Yashyizweho kuri8 January, 2019 | 21:34

Zambia:Ikinyobwa cyongera umurego w’igitsina cy’umugabo cyahagaritswe ku nyobwa

Abategetsi ba Zambia bategetse ishyirahamwe ryo muri icyo gihugu, guhagarika gukora ikinyobwa cyongera imbaraga bivugwa ko gituma umugabo yayinyoye igitsina cye kigumana umurego (erection) umwanya munini.

Iki cyemezo gifashwe nyuma y’aho ibiro bya Uganda bishinzwe kugenzura ibicuruzwa byujuje ubuziranenge (UBS) bitangaje mu ibaruwa yo kuri tariki 4 Mutarama uyu mwaka ko byapimye icupa rya Natural Power SX, nyuma y’aho uwayinyoye yirase cyane avuga ko yabize ibyunzwe ndetse ko igitsina cye cyafashe umurego amasaha agera kuri atandatu yose.

UBS yavuze ko muri iyo nzoga harimo umuti witwa slidenafil citrate ukoreshwa mu kuvura umuntu afite ikibazo cyo kutagira umurego kw’igitsina gabo (impuissance).

Iki ikinyobwa gikorwa n’ishyirahamwe rya Revin Zambia Limited, riri i Ndola mu majyaruguru y’icyo gihugu.

Umuyobozi w’iyo kompanyi Vikas Kapoor, yabwiye BBC Newsday ducyesha iyi nkuru ko uko abizi iyo nzoga itabamo umuti n’umwe.

Mu itangazo ryashyizweho umukono n’impande zirebwa n’iki kibazo zirimo ikigo gishinzwe kugenzura imiti, akarere ka Ndola ndetse n’ikigo cya Zambia gishinzwe kureba ko ibicuruzwa byujuje ubuziranenge, bavuze ko batangije iperereza kandi ko bazatangariza abaturage ibyavuye muri iryo perereza.

Iryo tangazo rgira riti "Ibizava muri iri perereza bizatangarizwa abaturage vuba bishoboka igihe ibizamini bizaba bimaze kumenyekana."

Gusa abaturage bo muri Zambia ntibumva uburyo Leta yafata icyemezo cyo guhagarika icyo kinyobwa bitewe n’igihugu cy’amahanga mu gihe abaturage bo babona ntacyo kibatwara iyo bakinyoye.

Kuri ubu mu gihugu cya Uganda abategetsi batangiye guhiga bukware abacuruza ibyo binyobwa ndetse no kubifata.

Yanditswe na Habarurema Djamali


Tanga igitecyerezo

Amazina
Ubutumwa

Izindi nkuru