Yashyizweho kuri3 April, 2019 | 13:43

Venezuela:Ubusabe bwo kwambura ubudahangarwa Guaido wigize perezida bwakiranwe yombi

Inama nkuru y’iguhugu cya Venezuela ishinzwe guhindura itegeko nshinga (Constituent Assembly) yatse Juan Guaidó umuyobozi w’abatavuga rumwe na Leta ubudahangarwa asanzwe ahabwa n’uko ari umwe mu bagize inteko ishingamategeko y’icyo gihugu ibi binashobora gutuma ahagarikwa.

Abagize iyo nama bemeje bose nta n’umwe avuyemo ibyasabwe n’urukiko rukuru rwa Venezuela.

Iyo nama igizwe n’abayoboke ba Prezida Nicolás Maduro wa Venezuela ibonwa ko ari ukugerageza guca inyuma inteko y’abadepite isanzwe yiganemo abatavuga rumwe na leta.

Urukiko rukuru ruheruka kuvuga ko Guaidó yokurikiranwa ku cyaha cyo kurenga ku itegeko ryamubuzaga kurenga imipaka y’igihugu igihe yakoraga urugendo rwamugeje mu bihugu bya Amerika y’Epfo mu byumweru bishize.

Urwo rukiko nanone ruherutse kubuza Guaidó gusubira kuyobora amabanga ya leta mu yindi manda y’imyaka 15, rurongera kandi rufunga Roberto Marrero uyoboye ibiro bya Guaidó wanahagaritswe ashinjwa iterabwoba.

Guaidó we avuga ko icyo cyemezo kinyuranyije n’itege nshinga ry’iki gihugu.

Avuga kuri iyo ngingo, atangaza ko "ntagusubira inyuma", n’ubwo yabwirwa ko ashobora gushimutwa n’inzego za leta.

Guaidó yitangaje ko ari we mukuru w’igihugu w’agateganyo wa Venezuela mu kwezi kwa Mutarama uyu mwaka wa 2019, akaba yarahise ashyigikirwa n’ibihugu birenga 50 birimo na Amerika.

Gusa ku rundi ruhande Perezida Madura nawe afite ibindi bihugu bikomeye bimushyigikiye nk’Uburusiya n’Ubushinwa, kandi akaba ashyigikiwe n’igisirikare cy’icyo gihugu.

Yanditswe na Habarurema Djamali


Tanga igitecyerezo

Amazina
Ubutumwa

Izindi nkuru