Yashyizweho kuri6 October, 2018 | 15:05

Inkuru icukumbuye ku ibura ry’umukuru wa polisi mpuzamahanga

Ubufaransa bwatangije iperereza ku iburirwa irengero kwa Meng Hongwei, Umushinwa ukuriye polisi mpuzamahanga ya Interpol.

Abategetsi bavuga ko umuryango we utigeze wongera kumenya amakuru ye kuva yava mu biro bye ku cyicaro gikuru cya Interpol mu mujyi wa Lyon mu Bufaransa yerekeza mu Bushinwa.

Hari ku itariki ya 25 y’ukwezi gushize kwa cyenda.Umwe mu bakurikiranira hafi iryo perereza, yabwiye ibiro ntaramakuru AFP ati "Ntabwo yaburiwe irengero ari mu Bufaransa."

Ikinyamakuru The South China Morning Post cyo muri Hong Kong gisubiramo amagambo y’umuntu uvuga ko Bwana Meng w’imyaka 64 y’amavuko "yatwawe" ngo ahatwe ibibazo mu Bushinwa.

Iki kinyamakuru cyongeraho ko bitazwi impamvu ari gukorwaho iryo bazwa n’"abategetsi bashinzwe imyitwarire" kandi ko bitazwi aho iryo bazwa riri kubera.

Kugeza ubu, abategetsi bo mu Bushinwa ntacyo baratangaza ku mugaragaro kijyanye na Bwana Meng, usanzwe ari umwe mu bategetsi bakuru mu ishyaka rya gikomunisiti riri ku butegetsi muri icyo gihugu.

Ni iki iperereza ryo mu Bufaransa riri kureba?Ryatangijwe nyuma yaho umugore wa Bwana Meng agiriye kuri polisi akavuga ko umugabo we yabuze.Ku ikubitiro, polisi yasubiyemo amagambo ye ivuga ko yayibwiye ko atarigera yongera kumenya amakuru y’umugabo we guhera ku itariki ya 29 y’ukwezi gushize kwa cyenda.

Ariko nyuma yaho, minisiteri y’ubutegetsi bw’igihugu mu Bufaransa yavuze ko itariki y’ukuri ari iya 25 y’ukwezi gushize kwa cyenda.

Iyi minisiteri yavuze ko "ibiganiro bikomeje" hagati yayo n’abategetsi b’Ubushinwa. Yongeyeho iti "Ubufaransa buri mu rujijo ku byabaye kuri perezida wa Interpol kandi buhangayikishijwe n’iterabwoba ryashyizwe ku mugore we."

Ubuyobozi bwa Interpol bwatangaje iki?Mu itangazo bwasohoye, bwavuze ko buzi amakuru avuga ku "cyibazwa ko ari ibura" rya Bwana Meng.

Meng afite ubunararibonye bw’imyaka 40 mu gucunga umutekano mu Bushinwa

Bwongeyeho buti "Ni ikibazo cyo gukurikiranwa n’abategetsi babishinzwe mu Bufaransa no mu Bushinwa."

Bwongeyeho ko ubu Interpol - ihuriwemo n’ibihugu binyamuryango 192 - iri kuyoborwa n’umunyamabanga rusange, aho kuba perezida.

Byari bisanzwe ko umutegetsi mukuru wo mu Bushinwa aburirwa irengero?

Umunyamakuru wa BBC Celia Hatton ducyesha iyi nkuru akana ana kuriye itsinda rikora inkuru zijyanye n’Ubushinwa, yavuze ko uburyo Bwana Meng yaburiwe irengero, busa neza n’uburyo ubu bumaze kumenyerwa abategetsi bamwe bakuru bo mu ishyaka riri ku butegetsi mu Bushinwa baburirwamo irengero.

Yavuze ko uko ubwo buryo buteye, umutegetsi aburirwa irengero bitunguranye abantu ntibongere kumuca iryera, hanyuma hakaza kumvikana umuntu urangisha "umuntu wabuze", akenshi akaba ari umuntu wo muri rubanda isanzwe urangisha.

Bwana Meng (ibumoso) na Perezida Vladimir Putin w’Uburusiya mu nama yigaga ku mutekano wo ku mbuga za interineti yaberaga i Moscou mu Burusiya mu kwezi kwa karindwi uyu mwaka

Bwana Meng (ibumoso) na Perezida Vladimir Putin w’Uburusiya mu nama yigaga ku mutekano wo ku mbuga za interineti yaberaga i Moscou mu Burusiya

Umunyamakuru wa BBC Celia Hatton yongeyeho ko kera kabaye, ishyaka riri ku butegetsi mu Bushinwa ritanga itangazo rivuga ko uwo mutegetsi "ari gukorwaho iperereza" ku "byaha bijyanye n’imyitwarire."

Uyu munyamakuru wa BBC yanavuze ko ubundi ari gacye cyane ko abo mu muryango w’umutegetsi mukuru wo mu Bushinwa waburiwe irengero bitabaza abategetsi b’amahanga, batinya ko umuntu wabo waburiwe irengero yahabwa ibihano birenzeho.

Umugore wa Bwana Meng we akaba yaritabaje abategetsi b’Ubufaransa hashize gusa iminsi micye umugabo we aburiwe irengero.

Mbere yo gutorerwa kuyobora Interpol mu mwaka wa 2016, Bwana Menga yari minisitiri wungirije w’umutekano mu Bushinwa.

Manda ye yitezwe kurangira mu mwaka wa 2020.Amakuru atangazwa na Interpol avuga ko Bwana Meng afite ubunararibonye bw’imyaka 40 mu bikorwa byo gucunga umutekano mu Bushinwa, birimo kurwanya ibiyobyabwenge, kurwanya iterabwoba no gucunga imipaka.

Mu nshingano za Interpol, ishobora gusohora impapuro zo guta muri yombi umuntu ushakishwa.Ariko nta bubasha ifite bwo kohereza abapolisi mu bihugu ngo bate muri yombi abantu bashakishwa.

Chief Editor


Tanga igitecyerezo

Amazina
Ubutumwa

Izindi nkuru