Yashyizweho kuri21 December, 2019 | 20:53

Bugesera:Abahinzi b’umuceli bagereka ibihombo bagira ku nzego zishinzwe amakoperative

Abahinzi b’umuceli bibumbiye mu makoperative atandukanye akorera mu Karere ka Bugesera baratunga agatoki inzego zireberera amakoperative,zikingira ikibaba nyobozi z’amakoperative ziyahoza mu bihombo, kandi abazihombeje ntibakurikiranwe.

Ugirumuhoza Jacqueline wari umuyobozi wa koperative KOPETWITEKI, ikorera mu gishanga cya Kizanye kiri hagati y’imirenge ya Ngeruka na Mareba ikaba ifite ikicaro mu murenge wa Ngeruka; ni umwe mu bashinjwe kunyereza amafaranga na Odite (Audite) irabigaragaza, nk’uko bitangazwa n’abari kumwe nawe muri komite nyobozi.

Uwimana Francina, umuhinzi w’umuceli akaba n’umunyamuryango wa koperative
KOPETWITEKI,agira ati: “Uwari perezida w’iyi koperative,Ugirumuhoza Jacqueline
byagaragajwe na Audite ko amafranga asaga miliyoni eshanu (5.000.000 frw) yaburiwe irengero, aza gufungwa nyuma y’igihe gito arafungurwa, ubu aridegembya nk’aho yabaye umwere”.

Ariko ngo ntiyigeze aryozwa amafaranga agaragazwa ko yanyerejwe muri iyi koperative.

Undi muturage utashatse ko tuvuga amazina ye, agira ati “Ibi bintu biri kuduca intege, kuko twagiye kubona tubona aratashye baramurekuye, ubu uyu munsi ari kubyina intsinzi we n’abayobozi bamukingiye ikibaba, nta bwo byumvikana ukuntu umunyamuryango azishyura amafaranga atazi uko yakoreshejwe”.

Ugirumuhoza kandi yirukanye abanyamuryango 108 abahora ko babaza aho umutungo wabo wagiye, ibyo byabaye ihuriro ry’Amakoperative y’umuceli ribireba.

JPEG - 459.1 kb
Bizumuremyi Ladislas utuye mu murenge wa Ngeruka umwe banyamuryango 108 ba koperative KOPETWITEKI birukanwe akanamburwa n’isambu

Bizumuremyi Ladislas utuye mu murenge wa Ngeruka,mu kagali ka Gihembe,umudugudu wa Kirasaniro,akaba ari mu banyamuryango birukanywe ati;“Byatuviriyemo kwirukanwa twamburwa n’amasambu yacu batubwira ko nta jambo dufite ahubwo bagaca inyuma kuri buri umwe bamusaba kugira icyo yibwiriza ngo abone gusubiramo, nk’abanyamuryango ba koperative turasaba kurenganurwa natwe dushobore kwikura mu bukene”.

Aho amakosa y’uwo muyobozi agaragarijwe ikigo gishinzwe guteza imbere amakoperative mu Rwanda (RCA) gitegeka ko yeguzwa we na komite bari bafatanyije,nyuma yahise ashyirwa muri ngenzuzi y’Ihuriro ry’Amakoperative y’Umuceri rikorera ku Ruhuha.

Ugirumuhoza yafunguwe kuko ibimenyetso byabuze

Uwari perezida wa koperative KOPETWITEKI, Ugirumuhoza Jacqueline, yafunzwe biturutse ku kuba ikigo cy’igihugu gishinzwe iterambere ry’amakoperative RCA, cyaragaragarijwe ko hari amafaranga yanyerejwe kandi bikekwa ko ari we wayanyereje, nk’uko bivugwa na bamwe mu banyamuryango b’iyi koperative.

Yafunzwe akurikiranweho ibyaha byo kunyereza amafaranga ya koperative, ariko nyuma aza gufungurwa kubera ko habuze umushinja, urukiko ruvuga ko nta bimenyetso bihari, ibintu abanyamuryango bavuga ko haba harabayemo ruswa yahawe komite nyobozi yamusimbuye, ubundi ntimushinje.

