Yashyizweho kuri4 December, 2019 | 13:51

USA:Hasohotse icyegeranyo cy’amapaji 300 kirimo impamvu nyinshi zo kweguza Perezida Donald Trump

Ibimenyetso bijyanye no kweguza Perezida Donald Trump w’Amerika kubera imyitwarire mibi ku butegetsi ni byinshi cyane, nkuko bitangazwa n’abagize akanama kayoboye iperereza rigamije kumweguza.

Icyegeranyo cy’ako kanama kivuga ko Perezida Trump yashyize inyungu ze bwite za politiki hejuru y’inyungu za Leta Zunze Ubumwe z’Amerika nk’igihugu.

Kivuga ko ibyo yabikoze agerageza gusaba kwivanga kw’amahanga asaba Ukraine kumufasha ngo azongere gutorwa mu matora yo mu mwaka utaha wa 2020.

Icyo cyegeranyo cy’amapaji 300 cyatangajwe ku munsi w’ejo ku wa kabiri kigamije gutanga ishingiro ryo guheraho mu gukura Trump ku butegetsi.

Kivuga ko cyatahuye ibikorwa byamaze amezi bya Perezida Trump byo gukoresha ububasha ahabwa n’umwanya arimo mu gusaba kwivanga kw’amahanga ku ruhande rwe mu matora yo mu 2020.

Trump ahakana avuga ko nta kibi yakoze, ndetse yavuze ko iryo perereza rigamije gusa kumwibasira.

Mbere yuko imbanzirizamushinga yacyo itangazwa, Perezida Trump - wo mu ishyaka ry’abarepubulikani - yamaganye iryo perereza riyobowe n’abo mu ishyaka ry’abademokarate.

Yavuze ko rigaragaza kudakunda igihugu na busa.

Nyuma y’itangazwa ry’icyo cyegeranyo, Stephanie Grisham, umunyamabanga w’ibiro bya perezida w’Amerika bya White House, yavuze ko abademokarate "bananiwe kugaragaza na busa ikimenyetso na kimwe cyo gukora nabi [kwa Trump]".

Madamu Grisham yongeyeho ko icyo cyegeranyo "nta kindi kigaragaza kitari ukumanjirwa kwabo [abagikoze]".

Ubu iki cyegeranyo kigiye mu kanama k’ubucamanza ko mu nteko. Aka kanama karatangira kugisuzuma kuri uyu wa gatatu ndetse gasuzume ibirego byo kweguza ku mugaragaro Trump.

Niyomugabo Albert/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru