Yashyizweho kuri29 April, 2019 | 03:48

Uwari umugabo wa Aline Gahongayire yahishuye ibaruwa yanditse bagitandukana irimo amasomo yakuye mu rushako rubi

Gahima Gabriel wari umugabo wa Aline Gahongayire yahishuye ibaruwa yandikiye abasore b’ingaragu bateganya kurushinga ababurira ku byo bagomba kwitondera mu gihe baba bagiye gushaka umugore.

Amagambo agize iyi baruwa yanyujijwe mu itangazamakuru muri Werurwe 2017 nk’igitekerezo gisanzwe, aho yagaragaje ingeso 10 umusore akwiye kwitondera mu gihe agiye gushaka umugore. Ku wa 27 Mata nibwo Gahima yahishuye ko ibikubiyemo ari ibyo yabonye mu rushako.

Iyi baruwa yasohotse Gahima amaze imyaka ibiri atandukanye na Gahongayire, ariko bakiburana mu rukiko bashaka ngo bahabwe gatanya mu mategeko.

Ati “Icyo nifuzaga cyari gusangira n’abandi amasomo nari narangije kwiga. Ngaho nimumpe amanota rero…”

Ubu butumwa Gahima abubyukije mu gihe Gahongayire akomeje kugaruka mu itangazamakuru nyuma yo kuryibasira ashingiye ku bibazo ryamubajije ubwo inkuru y’ugutandukana kwe na Gahima yajyaga hanze, akabitangariza kuri Radio Ijwi rya Amerika, ngo nibo bari ku rwego rumwe.

Gahongayire na Gahima bakoze ubukwe tariki 20 Ukuboza 2013, batandukanye byemewe n’amategeko mu Ugushyingo 2017.

Mu bakobwa Gahima yasabye abasore kwirinda igihe bagiye gushaka harimo Nyiramahane, Nyirakwikunda, Nyirankundibintu, Nyirankundabose, Mukundabirori, Nyirampabwabyose, Nyiranshaka- care, Nyiramagambo, Nyirantacyoniyemeza na Nyiragashizisoni.

Iyo baruwa ariko yatanzweho ibitekerezo binyuranye, aho nka Pelagie Dusabe yamusubije ko byari kuba byiza iyo avuga impande zombi, ntatunge intoki uruhande rumwe.

Ati "Burya uca imanza yumva impande zombi. Naho gushaka burya bisaba gushishoza iyo utagenzuye uhura n’umubabaro mu rushako.”

Undi we yavuze ko izo ngeso zose ziravurwa zigakira, ku buryo iyo watsinzwe kuzivura no gufasha uzifite na we akwiye kwemera ko afite intege nke.

Ati “Ubutaha uzandike no ku ngeso n’imyitwarire umusore ugiye gushaka akwiye kwiyambura akazisiga inyuma kugira ngo azashobore kubaka urugo yifuza.”

“Uzanabandikire ubigishe uko ibibazo by’ingo bishakirwa umuti urambye, bitari ugusigana icyasha hirya no hino mu bishingiye business zabo. Uzanabigishe ko burya urugo rugira aho rwubakirwa hatari mu ruhame rwa benshi, unabigishe kudatoneka ibisebe by’abo bashakanye cyangwa bazashakana.

Ibaruwa ifunguye ya Gahima

Murumuna wanjye nkunda, dore urakuze ugeze igihe cyo gushaka umugore ariko ntega amatwi nguhanure ndi mukuru wawe, hato utazagwa mu ruzi urwita ikiziba.

N’ubwo twese tuzi ko nta muntu utunganye bivuze ko ari wowe ari nanjye nta malayika uturimo, hari ingeso zimwe na zimwe ushobora kwirengagiza ku mukobwa wahitamo ngo murwubakane kubera uburanga bwe cyangwa ibindi nyuma bikazakugaruka nabi, niyo mpamvu nka mukuru wawe nkwandikiye kugira ngo ngire ibyo nkugiraho inama ngo ejo utazicuza.

Muri iyi baruwa, ndashaka kukwereka ingeso 10 udakwiye kuzihanganira na rimwe ku mukobwa uzatekereza ko mwashakana mukubaka.

Muri aba bakobwa bose, uzitondere kurushaho uwa 3, uwa 4 n’uwa 10 kuko ni babi kurusha abandi bose. Aba utabitondeye n’iyo mutashakana gutindana nabo ubwabyo byakuzanira akaga.

1.NYIRAMAHANE: Uzi wa mukobwa uhora arakaye, umwe uhora avugisha ab’igitsina gabo nabi? Burya nta kabura imvano mwana wa mama, ushobora gusanga aba yarababajwe kenshi n’abandi bahungu. Umukobwa nk’uwo umujinya we uba ufite ishingiro, uzumve ko hari igihe na kimwe ashobora kuvuga abagabo neza, buri gihe cyose abavuga nabi kuko niko abazi.

Bishobora kuba atari ukubabazwa n’abahungu benshi mu rukundo ariko ugasanga na se atarigeze yita kuri nyina, bikaba ari byo byamuteye umujinya ku bantu b’igitsina gabo muri rusange. Ntabwo ukeneye bene uyu mukobwa kuko igihe bizabaho ukagira icyo umubabazaho n’iyo waba utabigambiriye, uzitegure ko azagushyiraho amakosa yose azi ku bantu b’igitsina gabo bose kandi ntuzanabasha kubikemura kuko utazigera umenya n’icyo ugomba gusabira imbabazi.

2.NYIRAKWIKUNDA: Niba ukeneye kubaka urugo rurangwamo umunezero uririnde umukobwa wikunda byo gukabya, umunezero uzanwa n’uko mwembi muwifurizanya kandi hamwe ukora ibishoboka byose ngo mugenzi wawe na we anezerwe. Umukobwa wikunda cyane ahora ashaka kunezezwa kandi ntabwo yumva ko na we afite inshingano yo kwita ku munezero w’abandi. Umukobwa uhora ashaka kuba uwa mbere muri byose, umwe uzakubwira inkuru z’umunsi we w’amavuko gatatu kugira ngo uwumenye atarakubaza uwawe, ntabwo azigera aguha urugo rurangwamo umunezero.

3.NYIRANKUNDIBINTU: Mwana wa mama uragendere kure y’umukobwa ukunda ibintu cyane. Niba iyo atari kuvuga imodoka ya kanaka aba ari kuvuga telefone yabonye aha n’aha cyangwa akaba arimo kuvuga ikanzu runaka yambaye cyangwa isakoshi igezweho, uramenye rwose ubishoboye ntuzigere unafata izina rye mu mutwe. Umukobwa muhura buri gihe ukumva ikimushishikaje cyane ni ibintu nk’ibyo nushakana na we ntuzagirengo sinakubwiye.

4.NYIRANKUNDABOSE: Waba ukururwa na wa mukobwa usekera buri mugabo wese? Umwe mbese umeze nk’akanyugunyugu uvugana na buri mugabo wese akagenda atekereza ko yamukunze? Mwana wa mama uramenye rwose kuko burya ingeso ishira ari uko nyirayo yapfuye kandi ndabizi ko bitazagushimisha kumenya ko umugore wawe yirirwa akururukana n’abagabo bose muturanye, abiganye na we, abo bamenyaniye mu kazi n’ahandi bose akumva yabagira abe.

5.MUKUNDABIRORI: Ikizakubwira Mukundabirori, nta kirori aba atatumiwemo kandi ntacyo ajya asiba n’iyo yaba atameze neza, ahora yambaye imyenda igezweho ijyanye na buri kirori umubonye wese ntashidikanye ko ari umunyamugi. Iyo atari kuvuga uko ikirori cy’ubushize cyagenze aba avuga ibizabera mu kirori gitaha.

Mbese wa wundi uhora afite ubwoko bw’ibirori bidashira, ngaho ni anniversaire, baby shower, bridal shower cyangwa house party agomba kwitabira. Ntuzatekereze ko bene uwo mukobwa azatuza ngo ni uko yubatse, azakomeza gutyo kandi bene uwo mwubakanye yarugusenyeraho rubanda bamureba bakabona ni umunyarugwiro ndetse ahubwo mwagirana ikibazo bakavuga ko ari wowe udashobotse.

6.NYIRAMPABWABYOSE: Umukobwa wakuze ahabwa ibintu byose ashaka, yaba abikeneye cyangwa atabikeneye, umwe utarigeze agira icyo avunikira cyangwa ikindi kintu kimusaba kwitanga ngo akigereho ntashobora kukubera umugore mwiza.

N’ubwo waba utekereza ko ushobora kumuha ubuzima nk’ubwo yari asanzwe afite iwabo, ugomba kwibuka ko kubaka bizana abana kandi abana basaba ubwitange ndetse no kwemera kuvunika. Kubaka urugo ubwabyo ni ukwiyemeza kuvunika no guhangayikira ahazaza h’umuryango. Umukobwa utarigeze agira icyo yitangaho cyangwa ngo ashimishwe n’ibyo yavunikiye mu buzima bwe mutarabana ntabwo azabyigira iwawe.

7.NYIRANSHAKA-CARE: N’ubwo ari ibisanzwe ko abakobwa n’abagore bakunda kwitabwaho bimwe ab’ubu mwita "Care", umukobwa ushaka kwitabwaho cyane ntabwo ashobora kubaka ngo rukomere. Umugabo mwiza yita ku mugore we uko ashoboye ariko ntabwo bishoboka ko yabikora buri gihe cyose, umugore muzima agomba kumenya ko umugabo we amukunda kandi ko amwitaho n’iyo yaba atari kumwe nawe.

Umukobwa udashaka ko ugira akanya n’inshuti zawe cyangwa abavandimwe bawe kuko buri gihe utari ku kazi aba ashaka ko uba iruhande rwe cyangwa umwe ushaka ko muba muri kumwe ahantu hose igihe cyose ntabwo ashobora kukubera umugore mwiza kuko igihe bitazashoboka ko muba muri kumwe azumva ko urimo kumuca inyuma cyangwa gukora ayandi mabi. Hari n’abakabya noneho n’akazi akumva ukabya, akagucyurira ko ukamurutisha, ko ugakunda cyane ukwiye kugabanya na we ukajya umwirebera, uyu uzamwitondere kuko umunsi wamuhinguka imbere umubwira za "Ndagukunda" yaburaye yagukuramo iyo kotsa.

8. NYIRAMAGAMBO: Mbese umukobwa wabengutswe yaba ashishikazwa n’iby’abandi kurusha ibimureba? Yaba se ari wa mukobwa usanga iyo atari kuvuga uko ba kanaka babayeho aba arimo kuvuga icyo kanaka atunze cyangwa araye akora? Umwe mbese uvuga abitwara nabi, abo abona ari abaturage badasobanutse n’ibindi nk’ibyo yibanda cyane ku buzima n’imibereho by’abandi.

Uramenye rwose ntabwo ukeneye bene uyu mukobwa kana ka mama, uyu ntiyazakubera umugore muzima. Kubaka bisaba kwita ku bikureba, mukajya inama ndetse mukiha n’intego. Niba mugenzi wawe ashishikazwa n’iby’abandi kurusha ibibareba ubwanyu umenye ko utazigera utsinda intambara urimo kurwana.

9. NYIRANTACYONIYEMEZA: Umukobwa udashobora kugira ikintu na kimwe yiyemeza ngo abe aricyo akora cyangwa yiga, umwe usanga ahora ashaka ikintu gishya yahugiramo, utangira ikintu bitamaze kabiri akagishingukamo, uwo ntabwo yakwiyemeza kubaka ntuzigere utakaza igihe cyawe kuri bene uyu mukobwa. Erega uwo ntafatika utamwitondeye wazashiduka na we akuvuyeho, ibye uba usanga bidafite gahunda ihamye.

10. NYIRAGASHIZISONI: Niba buri gihe umukobwa ukunda ahora avuga nabi ndetse agashira isoni ku bantu n’iyo baba ari abo atekereza ko bari munsi ye, ntuzirirwe unamutekerezaho rwose. Wibuke ko umugore rubanda babona ari mwiza ari ugwa neza, umwe wubaha abantu rubanda bakajya bavuga bati kanaka ni we ufite umugore abandi barabeshya. Uwo mukobwa usuzugura gutyo, nimubana burya na we ntuzagire ngo kugusuzugura akakureba nk’icyo imbwa ihaze bizamugora.

Ndibaza ko nagerageje kukunyuriramo muri macye uko mbitekereza, ahasigaye ni ahawe mwana wa mama uzitonde kandi ufate akanya kawe witegereze neza unasenge kuko umugore mwiza umuntu amuhabwa n’Imana, ariko kandi Imana yanaguhaye ubwenge ngo ujye ubukoresha mu gushishoza umenye icyiza n’ikibi.

Yari mukuru wawe ugukunda cyane!

Niyomugabo Albert/MUHABURA.RW


Tanga igitecyerezo

Ibitekerezo


Tanga igitekerezo


5 Comments

clare - 3 months ago

Icyo mbona nuko uyu mugabo nawe akwiye kwisuzuma ntazaburamo ingingo zimufata zigaragaza ko nawe atananiwe n’umugore nawe hari ibyo afitemo intege nke zatumye batana.

Benithe - 3 months ago

Amos hari umuhungu twahuye ambwira ko yabuze umukobwa bose ntakigenda
Naramugenzuye nsanga afite ikibazo cyo kwikunda cyane, yumvaga ariwe ukwiye ibyiza
Akwiriye kubahwa ariko bidasanzwe mbese wumvaga ashaka cyaane
Icyo nakubwira rero ntago bipfa kubaho ko abantu boose byanga , wenda 1 2 3 4 byakwanga
Ariko burya iyo bikomeje kwanga nawe uba ufite akantu , uzigenzure wibwize ukuri nawe urebe ko uri shyashya .

Benithe - 3 months ago

Amos hari umuhungu twahuye ambwira ko yabuze umukobwa bose ntakigenda
Naramugenzuye nsanga afite ikibazo cyo kwikunda cyane, yumvaga ariwe ukwiye ibyiza
Akwiriye kubahwa ariko bidasanzwe mbese wumvaga ashaka cyaane
Icyo nakubwira rero ntago bipfa kubaho ko abantu boose byanga , wenda 1 2 3 4 byakwanga
Ariko burya iyo bikomeje kwanga nawe uba ufite akantu , uzigenzure wibwize ukuri nawe urebe ko uri shyashya .

amos - 3 months ago

Abo nigeze nkundana nabo Bose nagize ubutwari bwo kubareka
Ariko ibi byose najyaga mbibona. Nahisemo kwiberaho jyenyine. Nabuze umukobwa ufatika pe nukwitonda cyane

- 3 months ago

Ubwambere mbanje, kubakengurukira kurizo mpanuro muduha.Kukaba nk’akwo IMANA niyo itanga umugore. Ndiko ndaraba iyo murwi cumi mwavuz,nasanze ikubiyemwo inyifato za bakobwa bose babaho kw’isi.Icombona rero nuko twosenga IMANA ikaduhingurira abafasha beza ,tuzoshobora kubana neza.

Izindi nkuru