Yashyizweho kuri18 October, 2018 | 09:54

Abatorotse barahigwa bukware :Abantu 358 bari baracitse ubutabera basubijwe muri gereza

Komisiyo y’Igihugu yo kurwanya Jenoside (CNLG) iratangaza ko irimo gukora ibishoboka byose ngo abantu bacitse ubutabera batasoje ibihano byabo bongere bafatwe.Mu bashakishwaga abamaze gufatwa bagera kuri 358 basubijwe mu magereza no mu mirimo nsimburagifungo ifitiye igihugu akamaro izwi nka TIG.

Ibi ni ibyagarutsweho na Dr. Bizimana Jean Damacsene, Umunyamabanga Nshingwabikorwa wa CNLG mu kiganiro n’itangazamakuru.

Yagaragaje ibimaze gukorwa ngo abantu bihishe cyangwa batorotse batarangije ibihano byabo bafatwe “mu rwego rwo guca umuco wo kudahana mu Rwanda.”

Yagize ati “Dufatanyije n’izindi nzego turimo turashakisha abantu bahamijwe ibyaha bya Jenoside batararangiza ibihano byabo bakaba bihishe hirya no hino mu gihugu no hanze yacyo, abamaze gufatwa ni 358, basubijwe muri gereza abandi bajyanywe gukora TIG kugira ngo basoze ibihano byabo.”

Dr. Bizimana yanasobanuye indi mibare y’abantu bashakishwa n’abasuzumirwa amadosiye kugira ngo harebwe niba koko amakuru bahawe n’abaturage ari ukuri.

Avuga ko hari abantu 167 bazwi aho batuye kandi bakatiwe n’Inkiko Gacaca, gusa ngo harimo kugenzurwa amadosiye yabo ya Gacaca ngo harebwe niba amakuru bahawe ari ukuri, niba batararangije ibihano byabo cyangwa niba batarakatiwe ku rwego rwa mbere bajurira bakagirwa abere.

Ati “Hari abumva ko aba bantu batasoje ibihano bazwi aho batuye bakibaza impamvu badafatwa, ntidushobora gutanga itegeko ryo gufata abantu tutarasuzuma amadosiye yabo. Ubu ni byo turimo, hari ushobora kuba ari ku rutonde rw’abakatiwe, ariko wajya kureba ugasanga yarakatiwe ku rwego rwa mbere imyaka 15, yajurira akagirwa umwere, hari n’uwo ushobora gusanga yararangije ibihano bye.”

Hari kandi abantu 1072 bahungiye mu tundi turere na bo barimo gushakishwa ku bufatanye bwa CNLG n’izindi nzego, na byo birimo gusuzumwa.

Ku kibazo cy’abantu 204 bahamijwe icyaha cya Jenoside n’Inkiko Gacaca bagakatirwa batari mu gihugu, abo na bo dosiye zabo ngo zatangiye gusuzumwa ngo hamenyekane aho bari n’ibihano bari barahawe.

Hari kandi abantu 95 batazwi aho baherereye, na bo bakaba bashakishwa ku bufatanye bw’inzego zirimo na Polisi Mpuzamahanga (Interpol) hirya no hino mu bihugu.

Dr.Bizimana avuga ko iyi mibare idakwiye kwibazwaho cyane n’abantu, ngo bumve ko ibara ryaguye, abantu bidegembya kandi barahamijwe ibyaha.

Asobanura ko umuntu iyo amaze kubonerwa dosiye igasesengurwa, nta masaha abiri arangira atarafatwa.

Yongeyeho kandi ko n’iyo dosiye y’umuntu bivugwa ko yacitse ubutabera ibonetse, inzego zirabimenyeshwa akaba acungirwa hafi aho kugira ngo nimara gusuzumwa ahite afatwa bidatinze.

Bizimana avuga ko nta na rimwe inzego zizarebera abantu bidegembya hanze batararangije ibihano byabo, gusa ngo na none ni ngombwa kubikorana ubushishozi kugira ngo hatagira urengana.

Salongo Richard


Tanga igitecyerezo

Amazina
Ubutumwa

Izindi nkuru

Inkuru zikunzwe