Yashyizweho kuri28 January, 2019 | 09:43

Abayobozi b’ibitangazamakuru barasabwa gukoresha umwanya wabo neza no kumenya icyo bagamije

Umunyamabanga nshingwabikorwa w’inama nkuru y’itangazamakuru mu Rwanda [MHC],Mbungiramihigo Peacemaker yacyebuye abayobozi b’ibitangazamakuru abereka bimwe mu bibazo bagomba kwibaza bikazabafasha kumenya icyo bari cyo ndetse n’icyo bagamije.

Ibi ni ibyagarutsweho mu gikorwa cyo gusoza amahugurwa abayobozi b’ibitangazamakuru bagiriye mu karere ka Musanze,yamaze iminsi itandatu guhera tariki ya 21 kugeza 26 Mutarama 2019.Aya mahugurwa yari agamije kongerera ubumenyi abayobozi b’ibitangazamakuru mu birebana no kumenya kubiyobora mu buryo bugezweho ndetse no kubibyaza umusaruro.

Mu ijambo ryo gusoza ayo mahugurwa umunyamabanga nshingwabikorwa wa MHC,Mbungiramihigo Peacemaker yeretse abayakurikiranye,bimwe mu bibazo bakwiye kwibaza bikabafasha kumenya icyo bari cyo ndetse no kwisuzuma bakamenya aho bavuye,aho bageze naho bagana.

Ati”Ese nahisemo umwuga nkwiye koko cyangwa nawugiyemo kuko nari nabuze ikindi nkora?Icyo nahisemo nicyo gikwiye niyo career (umwuga) wanjye uzangirira akamaro?

Ese impano Imana yampaye ndazikoresha ku buryo burenze cyangwa nkoresha 50% ubundi nkiryamira nkavuga nti yego ibindi nzabikora ejo?

Bityo ngo nyuma yo kwibaza ibi bibazo bizajya bibafasha gushyira mu bikorwa inshingano zabo za buri munsi,banagenera umwanya ukwiye akazi ndetse n’ikiruhuko.Aha yababwiye ko bagomba gufata umwanya Imana yabahaye bakawugabanyamo ibice bitatu.

Urugero yabahaye ni nk’amasaha agize umunsi wose 24,aho bibaye byiza bayagabanyamo amasaha 8 y’akazi,amasaha 8 yo kwihugura ndetse n’andi 8 yo kuruhuka no kungurana ibitekerezo n’abandi.

Yababwiye ko n’ubwo umwuga binjiyemo ari impano ariko bagomba no kumenya ko ari umuhamagaro uzabafasha kwiteza imbere no gukorera abandi dore ko uyu mwuga w’itangazamakuru ufatwa nk’ijwi rya rubanda.

Ati”Abemera Imana twemera ko Imana iba yaraguhaye impano nk’uko nabivugaga ariko nanone ni n’umuhamagaro.Icyo mwahisemo ni umuhamagaro no gukorera abandi ndetse nawe ukaba uwo gutera imbere mu buzima bwawe ariko noneho unafatanya n’abandi mukubahiriza amahame Imana idusaba nk’abayemera”.

Umunyamabanga nshingwabikorwa wa MHC,Mbungiramihigo yasabye abayobozi b’ibitangazamakuru gushyira mu bikorwa ibyo Biyemeje ntibibe amasigarakicaro no kumenya gukora igikwiye nk’abayobozi

Yasoje abizeza ubufatanye mu gushyira mu bikorwa imwe mu myanzuro biyemeje mu rwego rwo kubaka igihugu ndetse n’itangazamakuru byifuzwa ariko

Ati”Ndagira ngo mbashimire mbizeza ko imyanzuro mwafashe twiteguye kubafasha kuyishyira mu bikorwa,…urugendo twatangiranye tukarusoza twubaka u Rwanda twifuza muri rusange no kubaka itangazamakuru twifuza by’umwihariko”.

Muri aya mahugurwa abayobozi b’ibitangazamakuru bifuje ko bakongera bagahabwa andi mahugurwa kugira ngo ubumenyi bahawe bwo kumenya gucunga ibigo bayobora neza ndetse no kubibyaza umusaruro bwiyongere.

Umuyobozi w’inama nkuru y’itangazamakuru mu Rwanda icyo kifuzo yagihaye umugisha abizeza ko bagiye gushaka abafatanyabikorwa kugira ngo kizashyirwe mu bikorwa kuko ari kimwe mu byo inama nkuru y’itangazamakuru ifite mu nshingano.

Ese aya mahugurwa yasigiye iki abayobozi b’ibitangazamakuru?

Mu kutarya indimi ,abayobozi b’ibitangazamakuru bishimiye ubumenyi bakuye muri aya mahugurwa aho bamwe bemeza ko hari byinshi batari bazi ariko amasomo bahawe yabafashije gusobanukirwa n’ibyo babonaga ko bidashoboka.

Umwe mu baganiriye na Muhabura.rw witwa Bakomere Pascal akaba ari umuyobozi w’Impamba.com, kuri we ngo yungukiyemo byinshi akenshi yabonaga ko badashoboka kandi bishoboka.

Yagize ati”Ariya mahugurwa nayishimiye kuko hari byinshi yamfashije kunguka.Urugero nko gusheyaringa (gusangiza) inkuru najyaga mbikora bingoye aho najyaga kuri Facebook n’ahandi nkatinda.Ariko batweretse uburyo ufata inkuru ukayisangiza abantu ku mbuga nkoranyambaga mu buryo bwihuse ukoresheje umwanya muto cyane mu gihe byantwaraga umwanya munini.”

Ikindi yishimiye ngo ni impanuro bahawe n’umuyobozi w’inama nkuru y’itangazamakuru mu Rwanda nk’iyirebana n’uko bagomba kumenya imyitwarire yabo nk’abayobozi ko itandukanye kure n’imyitwarire y’abo bayobora ndetse n’ikoreshwa neza ry’umwanya n’igihe mu kazi kabo.

Mu gihe babaga bari mu guhugurwa byari ukwiga nk’uko bimenyerewe mu yandi mashuri umutima uri ku masomo mashya bahabwaga
Abayobozi b’ibitangazamakuru bahawe impamyabumenyi nyuma yo gusoza amasomo

Chief Editor/MUHABURA.RW


Tanga igitecyerezo

Amazina
Ubutumwa

Izindi nkuru

Inkuru zikunzwe