Yashyizweho kuri26 October, 2018 | 11:14

Umukuru w’urwego rw’ubutasi rw’Amerika rwa CIA, yabwiye Perezida Trump iby’iyicwa rya Khashoggi

Gina Haspel, umukuru w’urwego rw’ubutasi bwo hanze y’igihugu bwa Leta Zunze Ubumwe z’Amerika ruzwi nka CIA, yabwiye Perezida Donald Trump ibyo yamenyeye mu ruzinduko yagiriye muri Turukiya muri iki cyumweru ku iyicwa ry’umunyamakuru Jamal Khashoggi wo muri Arabie Saoudite.

Nta cyatangajwe ku bikubiye muri icyo kiganiro bagiranye.

Ariko iki kiganiro hagati ya Madamu Haspel na Bwana Trump cyabaye hashize amasaha amakuru avuze ko muri urwo ruzinduko yagiriye muri Turukiya, Madamu Haspel yumvise amajwi leta ya Turukiya ivuga ko yumvikanisha uko iyicwa rya Bwana Khashoggi ryagenze.

Madamu Haspel yari yagiye muri Turukiya ku wa mbere w’iki cyumweru, ngo asuzume amakuru y’ubutasi ajyanye n’iyicwa rya Bwana Khashoggi.

Mike Pompeo, umunyamabanga wa leta y’Amerika, na we yitabiriye icyo kiganiro Madamu Haspel yagiranye na Trump ku wa kane mu biro bya perezida w’Amerika bya White House. Ariko nta yandi makuru arenzeho yatangaje.

Ku wa Gatatu, ikinyamakuru Sabah cya leta ya Turukiya cyari cyatangaje ko Madamu Haspel yumvise amajwi y’ibazwa ryakorewe Bwana Khashoggi ndetse n’urupfu rwe, ariko nticyatangaza ingingo ku yindi ibikubiye muri ayo majwi cyangwa uko cyabonye ayo majwi.

Ikinyamakuru The Washington Post n’ibiro ntaramakuru Reuters, nyuma nabyo byaje kwemeza ayo makuru, bitangaza ko byavuganye n’abantu bemeje ko Madamu Haspel yumvise ayo majwi.

Hagati aho, amagambo y’umushinjacyaha wa Arabie Saoudite yasubiwemo avuga ko iyicwa rya Bwana Khashoggi cyari "igikorwa cyagambiriwe".

Bwana Khashoggi wabaga muri Amerika akanenga ubutegetsi bwa Arabie Saoudite, yapfiriye muri ambasade ya Arabie Saoudite iri i Istanbul muri Turukiya.

Ku ikubitiro, Arabie Saoudite yahakanye ko itazi aho uyu munyamakuru ari ubwo yaburirwaga irengero ku itariki ya kabiri y’uku kwezi kwa cumi, ariko nyuma iza kwemera ko yiciwe muri ambasade yayo i Istanbul, ibyegeka ku ntasi zayo "zataye umurongo".

Iperereza ku iyicwa rya Khashoggi rigeze hehe?

Ibiro ntaramakuru Anadolu bya leta ya Turukiya ku wa kane byatangaje ko abakozi 38 bo kuri ambasade ya Arabie Saoudite i Istanbul muri Turukiya, bahaswe ibibazo nk’abatangabuhamya.

Na n’ubu umurambo wa Bwana Khashoggi nturaboneka.

Bisa nkaho abakora iperereza ba Turukiya bashakisha umurambo we, ubu noneho bari kwibanda ku kidendezi cy’amazi kiri mu busitani bw’inyubako y’ibiro by’uhagarariye Arabie Saoudite muri Turukiya.

Yanditswe na Habarurema Djamali


Tanga igitecyerezo

Amazina
Ubutumwa

Izindi nkuru