Yashyizweho kuri24 April, 2018 | 09:06

Uganda: Vigitoriya ni ikiyaga kibitse amateka akomeye kuri Jenoside yakorewe Abatutsi- Mugambage Frank

Ambasaderi w’u Rwanda muri Uganda, Mugambage Frank asanga ikiyaga cya Vigitoriya kibitse amateka akomeye avuga ku mateka ya Jenoside yakorewe Abatutsi mu 1994, abishingiye ahanini ko Abatutsi bishwe mu 1994 imibiri yabo ngo ariho yatungukiye, nyuma yo kujugunywa mu migezi n’ibiyaga bitandukanye byo mu gihugu ikarohorwa bikozwe n’abagiraneza bo muri Uganda bakoreraga kuri Vigitoriya mu ntara ya Masaka.

Intumwa y’u Rwanda muri Uganda yabivugiye ku kiyaga cya Vigitoriya, i Kasensero mu gikorwa cyo kwifatanya n’abanyamuryango b’ishyirahamwe ‘Humura Vigitoriya Warakoze’, ishyirahamwe rishinzwe gushakisha imibiri y’abazize Jenoside baroshywe mu mazi n’abagize Diaspora nyarwanda baba muri Uganda n’abaturage mu gikorwa cyo kwibuka abazize Jenoside yakorewe Abatutsi. Ubu iyo mibiri isaga ibihumbi icumi ikaba ishyinguwe mu nzibutso eshatu muri Uganda ari zo Kasensero, Lambu na Golo. Muri yo umuhinde Muhamudu Thobani yashyinguye mu cyubahiro imibiri isaga 950.

Avugana n’itangazamakuru, Amb Mugambage yasabye Abanyarwanda gutangira kwandika amateka ku byabaye mu gihugu cyabo, kuko avuga ko ari bimwe bizafasha kugaragaza ukuri kuri Jenoside mu rwego rwo kurwanya abashobora gukomeza kuyihakana no kuyipfobya.

Ati “Vigitoriya ni ikiyaga kibitse amateka akomeye kuri Jenoside yakorewe Abatutsi, aya mateka rero agomba kwandikwa kugira ngo atazazima, kuko bamwe mu bayigizemo uruhare, na hano muri Uganda barahari kandi turimo gufatanya n’ababishinzwe ngo bagarurwe mu Rwanda bashyikirizwe ubutabera.

Simbwa Banda Emmanuel, umwe mu batangabuhamya bafashije kuvana imibiri mu kiyaga cya Vigitoriya, yabwiye itangazamakuru ko, muri Nyakanga 1994, ari bwo we na bagenzi be bakora uburobyi mu kiyaga batangiye kubona imibiri iza bibabera amayobera. Ati ”Ku ikubitiro ntitwari tuzi aho imibiri, iva n’ikibazo cyabaye, nyuma ni bwo twatangiye kubona haza myinshi, tumaze no kumva ko mu Rwanda hari Jenoside, dutangira kwiyambaza ubuyobozi n’Imiryango y’abagiraneza nka LWF baduha ibikoresho n’ubushobozi maze dutangira kuyijyana ku nkengero z’ikiyaga dutangira kuyishyingura mu cyubahiro nubwo byari ibihe bitari byoroshye.

JPEG - 62.8 kb
Ambasaderi w’u Rwanda muri Uganda, Mugambage Frank yifatanyije n’abandi bantu batandukanye ku kiyaga cya Vigitoriya mu muhango wo kwibuka Jenoside yakorewe Abatutsi

Uwamungu Jean de Dieu umwe mu barokotse Jenoside, mu buhamya bwe yavuze inzira y’umusaraba yanyuzemo ubwo ababyeyi be bari bamaze kwicwa dore ko hari n’abatangiye kwicwa ku ikubitiro mu 1992. Yakomoje ku irondakoko yakorewe akiri muto mu ishuri aho yigaga, icyakora ashima Leta yamubaye hafi abasha kwiga, ubu akaba akomeje inzira yo kwiyubaka aho guheranwa n’agahinda. Ati “Turiho kuko Imana idukunda kandi tuzaharanira kubaho”.

Biteganyijwe ko Golo hazubakwa n’inzu ndangamateka ya Jenoside yakorewe Abatutsi ku bufatanye bw’Ambasade y’u Rwanda muri Uganda, bugizwemo uruhare na Diaspora muri icyo gihugu.

Niyomugabo Albert


Tanga igitecyerezo

Amazina
Ubutumwa

Izindi nkuru