Byagaragaye ko yakoze amakosa akomeye yo gukora impapuro mpimbano zo kwaka inguzanyo muri Banki afatanyije na bamwe mu banyamuryango n’abandi bo hanze batari abanyamuryango.

Yakoreshaga uburiganya mu matsinda yazaga gusinyisha amafaranga,akavuga ko kugira ngo abasinyire ari uko bashyiramo umugabo we n’umuhungu we,kugeza ubu byagaragaye nabo ko bafitiye koperative umwenda ungana na miliyoni imwe n’ibihumbi Magana atatu mirongo itatu na bine (1.334.000 frw).

Muri koperative CORIMARU naho haravugwa inyerezwa ry’umutungo

JPEG - 728.2 kb
CORIMARU ihinga umuceli muri iki gishanga cya Rurambi giherereye hagati y’imirenge ya Mwogo na Julu yo muri Bugesera ndetse na Masaka yo muri Kicukiro

Uretse abo murikoperative KOPETWITEKI, abo muri koperative CORIMARU ihinga umuceli mu gishanga cya Rurambi giherereye hagati y’imirenge ya Mwogo na Julu yo muri Bugesera ndetse na Masaka yo muri Kicukiro, nabo baribaza impamvu ubugenzuzi bwagaragaje ko komite nyobozi yarigishije amafaranga, none abari bayigize bakaba bidegembya batishyura ayo mafaranga, dore n’ubwo bamwe mu bari bayigize begujwe, ariko uwari umucungamutungo wayo na n’ubu aracyakora, bakavuga ko atagakwiye kuba akiyirimo, ibintu bavuga ko bibaca intege mu buhinzi bwabo.

Ubwo ikigo gishinzwe iterambere ry’amakoperative mu Rwanda (RCA) cyakoze igenzura, ryagaragaje ko iyi koperative ifite igihombo cya Miliyoni mirongo itandatu z’amafaranga y’u Rwanda (60.000.000 Frw).

Umugenzuzi wigenga nawe yagagaraje ko mu bubiko (stock) harimo igihombo cya Millioni cumi n’umunani z’amafaranga y’u Rwanda (18.000.000 Frw) hamwe na Miliyoni ebyiri n’ibihumbi Magana atanu (2.5000.000 Frw),y’abahinzi batangaga mu kigega AGACIRO DEVELOPMENT FUNDS.

Kuri ayo mafaranga hiyongeraho Miliyoni eshatu zirenga (3.000.000 Frw) zakatwaga
abanyamuryango ba FPR INKOTANYI nayo yaburiye mu mifuka ya bamwe adashoboye kuvuga ku bw’umutekano we.

Ikindi ni igihombo cy’imodoka FUSO yaguzwe mu 2017. Guhera icyo gihe ikora, nta faranga na rimwe riragera kuri konti ya koperative, imyaka itatu irashize.N’amazu akodeshwa ya koperative nayo nta faranga ryayo rigera kuri konti.

JPEG - 632 kb
Ububiko bwa koperative CORIMARU ndetse n’imodoka yaguzwe mu 2017 kugeza n’ubu nta faranga riragera kuri konti yayo

Umukecuru umwe twaganiriye utashatse ko tuvuga amazina ye, agira ati “Tuvunika duhinga nyamara ubuhinzi bwacu ntibuduteze imbere, ugasanga umutungo wa koperative wikubirwa n’ubuyobozi bwa koperative gusa kandi ntihagire ingaruka bibagiraho”.

Mugenzi we nawe bahinga hamwe muri iki gishanga, agira ati “Ntitwumva ukuntu
manager (umucungamutungo) agikora kandi ari mubaturigitishirije umutungo, yagakwiye kuba nawe yaravuyeho kuko ari muri komite yaduhombeje, ubuyobozi ntibugire icyo bubikoraho”.

TWAGIRAYEZU Emmanuel uyobora akagali ka Rugunga, kamwe mu tugali dutuwemo n’abahinzi bahinga mu gishanga cya Rurambi, avuga ko nyuma y’uko ubugenzuzi bugaragaje ko komite nyobozi yateye ibihombo iyi koperative, bahise bakuraho iyi komite nyobozi,kuri ubu hakaba hagiye gukurikiraho gufasha abanyamuryango kugaruza uyu mutungo wabo.

JPEG - 551.6 kb
Umunyamabanga nshingwabikorwa w’akagali ka Rugunga TWAGIRAYEZU Emmanuel
Photo by:Viateur

Yagize ati “Ikigomba gukurikiraho ni ugufasha abanyamuryango kugaruza umutungo wa koperative, natwe tuzajya tubaba hafi nk’ubuyobozi kugira ngo ibibazo nk’ibi bitazongera kubaho, gusa ndasaba abahinzi kugirira icyizere komite nyobozi nshya ntibacike intege”.

Guhana abayobozi banyereza si inshingano y’Ihuriro ry’amakoperative

Umucungamutungo w’ihuriro ry’amakoperative y’abahinzi b’umuceli mu karere ka Bugesera Ingabire Emma, avuga ko ibi bibazo biri muri aya makoperative nk’ihuriro babizi, kandi bakoze ubugenzuzi gusa ngo nk’ihuriro ubushobozi bwaryo bugarukira ku bugenzuzi, kugira inama no kongerera ubushobozi abanyamuryango kuko guhana abayobozi mu gihe bigaragaye ko banyereje umutungo bikorwa n’ikigo gishinzwe guteza imbere amakoperative RCA. 

Agira ati “Iyo tumaze gukora ubugenzuzi tukinjira mu kibazo bikananirana, twitabaza inzego zidukuriye nk’urugaga rw’amakoperative, byananirana tukitabaza RCA kuko ariyo ifite ubugenzacyaha, ibyo rero twarabikoze kuri ariya makoperative yombi, binaniranye tubishyikiriza RCA kandi yagaragaje ko hari amafaranga yanyerejwe muri ziriya koperative ikaba kugeza ubu ari yo ikibazo kiri mu maboko”.

Ikibazo cy’aya makoperative kigiye kongera kubyutswa Mukarere Belancilla uhagarariye ikigo gishinzwe guteza imbere amakoperative RCA mu ntara y’iburasirazuba nk’umugenzuzi, avuga ko ibibazo by’aya makoperative biri gukurikiranwa kandi hari ibyageze mu rwego rw’igihugu rw’ubugenzacyaha (RIB), ariko imwe ikaba yarabuze umwunganizi (umwavoka) ari yo KOPETWITEKI.

Yakomeje avuga ko uwayiyoboraga yarafunzwe aza gufungurwa, ni mu gihe ariko koperative ariyo yagombaga gushaka uyihagararira imbere y’amategeko, ariko kandi ngo nayo ikibazo cyayo kigiye kongera kubyutswa harebwe uko cyacyemuka, kimwe n’icya CORIMARU.

Mukarere ati: “Iriya koperative KOPETWITEKI ntiyashatse umwavoka (umwunganizi) wo kuyiburanira,bituma rero uwayiyoboraga aba umwere, ariko tugiye kongera tubikurikirane ibone umwavoka, kimwe na CORIMARU ya Rurambi, ikibazo twagishyikirije urwego rw’igihugu rw’ubugenzacyaha RIB iracyari kugikurikirana”.

Ubuyobozi bw’akarere ka Bugesera

JPEG - 288.1 kb
Ibiro by’akarere ka Bugesera

Ubuyobozi bw’akarere ka Bugesera burimo aya makoperative buvuga ko bugiye kongeramo imbaraga, aya makoperative kimwe n’ayandi ntazongere guhura n’ibi bibazo nk’uko umuyobozi w’akarere wungirije ushinzwe ubukungu Umwali Angelique, yabidutangarije.

Agira ati “Tugiye kongeramo imbaraga amakoperative ntazongere guhura n’ibihombo nka biriya, naho ku kibazo cya manager ukiri mu buyobozi, uwo ni umukozi wa koperative, nk’abanyamuryango rero bo ubwabo bafite ububasha bwo kumukura mu kazi nk’abantu bamuhaye akazi, gusa tugiye kubikurikirana”.

