Yashyizweho kuri30 April, 2019 | 16:26

Umwami w’abami Akihito yatanze inkoni y’ubwami,abaye uwa mbere mu myaka 200 ishize

Umwami w’abami Akihito w’Ubuyapani yatangaje ko atanze inkoni y’ubwami mu birori byabereye ku murwa mukuru Tokyo.

Mu ijambo rye rya nyuma nk’umwami w’abami, Akihito yatanze ibimenyetso by’ubutegetsi, anashimira n’abaturage uburyo bamushyigikiye mu myaka 30 yose yari amaze ku ngoma.

Yagize ati "Ndashima cyane abaturage banyemereye ko mbabera ikimenyetso cyabo bakananshyigikira".

Akomeza agira ati"Ndi kumwe n’umufasha wanjye, nizeye n’umutima wanjye wose ko ingoma ya Reiwa izaba iy’amahoro n’iterambere, kandi nkifuriza ubuzima bwiza n’umunezero igihugu cyacu n’isi yose".

Ibirori nyamukuru by’ugutanga byabereye mu cyumba cy’ingoro imbere y’abatumire 300, harimo na minisitiri w’intebe w’Ubuyapani Shinzo Abe, igikomangoma Naruhito, n’igikomangomakazi Masako.

Muri ibyo birori, Minisitiri Shinzo Abe,mu ijambo yatangaje imbere y’umwami w’abami Akihito aho yavuze ko bazakora ibishoboka byose kugira ngo ahazaza h’Ubuyapani habe heza.

Ati "Tunyuze mu nzira twaharuriwe n’umwami w’abami, tuzakora ibishoboka byose kugira ngo dutegure ahazaza heza h’Ubuyapani bwuzuye amahoro n’umunezero".

Akihito w’imyaka 85 y’amavuko yemerewe ko ashobora gutanga inkoni y’ubwami nyuma y’aho atangarije ko yumva adashoboye gushyira mu bikorwa imirimo ye kubera imyaka n’ubuzima buri kugenda bugabanuka.

Ni umwami w’abami wa mbere w’Ubuyapani atanze inkoni mu myaka irenga 200 ishize.

Igikomangoma Naruhito azahita yimikwa ejo ku wa Gatatu, ahite atangira indi ngoma mu mu ngengabihe y’Ubuyapani.N’ubwo nta butegetsi bwa politike afite, ni we ndorerwamo y’igihugu mu iterambere n’amahoro byacyo.

Ingoma ya Akihito yaranzwe n’ukuganiriza abarwayi n’abahuye n’ibibazo,ari nabyo byatumye akundwa n’abaturage benshi b’Ubuyapani.

Kubera iki yatanze inkoni?

Uyu mukambwe w’imyaka 85 y’amavuko yabazwe kanseri yo mu myanya myibarukiro y’abagabo (Cancer de la prostate) mu mwaka wa 2003,ndetse n’umutima mu mwaka wa 2012.

Mu ijambo yatangaje mu mwaka wa 2016, ibidakunze kubaho, yari yatangaje ko afite ubwoba ko imyaka ye ishobora gutuma adashobora gukora neza imirimo ye, aho yavuze ashize amanga ko yifuza gutanga inkoni.

Kuri ubu Igikomangoma Naruhito ni we azahita aba umwami w’abami w’icyo gihugu akaba uwa 126, akazayobora igihugu ku ngoma nshya yiswe Reiwa, izaba isimbuye igoma yari ihasanzwe yitwa Heisei, yatanguye igihe Akihito yimikwaga mu mwaka wa 1989.

Niyomugabo Albert/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru