Yashyizweho kuri1 October, 2018 | 09:22

Dr.Kayumba yibasiye Polisi y’u Rwanda ayishinja kumuhohotera

Dr.Kayumba Christopher yagaragaje ko yinubiye imikorere ya polisi y’ u Rwanda ndetse anagaragaza ko akomeje kugirirwa ihohoterwa nyuma yo kongera gufatwa na polisi ikorera mu muhanda mu gitondo cyo kuwa 29 Nzeri 2018, azira gutwara yanyoye inzoga.

Abinyujije ku rubuga rwe rwa Twitter,Dr. Kayumba mu magambo akarishye cyane yabwiye polisi y’ igihugu, yayavuze yivuye inyuma abanza kwibutsa ko mu by’ umweru bike bishize yafunzwe iminsi 10 ngo nyuma asabwa amafaranga ibihumbi 500 kugira arekurwa.

Kuri iyi ngingo, Dr.Kayumba yeruye avuga ko muri rusange nta kibazo afitanye na polisi y’ u Rwanda ariko yikoma ubuyobozi bukuru avuga ko aribwo bafitanye ikibazo.

Polisi y’ u Rwanda nayo yahise isubiza ikoresheje Twitter yemeza ko imodoka ya Dr. Kayumba yafashwe mu gikorwa cyo gukumira abashoferi batwara basinze. Polisi yagize iti” Iki gikorwa kiba kigamije gukumira impanuka no kurinda ubuzima bw’ abaturage n’ ibindi byakwangirika biturutse ku mpanuka ziterwa n’ ubusinzi”.

Na none polisi yakomeje ivuga ko Dr. Kayumba ari umunyarwanda kimwe n’ abandi imusaba kuba yayegera, urwego rw’umuvunyi ndetse na RIB akabagezaho ikibazo cye bakaba bamurenganura mu gihe ari ngombwa.

Aha, Dr. Kayumba yahise avuga ko yafashwe ubwo yajyaga gufata umuvandimwe ngo bajye gusura umuryango wabo mu Bugesera.

Yakomeje anemeza ko polisi ikomeza kumugendaho ivuga ko yayirwanyije akayishinja ko imuhoza ku nkeke kuva muri 2012 ubwo nabo yagiranye nayo ikibazo gisa n’ iki.

Mu nyandiko ye ikakaye cyane kandi yibasira uburyo akomeje gutotezwa, Dr. Kayumba yanatunze polisi agatoki ayibutsa ko ibuza itangazamakuru gukorera mu mudendezo n’ ubwisanzure.

Yanashimangiye kandi ko ifungwa ry’ ikinyamakuru cye The Chronicle ndetse n’ umunyamakuru Idrissa Byiringiro avuga ko yarenganye ngo kuko yakorewe ubugenzuzi budasobanutse birangira akatiwe igifungo.

Gusa hari bamwe mu bakoresha urubuga rwa Twetter bamugaragarije ko Polisi y’u Rwanda ari indashyikirwa kw’isi mu bikorwa byiza.

Uwitwa Pierre Gahindiro yagize ati"Ntabwo nemeranywa ku byo uvuga.Mfitiye ikizere RNP kandi ndibaza ko hari byinshi ngenderaho nk’umwanya iriho muri Afurika ndetse ikaba n’iya 13 ku rwego rw’isi (WEF Competitiveness Report 2018).Niba ufite ibindi wajya ku bayobozi b’ukuri bayo".

Dr Christopher Kayumba, ni umushakashatsi waminuje mu rwego rwo hejuru mu bijyanye ni Itangazamakuru , iterambere , gukemura amakimbirane ndetse akaba n’ impuguke muri Politiki akaba n’umwarimu muri Kaminuza y’u Rwanda.

Mbungiramihigo Peacemaker (umunyamabanga Nshingwabikorwa w’Inama nkuru y’Itangazamakuru mu Rwanda) na Dr Christopher Kayumba uyu azwiho cyane kwifashishwa n’urwego rw’igihugu rw’itangazamakuru muri imwe mu myanzuro ihafatirwa ndetse agaragara cyane mu bikorwa by’amahugurwa iki kigo gitanga

Amafoto y’ibyo yavuze kuri Twetter

Yanditswe na Habarurema Djamali


Tanga igitecyerezo

Amazina
Ubutumwa

3 Comments

Hhhaa aaa - October 2018

Wowe witwa Kayirebwa uzabimenya byakugezeho cga byageze kuri famille yawe ubu ntacyo umuntu yakubwira

Manzi Patrick - October 2018

Naba nawe ufite uko uvuga twebwe rubanda rugufi twavugira he? Umupolisi araguha ta agakoresha amarangamutima ye bitewe nuko abyumva kubera imbaraga afite , kdi ntiyibuke ko yazihawe na leta. Gusa ngirango ntago abapolisi bo mumuhanda bagikurikiza amategeko agenga umuhanda ahubwo bakurikiza amategeko yo gushaka amafranga, arko ntakundi niko isi yubatse. Njyewe ndanenga Umupolisi witwa Eric ufite inyenyeri 2 yarandenganyije ngiye gusaba kurenganurwa, aho njyeze hose nkasanga yarahantanze nuko ndambiwe njya kwishyura. Arko ntakundi niko isi yubatse. Murakoze

Kayirebwa Chantal - October 2018

Uyu mugabo najyaga mufata nk’inyangamugayo none ndabona nawe nta bunyangamugayo yifitemo, Polisi y’u rwanda idukorera yinshi kuburyo ntacyo mbona cyatuma irenganya umuntu umwe kuri uru rwego. Ibi nibyo bita guharabika rwose, iyo unaniwe kwi controla warangiza ukagerekaho no kubeshye abakora neza harya wowe uba uri hejuru y’amategeko? Disi Polisi yacu yaragawe n’abayituka irabasubiza rwose!!!!!!! Twishimiye ibyo polisi yacu yagusubije kandi n’ubunyamwuga bukomeje kuyiranga. Umutekano n’ishingano ya buri wese utibagiwe nabo ba Dr

Izindi nkuru

Inkuru zikunzwe