Ibibazo by’imicungire mibi y’amakoperative bikomeje kugenda byumvikana mu bice
bitandukanye by’igihugu, ariko igiteye inkeke akaba ari uko ujya kumva ukumva ubuyobozi bushinzwe amakoperative ndetse n’inzego z’ibanze ngo bagiye kugikurikirana, bagakwiye kugikumira kitaraba, ibi bica amarenga ngo hari umubano abayobozi b’amakoperative bahita bagirana n’izi nzego zikazabakingira ikibaba.

Umuvugizi w’urwego rw’igihugu rw’ubugenzacyaha (RIB),Madamu UMUHOZA
Marie Michelle yavuze ko dosiye z’ayo makoperative KOPETWITEKI na CORIMARU bari kuzikurikinira hafi.

Mu gihe bikomeje kugaragara ko amakoperative agenda ahombywa n’abayayobora, ikigo cy’igihugu gishinzwe amakoperative RCA kivuga ko kigiye gushyiramo imbaraga ibi bibazo ntibizongere kubaho, harimo gukurikirana amakuru y’amakoperative umunsi ku munsi, ndetse no kwigisha abanyamuryango uburenganzira bwabo kugira ngo bajye batanga amakuru hakiri kare.

JPEG - 602.9 kb
Bamwe mu banyamuryango ba koperative CORIMARU bashinja ubuyobozi bwa koperative kubarigisiriza amafaranga

Nzeyimana Viateur/MUHABURA.RW


Tanga igitecyerezo

Ibitekerezo


Tanga igitekerezo


2 Comments

Aphrodis Nizeyimana. - 4 weeks ago

Abobanyerezamitungo kumakoperative nibakurikiranwe kugirango abahinzi bayakoreramo barenganurwe ubuyobozi kandi buri gutungwa urutoki bwaribukwiriye kubikurikiranirahafi kugirango bagaragaze uruhare rwabo mugukemura ikikibazo cyaya makoperative murwego rwo kwamaganirakure umugayo bashyizweho nabari kurenganyirizwa muraya makoperative yombi. Urugero nka coop copetwiteki haravugwako komitte yasimbuye ugirumuhoza ntacyo yakoze ngo ikurikirane umutungo wanyerejwe nuwahoze ari umuyobozi wayo iyo comitte rero nihaguruke irwanye iyoruswa ishinjwa bitabaye ibyo ntacyo yaba irushije iyayibanjirije kuko batowe nkabagiye guhangana nikikibazo ariko nyamara bagaterera agati muryinyo nkaho uwomutungo wanyerejwe wagarutse nkuko batowe biyemeje guhangana nicyokibazo.

Uretse aba batunzwe intoki hejuru kandi ninzegobwite zareta zirarye ziri menge.

Aphrodis Nizeyimana. - 4 weeks ago

Abobanyerezamitungo kumakoperative nibakurikiranwe kugirango abahinzi bayakoreramo barenganurwe ubuyobozi kandi buri gutungwa urutoki bwaribukwiriye kubikurikiranirahafi kugirango bagaragaze uruhare rwabo mugukemura ikikibazo cyaya makoperative murwego rwo kwamaganirakure umugayo bashyizweho nabari kurenganyirizwa muraya makoperative yombi. Urugero nka coop copetwiteki haravugwako komitte yasimbuye ugirumuhoza ntacyo yakoze ngo ikurikirane umutungo wanyerejwe nuwahoze ari umuyobozi wayo iyo comitte rero nihaguruke irwanye iyoruswa ishinjwa bitabaye ibyo ntacyo yaba irushije iyayibanjirije kuko batowe nkabagiye guhangana nikikibazo ariko nyamara bagaterera agati muryinyo nkaho uwomutungo wanyerejwe wagarutse nkuko batowe biyemeje guhangana nicyokibazo.

Uretse aba batunzwe intoki hejuru kandi ninzegobwite zareta zirarye ziri menge.

Izindi nkuru