Yashyizweho kuri19 February, 2017 | 12:16

Umuherwe Bill Gates n’umugore we bashimye intambwe u Rwanda rwateye

Umuherwe Bill Gates n’umugore we Melinda Gates bashimye intambwe u Rwanda rwateye mu kugabanya imfu z’abana bapfaga bakivuga kugera kuri 30% hagati ya 2008 na 2015.

Bill n’umugore we bakeje u Rwanda mu ibaruwa bandikiye umuherwe Warren Buffett, bamushimira ku nkunga yateye Umuryango wita ku buzima bashinze, Bill & Melinda Gates Foundation.

Muri iyo baruwa ivuga ko mu 2016, abana basaga miliyoni bapfuye Ku Isi ku munsi bavuka.

Inagaragaza ko nubwo umubare wose w’abana bapfa bakiri bato wagabanutse, uw’abapfa bavuka wazamutse ugera kuri 45% mu 2015 bavuye ku 40% bariho mu 1990.

Bill Gates na Melinda bivugiye ko batumva uburyo u Rwanda, kimwe mu bihugu bikennye ku Isi rugabanya umubare w’abana bapfa bavuka ku rugero rushimishije nyamara hari ibikize byananiye.

Bagereranyije u Rwanda na Mali bashingiye ku musaruro mbumbe w’ibihugu byombi (GDP), bavuga ko batumva uburyo u Rwanda rufite GDP iri hasi rugira gahunda zifatika mu kugabanya imfu z’abana.

Melinda yagize ati “Biratangaje cyane kubona uburyo iki gihugu cyateye intambwe. Kuva mu 2008 kugeza 2015, u Rwanda, kimwe mu bihugu bikennye ku mugabane wa Afurika, rwagabanyije imfu z’abana kku kigero cya 30%, hagakagaragara gusa imfu 19 mu bana 1000 bavutse. Ukagereranya na Mali ifite umusaruro mbumbe ufatika ariko abana 38 mu 1000 bavutse barapfa.

Yongeyeho ati “Ugira ngo u Rwanda byarusabye iki? Ni ibintu byoroshye : Konsa umwana bihagije mu masaha ya mbere, ndetse n’amezi atandatu ya mbere, kwiyegereza umwana kugira ngo ubushyuhe bw’umubyeyi buzamure ubw’umana, no gukuraho neza urureri hitawe ku isuku, ibyo ni byo byatumye umubare w’abana bapfa bavuka mu Rwanda ugabanuka.”

Uyu muryango ugaragaza ko mu 2015 abana bagera kuri miliyoni 2.6 bapfuye mu kwezi kwa mbere bavutsemo ku Isi yose, ukagaragaza ko bimwe mu bitera imfu z’abana bapfa bakivuka harimo ko 6% bicwa n’umusonga, 29% bagapfa kubera kuvuka batagejeje igihe, 27% bo bazira indwara z’ubwonko, 7% bicwa n’indwara zitandukanye zifata abana bakivuka, 13% bicwa n’ibisebe ku mubiri mu gihe 9% bicwa n’uburwayi bufata ababyeyi babatwite.

Bill & Melinda Gates Foundation ifasha Minisiteri y’Ubuzima mu Rwanda mu bikorwa bitandukanye bigamije guteza imbere imibereho myiza y’abaturage, birimo kuboneza urubyaro, kurinda indwara zikomoka ku mwanda, n’izindi.

Yanditswe na Ubwanditsi/Muhabura.rw


Tanga igitecyerezo

Amazina
Ubutumwa

Izindi nkuru