Yashyizweho kuri28 August, 2019 | 18:29

Umujyi wa Kigali ugiye kongera umubare w’abokozi bo mu nzego zo hasi

Ubuyobozi bw’Umujyi wa Kigali buratangaza ko mu miterere mishya y’ubuyobozi bwawo, serivisi zigiye kwegerezwa abaturage ku buryo inzego zo hasi zizongererwa abakozi kugira ngo zirusheho gutanga serivisi byihuse.

Mu kiganiro Rubingisa Pudence,umuyobozi w’Umujyi wa Kigali yagiranye n’itangazamakuru kuri uyu wa Gatatu yavuze ko mu minsi mike izi mpinduka zizatangira gushyirwa mu bikorwa.

Ati “Muri gahunda y’Itegeko rishya rigenga Umujyi wa Kigali, nubwo uturere tutagifite ubuzima gatozi, ariko serivisi zitangirwa ku mirenge cyane cyane n’utugari zirashyirwamo imbaraga, ngira ngo urebye n’ibiteganywa mu mbonerahamwe y’abakozi, abakozi baziyongera kuri izo nzego, umubare uziyongera kurusha uwari uriho kuko serivisi zizihutishwa kandi zitangwe ku buryo umuturage anogerwa.”

Yakomeje agira ati “Ku mirenge cyane cyane, ku tugari, abakozi baziyongera n’imbonerahamwe y’abakozi irabiteganya. Ku rwego rw’uturere hazagira ibizahinduka, ariko serivisi zigomba gushyirwamo ingufu, nibiba ngombwa ko abakozi biyongera baziyongera, kubera ko urugero, uyu munsi ibiro bitanga ibyangombwa byo kubaka mu Karere ka Gasabo, babona ubusabe bugera ku 100 ku munsi bw’ibyangombwa byo kubaka, ahongaho twareba buryo ki abo bakozi bakwiyongera kugira ngo serivisi zihute bitewe n’uko ubusabe bungana”.

Ni nyuma y’impinduka ziheruka kubaho mu buyobozi bw’uyu mujyi aho uturere tugize Umujyi wa Kigali twambuwe ubuzima gatozi ndetse n’Inama Njyanama zatwo zigakurwaho.

Muri iki gihe hategerejwe ko uturere dutatu tugize Umujyi wa Kigali duhabwa abayobozi bashya, bikazagendana n’izindi mpinduka ziteganywa mu Itegeko rishya ry’Umujyi wa Kigali.

Niyomugabo Albert / MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru