epfo cyangwa undi wese kuri icyo kibazo?”

Perezida Kagame yavuze ko yahise abaza ibyo aribyo maze bamubwira ko ari ubutumwa bwo kuri twitter, arangije asaba ko abwerekwa.

Ati “Kuva icyo gihe cy’ibirego, nta muntu urabona iyo tweet. Ndasaba mwe muri hano [abanyamakuru] niba mwarayibonye, nabyungukiramo.”

Perezida Kagame yakomeje avuga ko mu gushaka kumenya amakuru, ubwo yari mu nama hanze y’u Rwanda yahuye n’umwe mu bantu bo muri Afurika y’Epfo, aboneraho umwanya wo kumubaza aho ikibazo kiri.

Ati “Naramubajije nti ni ibiki biri kuba? Aransubiza ati, oya oya, hari ibitutsi. Ndamubwira nti wagira ibyo unyereka. Aravuga ati ‘Yego’. Nari kumwe n’umwe mu bamfasha [Lt Col] Patrick Karuretwa, asigarana n’uwo muntu aravuga ngo ndaza kukwereka.

Ubwo yagarukaga, yanzaniye ibintu bitari ‘tweet’ ahubwo ibyanditswe kuri internet na [David] Himbara uri muri Canada, abikesha ikinyamakuru cyitwa Rushyashya ko cyanditse ibintu ko Olivier [Nduhungirehe] yatutse Minisitiri w’Ububanyi n’Amahanga wa Afurika y’Epfo.

Aho ni ho kure twageze mu kumenya ibijyanye n’ibitutsi by’Umunyamabanga wa Leta wacu atuka Minisitiri w’Ububanyi n’Amahanga wa Afurika y’Epfo.”

Perezida Kagame yakomeje avuga ko muri iyo nyandiko yazaniwe na Col Karuretwa harimo no kumwitirira ikinyamakuru Rushyashya.

Ati “Ibyo twabonye ni ibyanditswe na Himbara, avuga ko abikesha Rushyashya. Ikindi kandi iyo Rushyashya bayitaga ikinyamakuru cyanjye. Bavuzemo izina ryanjye ngo Ikinyamakuru cyitwa Rushyashya cya Perezida Kagame cyanditse ibintu bibi ku byo Olivier [Nduhungirehe] yavuze. Ibyo ni byo byonyine twabonye.”

Guverinoma y’u Rwanda iherutse gushinja Afurika y’Epfo kugaragaza ibikorwa bitinza urugendo rwo kuzahura umubano, ishimangira ubushake bwayo nk’uko byemeranyijweho na Perezida Paul Kagame na Cyril Ramaphosa, muri Werurwe.

U Rwanda ruvuga ko umubano w’ibihugu byombi utari ukwiye kubangamirwa n’ibikorwa by’abantu “bahamijwe cyangwa bashakishwa ku byaha bakoze.”

Chief Editor/MUHABURA. RW


Tanga igitecyerezo

Amazina
Ubutumwa

1 Comment

- 1 month ago

Konumva Menga Nakadederezo Ra.

Izindi nkuru