Yashyizweho kuri28 June, 2019 | 12:15

Umusirikare ucyekwaho kwica umugaba w’ingabo za Ethiopia yamenyekanye

Umwirondoro w’umusirikare ushinjwa kwica arashe umugaba mukuru w’ingabo za Ethiopia Jenerali Seare Mekonnen n’undi Jenerali umwe, wahishuwe.

Abo bagabo bombi bishwe ku wa gatandatu ushize mu murwa mukuru Addis-Abeba.

Abategetsi bavuga ko iyicwa ryabo ryari mu kivugwa ko wari umugambi wo kugerageza guhirika ubutegetsi mu karere ka Amhara - kamwe muri leta zigize Ethiopia.

Ku cyumweru gishize, leta ya Ethiopia yatangaje ko umwe mu bari bashinzwe gucunga umutekano wa Jenerali Seare ari we waryozwa iyicwa ryabo ndetse ko yatawe muri yombi.

Ku wa mbere w’iki cyumweru, umukuru wa polisi Endeshaw Tasew yavuze ko uwo musirikare yahise yiyica nyuma yo kwica abo ba Jenerali bombi.

Ariko nyuma yaho kuri uwo wa mbere, polisi yasabye imbabazi ivuga ko uwo musirikare ari mu bitaro akaba ari koroherwa ibikomere by’amasasu.

Yatangajwe kuri televiziyo y’igihugu, ETV, ko ari Kaporali Mesafint Tigabu. Iyi televiziyo yanagaragaje ifoto ye.

Televiziyo ETV yatangaje ko Kaporali Mesafint akivurirwa mu cyumba cy’indembe aho acungiwe umutekano bikomeye.

MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru