Yashyizweho kuri19 March, 2019 | 07:35

Intumwa ya Minijust yariye indimi imbere ya PAC ku by’amafaranga y’inyangamugayo za Gacaca yaburiwe irengero

Abari bahagarariye Minisiteri y’Ubutabera basabwe gutaha bakajya kwitegura bihagije kugira ngo bazagaruke bafite ibisobanuro bihagije ku inyerezwa n’imicungire mibi by’umutungo w’amakoperative y’inyangamugayo z’Inkiko Gacaca.

Ku gicamunsi cyo kuri uyu wa Mbere tariki 18 Werurwe 2019,abadepite bagize PAC byari biteganyijwe ko bakira abahagarariye Minijust, abahagarariye Minisiteri y’ubucuruzi n’inganda (Minicom) n’Ikigo cy’igihugu gishinzwe amakoperative.

Isesengura ryakorewe Raporo y’umugenzuzi w’imari ya Leta ryagaragaje ko hari miliyoni zisaga 18 Frw amakoperative y’inyangamugayo za Gacaca yakoresheje nabi, miliyoni 152 Frw yagabanywe n’abanyamuryango aho kuyashora mu mishinga ibyara inyungu, miliyoni 47Frw yakoreshejwe ibyo atari agenewe na miliyoni 101 Frw yagurijwe abanyamuryango ntibayishyure.

Abadepite babajije Umunyamabanga Uhoraho muri Minijust, Mukeshimana Beata, uburyo ayo mafaranga yagiye asohoka ntagire gikurikirana kugeza ubwo amwe ahombye.

Abadepite bagaragaje ko hari aho amafaranga yagiye ashyirwa kuri konti z’abantu ku giti cyabo aho kuyashyira kuri konti za koperative n’ibindi.

Mukeshimana yavuze ko abari bashinzwe imari mu rwego rw’igihugu rwari rushinzwe inkiko Gacaca ari bo babisobanura neza, abadepite bamubaza impamvu abari abakozi b’urwo rwego atabazanye niba we atabizi.

Ati “Njye rwose ni ubwa mbere nitabye PAC. Ntabwo nari nzi ko abayobozi bose bahamagarwa. Mbasabye imbabazi rwose mbasobanurira ko ntari mbizi ko baza. Njye nari nzi ko inteko ariyo ibatumiza sinari nzi ko mfite ubwo bubasha bwo gutumiza umuntu.”

Mukeshimana yavuze ko byabagoye gushakisha amakuru kuri izo koperative z’inyangamugayo ngo kuko amadosiye amwe atagaragara kuko nta hererekanyabubasha ryabayeho ubwo urwego rushinzwe inkiko Gacaca rwasozaga imirimo.

Depite Ntezimana Jean Claude yavuze ko kuba Minijust yarakiriye amadosiye y’urwego rw’inkiko Gacaca ntihabeho ihererekanyabubasha nabyo ari uburangare.

Ati “N’iyo abari bakuriye ruriya rwego baba barabikoze gutyo namwe mukabyakira ntabwo aribo bonyine babibazwa kuko bashobora no kubikora kubera amanyanga bazi ari muri biriya bikarito.”

Depite Bakundufite Christine yahise asaba ko abahagarariye Minijust bahabwa umwanya bagasubirayo bakazagaruka bafite amakuru ahagije.

Ati “Iyi raporo yasohotse muri Werurwe 2018, kugeza ubu hashize umwaka. Iyo raporo yari ibitse ahagana he cyangwa bagiye kuyishakisha ari uko PAC yabatumije? Ubu se bari baje gukora iki?”

Ikindi kibazo cyagaragaye ni aho amenshi mu yiswe amakoperative yahawe amafaranga, afite ubuzima gatozi muri kigo gishinzwe amakoperative ari atanu gusa, andi yitwaga amatsinda, bivuze ko bigoye ngo icyo kigo kimenye imicungire yayo.

Depite Uwimanimpaye Jeanne d’Arc yavuze ko batakomeza kumva ibisobanuro mu gihe inzego zibitanga zifite byinshi zitazi.

Ati “Njye ndabona ibintu bikomeye, abantu baje batiteguye. Intege nke umugenzuzi mukuru agaragaza mwari muzizi ariko ntacyo mwazikozeho, iyo muzikoraho muba mwamenye amavu n’amavuko y’ibi bibazo.”

Umunyamabanga wa Leta muri Minijust, Mukeshimana Beata yijeje ko azagaruka afite ibisobanuro bihagije.

Ati “Mbabwije ukuri ntabwo nari mfite inyandiko zuzuye numva navuga ngo tugiye gutangira dukurikirane. Niba mubyemera ubutaha nzaza nzanye Pascal, nzaza nzanye Mukantaganzwa bose nzaza mbazanye.”

Mu 2009 nibwo Leta yageneye inyangamugayo za Gacaca amafaranga yari agamije kuziteza imbere biciye mu makoperative
Mukeshimana(wambaye ishati y’umukara n’umweru)yabwiye abadepite ko ari ubwa mbere yitabye PAC atari azi uko ikora n’abo ihamagaza abizeze kuzazana abo bireba bose
Chief editor MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe