Yashyizweho kuri4 March, 2019 | 08:53

Uganda igiye gushaka umuti w’ibibazo biri hagati yayo n’u Rwanda

Minisitiri w’Intebe wa Uganda, Ruhakana Rugunda atangaza ko igihugu cye kiri gushaka uko cyakemura ibibazo gifitanye n’u Rwanda ku bijyanye no kwambukiranya imipaka.

Uyu mutegetsi yabitangarije abatuye agace ka Kigezi ko iki kibazo cyo gufunga imipaka cyatangiye kuwa Gatatu w’icyumweru gishize kiri gukemurwa na Minisiteri y’Ububanyi n’Amahanga n’Iy’Inganda n’Ubucuruzi. Avuga ko bari mu biganiro n’uruhande rw’u Rwanda kugira ngo havugutwe umuti w’iki kibazo.

Ati “Leta irabizi.Turi gukora ibiishoboka byose kugira ngo iki kibazo gikemuke.Tubigeze kure.”

Rugunda, kuwa Gatanu w’icyumweru gishize, yabwiye abatuye Akarere ka Kabale ko bari kuvugana n’u Rwanda gusa ntiyatangaje abo ku ruhande rw’u Rwanda bari kuganira kuri iki kibazo.

Ibi ni nyuma y’aho Minisitiri w’Ububanyi n’Amahanga w’u Rwanda, Dr Richard Sezibera, abinyujije ku rukuta rwe rwa twitter, yatangaje ko bafashe umwanzuro wo gusaba Abanyarwanda kutajya muri Uganda ku byo yise kubera umutekano wabo.

Hari ku nshuro ya mbere mu buryo bweruye ubuyobozi bw’u Rwanda buburiye abaturage bubasaba guhagarika ingendo bagirira muri Uganda.

Kugeza ubu u Rwanda ntiruratangaza niba koko ruri kuvugana na Uganda kuri iki kibazo.

Chief editor /MUHABURA.RW


Tanga igitecyerezo

Amazina
Ubutumwa

Izindi nkuru